2 KORINTH 9 - Khasi CL Bible (BSI)

Ka jingïarap ïa ki parabangeit

¹ Kam da donkam shisha ïa nga ban thoh sha phi shaphang ka jingïarap ïa kaba dang ïai phah sha ki briew jong U Blei ha Judia.

² Nga tip ba phi mon sngewbha ban ïarap, bad nga la kob sarong ïa phi ha ki briew ha Makedonia. “Ki parabangeit ha Akhaïa” nga la ong, “ki la kloi ban ïarap naduh ka snem kaba la dep.” Ka jinglong ba la kloi jong phi ka la pynkhih ïa kiba bun na ki.

³ Mynta nga phah ïa kine ki parabangeit, khnang ba ka jingkob sarong jong ngi shaphang jong phi ha kane ka bynta kan ym long tang ki ktien kiba thylli. Hynrei kumba nga la ong, phin long kiba kloi ban ïarap.

⁴ Pynban, lada ki briew na Makedonia kin wan bad nga bad kin shem ba phim pat long kiba la kloi, katno kan long ka jingpynlehrain ïa ngi — khlem da kren ïa ka jinglehrain ïa phi — naba ngi la shaniah katta ïa phi!

⁵ Kumta nga la pyrkhat ba ka long kaba donkam ban kyntu ïa kine ki parabangeit ban leit ha shuwa jong nga sha phi bad ïoh pynkhreh lypa ïa ka jingai kaba phi la kular. Te kan long kaba la pynkhreh haba nga poi, bad kan pyn-i ba phi ai namar ba phi kwah ban leh kumta, ym namar ba phi dei ban leh kumta.

⁶ To kynmaw ba u briew uba bet tang khyndiat ki symbai un ïoh ot ruh khyndiat; uta uba bet shibun ki symbai un ïoh ot ruh shibun.

⁷ Uwei pa uwei u dei ban ai, namarkata, kumba phi la kut jingmut, ym da kaba bynñiaw ne da kaba sngew kum ka kamram; naba U Blei u ieit ïa uta uba ai da kaba kmen.

⁸ Bad U Blei u lah ban ai ïa phi palat ban ïa kaba phi donkam, khnang ba phin ïai don baroh kaba phi donkam na ka bynta ïa lade bad kham bun ban ïa kaba donkam na ka bynta ka jingthmu babha baroh.

⁹ Kumba ka Jingthoh Bakhuid ka ong: “U ai sbun mynsiem sha kiba kyrduh; ka jinglehsbun jong u ka neh junom.”

¹⁰ Bad U Blei, uba ai ïa u symbai ban bet bad ïa u kpu ban bam, un pynbiang ïa phi da u symbai baroh ba phi donkam bad un pynlong ïa u ban san bad un pynmih ïa ka jingot kaba khraw na kata ka jinglehsbun jong phi.

¹¹ Un pynriewspah ïa phi borabor kat ban biang ban lehsbun ha ki por baroh, khnang kiba bun kin ainguh ïa U Blei na ka bynta ki jingai jong phi ïa kiba ki la ïohpdiang na ngi.

¹² Na ka bynta kane ka jingshakri kaba phi leh ym ba ka pyndap tang ïa ki jingdonkam jong ki briew jong U Blei, hynrei ka pynshlei ruh ïa ka jingainguh ïa U Blei.

¹³ Bad namar ka jingpynshisha ïa kaba kane ka jingshakri jong phi ka wallam, bun ki ban ai burom ïa U Blei na ka bynta ka jingïaineh jong phi ha ka gospel U Khrist, ïa kaba phi ïaphla, bad ïa ka jinglehsbun jong phi ha kaba ïasam bynta lem bad ki bad uwei pa uwei ruh.

¹⁴ Bad kumta da ka jingsngewieit bajylliew kin duwai na ka bynta jong phi namar kata ka jingaiei kaba kor tam kaba U Blei u la pyn-i ha phi.

¹⁵ To ngin ainguh ïa U Blei na ka bynta ka jingai jong u ka bym lah ban pynshongdor!