2 PETROS 1 - Khasi CL Bible (BSI)1 Na u Simon Petros, u shakri bad u Apostol jong U Jisu Khrist — Sha kito ha kiba da ka hok jong U Blei jong ngi bad U Jisu Khrist U Nongpynim la ai ïa ka jingngeit kaba kordor kum ka jong ngi: 2 To ai ba ka jingaiei bad ka jingsuk ba-dap pura kin long ki jong phi lyngba ka jingtip jong phi ïa U Blei bad ïa U Jisu U Trai jong ngi. Ka jingkhot bad ka jingjied U Blei 3 Ka bor jong U Blei ka la ai ha ngi ïa kiei kiei baroh kiba ngi donkam ban im ïa ka jingim riewblei bashisha da ka jingtip jong ngi ïa uta uba la khot ïa ngi ban ïadon bynta ha ka burom bad ka jingbha jong u hi. 4 Ha kane ka rukom, u la ai ha ngi ïa ki jingai kiba khraw eh bad ba kordor ïa kiba u la kular, khnang ba lyngba kine ki jingai phi lah ban phet ïap noh na ka jingkwah brai bapynjot kaba don ha ka pyrthei, bad ba ngi lah ban wan ïashim bynta ha ka jinglong ba kynja Blei. 5 Te namar kane hi ka daw phi dei ban leh ïa kaba bha tam jong phi ban pynlang ïa ka jingbha ha ka jingngeit jong phi; ha ka jingbha jong phi pynlang ïa ka jingtip; 6 ha ka jingtip jong phi pynlang ïa ka jingsynshar ïa lade; ha ka jingsynshar ïa lade pynlang ïa ka jingïaishah; ha ka jingïaishah pynlang ïa ka jinglong riewblei; 7 ha ka jinglong riewblei pynlang ïa ka jingïadei parabangeit; bad ha ka jingïadei parabangeit pynlang ïa ka jingieit. 8 Kine ki long ki jinglong kiba phi donkam, bad lada phi don kyrhai ïa ki, kin pynlong ïa phi kiba smat bad kiba seisoh ha ka jingtip ïa U Jisu Khrist U Trai jong ngi. 9 Hynrei uno uno u bym don ïa kine, u long u bym ïohi jngai ba um lah ban ïohi bad u la klet ba ïa u la pynkhuid na ki pop jong u kiba mynshuwa. 10 Naba kumta, ko ki parabangeit jong nga, to pyrshang kham tyngeh ban pynlong ïa ka jingkhot jong U Blei bad ka jingjied jong u ïa phi, ka jingshem baneh junom; lada phi leh kumta, phin ym iehnoh da lei lei ïa ka jingngeit jong phi. 11 Ha kane ka rukom, phin ïoh ïa ka hok ba-pura ban rung sha ka Hima bymjukut jong U Jisu Khrist uba U Trai bad U Nongpynim jong ngi. 12 Bad kumta ngan ïai pynkynmaw ïa phi shaphang kine kiei kiei, wat la phi la tip lypa bad phi ïeng skhem ha ka jingshisha kaba phi la ïohpdiang. 13 Nga pyrkhat ïa kane ba ka long kaba dei ïa nga ban pynkhih ïa ka jingkynmaw jong phi ïa kine kiei kiei katba nga dang im. 14 Nga tip ba shen ngan sa iehnoh ïa kane ka met bapyut kumba U Jisu Khrist U Trai jong ngi u la ïathuh shai ha nga. 15 Ngan leh ïa kaba bha tam ka jong nga, nangta, ban thaw ka lad na ka bynta jong phi ban kynmaw ïa kine kiei kiei ha ki por baroh hadien ka jingïap jong nga. Ki sakhi ïa ka burom U Khrist 16 Ngim shym la shaniah ha ki jingïathuhkhana ba shu thaw ha kaba ïathuh ha phi ïa ka jingwan ha ka bor jong U Jisu Khrist uba U Trai jong ngi. Da la ki khmat jong ngi hi ngi la ïohi ïa ka jingkhraw jong u. 17 Ngi la don hangta mynba la ai ïa ka burom bad ïa ka jingpyndonburom ha u da U Blei uba U Kpa, haba ka sur ka la wan sha u na ka Burom Bahakhlieh Tam Eh, kaba ong, “Une u long U Khun ba-ieit jong nga hi, ha uba nga sngewbha eh!” 18 Ngi hi da lade ngi la ïohsngew ïa kane ka sur kaba wan na bneng, haba ngi la ïadon lem bad u ha u lum bakhuid. 19 Kumta ngi la nang sngewskhem shuh shuh ha ka khubor ba la pynbna da ki nongïathuhlypa. Kan bha ba phi shahshkor ïa ka, namar ka long kum ka sharak kaba shai ha ka jaka ba-dum haduh ba kata ka Sngi ka wan bad ka jingshai jong u 'lurstep ka tyngshaiñ ha ki dohnud jong phi. 20 Nalor kiei kiei baroh, namarkata, to kynmaw ba ym don mano mano ba lah ban batai da lade ïa ka jingïathuhlypa ha ki Jingthoh Bakhuid. 21 Naba ym don khubor jingïathuhlypa kaba la ju wan tang na ka mon u briew, hynrei ki briew ki la long hapoh ka jingpynïaid jong U Mynsiem Bakhuid katba ki dang kren ïa ka khubor kaba la wan na U Blei. |
Khasi CL Bible
Copyright © Bible Society of India, 2016.
Used by permission. All rights reserved worldwide.
Bible Society of India