2 KORINTH 8 - Khasi CL Bible (BSI)

Ka jingai ki parabangeit

¹ Ko ki parabangeit jong ngi, ngi kwah ïa phi ban tip ïa kaei kaba ka jingaiei U Blei ka la pynpaw ha ki balang ha Makedonia.

² Ki la shah tynjuh palat da ki jingjynjar kiba ki la ïaid lyngba; hynrei ka jingkmen jong ki ka la long kaba khraw haduh katta katta ba ki la long kiba sbun shikatdei eh ha ka jingai jong ki, wat la ki long kiba duk shisha.

³ Nga lah ban pynthikna ïa phi ba ki la ai katba ki lah, bad wat palat ban ïa kaba ki lah.

⁴ Da ka mon sngewbha jong ki hi, ki la kyrpad ïa ngi bad ïasaid na ka bynta ka lad ban ïadon bynta ha kaba ïarap ïa ki briew jong U Blei ha Judia.

⁵ Ka la long palat ban ïa kaba ngi la khmih lynti! Nyngkong ki la aiti ïa lade ha U Trai; bad nangta, da ka mon U Blei ki la aiti ïa lade ha ngi ruh.

⁶ Kumta ngi la kyntu ïa u Titos, uba la sdang ïa kane ka kam, ban bteng ïa ka bad ban ïarap ïa phi ban pyndep ïa kane ka jingshakri bakyrpang jong ka jingieit.

⁷ Phi long kiba riewspah katta katta ha baroh kiba phi don: Ha ka jingngeit, ka jingkren, bad ka jingtip, ha ka jingangnud ban ïarap bad ha ka jingieit jong phi ïa ngi. Bad kumta ngi kwah ïa phi ban long kiba sbun ruh ha kane ka jingshakri jong ka jingieit.

⁸ Ngam buh ïa kino kino ki aiñ. Hynrei da kaba pyn-i kumno kiwei ki kloi ban ïarap, nga pyrshang ban wad katno ka jingieit jong phi hi ka long kaba shisha.

⁹ Phi tip ïa ka jingaiei U Jisu Khrist uba U Trai jong ngi; la u la long uba riewspah, u la pynlong ïa lade uba duk na ka bynta jong phi, khnang ban ïoh pynriewspah ïa phi da kata ka jinglong duk jong u.

¹⁰ Ka jingai jingmut jong nga ka long ba ka kham bha ïa phi ban pyndep mynta ïa kaei kaba phi la sdang mynshem snem. Phi la long kiba nyngkong, ym tang ban trei ïa ka kam, hynrei ban long ruh kiba la kloi ban leh ïa ka.

¹¹ To ïai trei, te, bad pyndep ïa ka kam! To long kiba thrang ban pyndep ïa ka kumba phi la long ha kaba thmu ïa ka, bad to leh ïa ka da kaei kaba phi don mynta.

¹² Lada phi thrang ban ai, U Blei un pdiang ïa ka jingai jong phi ha ka nongrim jong kaei kaba phi dei ban ai, ym halor kaei kaba phim don.

^13-14 Ngam pyrshang ban pynsting ïa kiwei da kaba buh ïa ka jingkit kaba khia halor jong phi; hynrei namar ba phi don kyrhai ha kane ka por, kaba long kaba biang ba phi dei ban ïarap ïa kito kiba kyrduh. Te, haba phi kyrduh bad ma ki pat ki don kyrhai, kin ïarap ïa phi. Ha kane ka rukom yn ïoh ñiew mar ryngkat ïa phi bad ïa ki.

¹⁵ Kumba ka Jingthoh Bakhuid ka ong, “Uta uba la lum shibun um shym la don tam keiñ, bad uta uba la lum khyndiat um shym ïoh duna palat.”

U Titos bad ki para ba-ïatrei lem

¹⁶ Katno ngi ainguh ïa U Blei ba u la pynlong ïa u Titos ban thrang kum ma ngi ban ïarap ïa phi.

¹⁷ Ym dei tang ba u la pdiang sngewbha ïa ka jingkyrpad jong ngi; u la thrang palat ban ïarap ïa kata da la ka mon sngewbha hi u la rai ban wan sha phi.

¹⁸ Lem bad u ngi phah ïa u parabangeit ïa uba la ñiewburom bha ha baroh ki balang na ka bynta ka jingtrei jong u ha kaba ïalap ïa ka gospel.

¹⁹ Bad nalor kata, ïa u la jied bad la thung da ki balang ban leit bad ngi katba ngi dang ïai pyndep ïa kane ka jingshakri jong ka jingieit na ka bynta ka burom U Trai, bad khnang ban pyn-i ba ngi kwah ban ïarap.

²⁰ Ngi da sumar ba yn ym shah kynnoh ha ki jingmudui ïa ka rukom pynïaid ïa kane ka jingai sbun mynsiem.

²¹ Ka jingthmu jong ngi ka long ban leh ïa kaba dei, ym tang ha khmat U Trai, hynrei ha khmat u briew ruh.

²² Kumta ngi phah ïa u parabangeit jong ngi lem bad ki; ngi la tynjuh ïa u bunsien bad ngi la shem ïa u ba u long borabor uba thrang ban ïarap. Bad mynta ba u la don haduh katta ïa ka jingshaniah ïa phi, u nang kham thrang shuh shuh ban ïarap.

²³ Shaphang u Titos, u long u nongïatrei lang bad nga bad u ïatrei bad nga ban ïarap ïa phi; bad shaphang kiwei pat ki parabangeit kiba ïaleit lang bad u, ki mihkhmat ïa ki balang bad ki wallam ka burom ïa U Khrist.

²⁴ To pyn-i ïa ka jingieit jong phi ïa ki, khnang ba ki balang baroh kin sngewskhem ïa kata bad kin tip ba ngim shym bakla ha kaba ngi kob sarong shaphang jong phi.