2 PETROS 2 - Khasi CL Bible (BSI)

Ki nonghikai balamler

¹ Ki nongïathuhlypa balamler ki la ju mih ha ki por ba la leit noh hapdeng ki briew, bad ha kajuh ka rukom, ki nonghikai balamler kin mih hapdeng jong phi. Kin wallam ïa ki jinghikai bapynjot bad bymshisha ïa ki jinghikai shongtynrai bad kin len ïa U Kynrad uba la siewspah ïa ki, bad kumta kin wallam ha lade ïa ka jingpynjot kaba kynsan.

² Wat la katta, shibun kin bud ïa ki lynti bajakhlia jong ki; bad namar kaei kaba ki leh, kiwei kin kren sniew ïa ka Lynti jong ka jingshisha.

³ Ha ka jinglalot jong ki, kine ki nonghikai balamler kin kamai da kaba ïathuh ïa phi ïa ki jingïathuhkhana ba shu thaw. La kham slem mynta U Nongbishar jong ki u la long uba la kloi, bad u Nongpynjot jong ki u la long u bym ju ïohthiah!

⁴ U Blei um shym la shah jem ïa ki angel kiba la leh pop, hynrei u la bret ïa ki sha dujok, ha kaba la khum kynjri ïa ki ha ka jingdum, da kaba ap ïa ka Sngi ka Jingbishar.

⁵ U Blei um shym la shah jem ïa ka pyrthei mynbarim, hynrei u la wanrah ïa ka jingshlei um ha ka pyrthei jong ki briew bymtip Blei; kita kiba u pyllait im ki long u Noah, uba la ïalap ïa ka hok, bad hynñiew ngut kiwei pat.

⁶ U Blei u la pynrem ïa ki nongbah ka Sodom bad ka Gomorrah, da kaba pynjot ïa ki da ka ding, bad u la pynlong ïa ki ka nongmuna jong kaei ka ban jia ha ki bymtip Blei.

⁷ U la pyllait im ïa u Lot, u briew uba bha, uba la pisa jingmut da ka jinglong bajakhlia jong ki briew bymkheiñ ïa ka aiñ.

⁸ Uta u briew uba bha u la im hapdeng jong ki, bad man la ka sngi u shah ïa ka jingkordit haba u la ïohi bad la ïohsngew ïa ki kam sniew jong ki.

⁹ Bad kumta U Trai u tip kumno ban pyllait im ïa ki briew kiba riewblei na ki jingtynjuh jong ki bad kumno ban pynhap ïa ki bymman ha ka jingpynshitom ha ka Sngi ka Jingbishar, khamtam ïa kito kiba beh ïa ki jingkwah brai jakhlia jong ka met bad kiba ñiewbeiñ ïa ka bor synshar jong U Blei.

¹⁰ Kine ki nonghikai balamler ki long kiba shlur bad kiba kyr-eit, bad kim pyn-i jingñiewburom ïa ki jingthaw ba kynja bneng; pynban ki krenbeiñ ïa ki.

¹¹ Wat ki angel, kiba kham khlaiñ bad kham khraw ban ïa kine ki nonghikai balamler, kim pynrem ïa ki da ki jingkrenbeiñ ha khmat U Trai.

¹² Hynrei kine ki briew ki leh la ka leh, kum ki mradkhlaw ïa kiba la kha ïa ka ban shah kem bad shah pynïap; ki tur ïaleh da ki jingkrenbeiñ ïa kiei kiei kiba kim sngewthuh.

¹³ Yn sa pynjot ïa ki kum ïa ki mradkhlaw, bad kin hap shah ïa ka jingshahshitom kaba ki la pynlong. Ka jingsngewbha ha ki ka long ban leh ïa kaei kaei ha kaba shai ka sngi ka ban pynhun ïa ki jingkwah brai ka doh; ki long ka jinglehrain bad ka jingjahburom haba ki ïashong bam bad phi, katba ki nang leh sngewbha ha la ki lynti bashukor!

¹⁴ Kim kwah ban peit ïa kaei kaei hynrei ïa ki kynthei ba leh ïa ki kam ba-ijli; ka jingkwah brai jong ki ïa ka pop kam ju hun. Ki ïalam ïa ki briew kiba tlot sha ka jingriam. Ki dohnud jong ki, ki long kiba la shah hikai ban long kiba lalot. Ki don hapoh ka jingtim jong U Blei!

¹⁵ Ki la iehnoh ïa ka lynti kaba beit bad ki la jah lynti; ki la bud ïa ka lynti jong u Balaam, u khun jong u Beor, uba ieit ïa ka pisa kaba u ïoh da ka kam bymhok

¹⁶ bad la sneng ïa u na ka bynta ka pop. U kada jong u, u la kren ha ka sur briew bad u la khang ïa ka kam leh bieit jong u nongïathuhlypa.

¹⁷ Kine ki briew ki long kum ki pukri ba la tyrkhong, kum ki lyoh ba la rong noh da ka 'erïong; U Blei u la buh tyngkai ïa ka jaka na ka bynta jong ki ha ka jingdum tliw tliw.

¹⁸ Ki kren ïa ki jingkren sarong bad ba-mutlop, bad ki riam pah da ki jingkwah brai jong ka doh ïa ki briew kiba dang shu sdang ban phet ïap napdeng ki briew kiba im ha ka jingleh bymdei.

¹⁹ Ki kular ha ki ïa ka jinglaitluid katba ma ki, ki long ki mraw jong ki jingmlien bapynjot — naba u briew u long u mraw ha kano kano kaba la jop ïa u.

²⁰ Lada ki briew ki la lait im na ki bor ba pynpyut jong ka pyrthei da ka jingtip jong ki ïa U Jisu Khrist uba U Trai bad U Nongpynim jong ngi, bad nangta ki ngat biang bad shahjop ha ki, kum kita ki briew ki don ha ka jinglong kaba kham sniew ha kaba kut ban ïa kaba ki la long ha kaba nyngkong.

²¹ Kan jin da la kham bha ïa ki ba kin ym jin da la tip ïa ka lynti ka hok ban ïa kaba tip ïa ka bad nangta pat ban phai dien noh na ka hukum bakyntang ïa kaba la ai ha ki.

²² Kaei kaba la jia ha ki, ka pynpaw ba ki Proberb ki long kiba shisha: “U ksew u leit phai pat sha la ka prie” bad “u sniang ïa uba la pynsum pynsait u leit kyrsum pat ha ka ktieh.”