2 KORINTH 7 - Khasi CL Bible (BSI)

¹ Ïa kine ki jingkular baroh la pynlong na ka bynta jong ngi, ko ki paralok ba-ieit jong nga. Te namarkata, to ngin pynkhuid ïa lade na kaei kaei baroh kaba pyntngit ïa ka met bad mynsiem, bad to ai ba ngin im ka jingim kaba khuid da kaba im ha ka jingtiengburom ïa U Blei.

Ka jingkmen u Paul

² To pdiang ïa ngi ha ki dohnud jong phi. Ngim shym la leh bymdei ïano ïano; ngim shym la pynjot ïano ïano, lymne ngim shym la pyrshang ban shim kabu ïano ïano.

³ Ngam shym ong ïa kane ïa ka ban pynrem ïa phi; naba kumba nga la ong mynshuwa, phi long kiba ngi ieit eh ba ngi ïalong lang borabor, lada ngi im lane ngi ïap.

⁴ Nga sngewthikna katta katta ïa phi; nga sngewsarong na ka bynta jong phi! Ha ki jingjynjar jong ngi baroh nga dang dap hi da ka jingshlur; nga shlei da ka jingkmen.

⁵ Wat hadien ba ngi la poi ha Makedonia, ngim shym la ïoh shongthait. Ki la don ki jingjynjar ha kylleng sawdong, ki jingïakajia bad kiwei pat, ki jingsheptieng ha ki dohnud jong ngi.

⁶ Hynrei U Blei, uba pynshlur ïa kita kiba la duh jingkyrmen, u la pynshlur ïa ngi da ka jingwan u Titos.

⁷ Kam shym la long tang ka jingwan jong u kaba la ai mynsiem ïa ngi, hynrei ruh da ka jingïathuh jong u ba kumno phi la pynshlur ïa u. U la ïathuh ïa ngi haduh katno ba phi kwah ban wan ïohi ïa nga, katno phi sngewsih, katno phi la kloi ban ïada ïa nga; bad kumta nga la nang kham kmen mynta.

⁸ Naba wat lada kata ka shithi jong nga ka la pynsngewsih ïa phi, nga te ngam sngewsih ba nga la thoh ïa ka. Ngan jin da la sngewsih haba nga la ïohi ba ka la pynsngewsih ïa phi shipor.

⁹ Hynrei mynta nga kmen — ym namar ba nga la pynsngewsih ïa phi, hynrei namar ba ka jingsngewsih jong phi ka la pynlong ïa phi ban kylla-kaba-mut. Ïa kata ka jingsngewsih la pyndonkam da U Blei, bad kumta ngim shym la pynmong ei ei ïa phi.

¹⁰ Naba ka jingsngewsih ïa kaba la pyndonkam da U Blei ka wanrah ïa ka jingkylla ha ka dohnud kaba ïalam sha ka jingpynim — bad kam don ka jingbabe ha kata! Hynrei ka jingsngewsih ba kynja briew ka ïalam sha ka jingïap.

¹¹ Phi ïohi aïu U Blei u la leh lyngba kane ka jingsngewsih jong phi: Katno ka la pynlong smat ïa phi. Katno phi kwah ban pynshisha ïa ka jinglong balui lui jong phi! Kaba haduh katno ka jingsngew bitar, ka jingpeit pyrman halor kaba la jia, bad phi la sngew ka jingsngew, ka jingaiti, ka jinglong ba la kloi ban pynshitom ïa ka jingleh bakla! Phi la pynpaw ïa lade kiba khlem bakla ha kane ka kam baroh.

¹² Kumta, wat la nga la thoh ïa kato ka shithi, ka la long ym namar jong uta uba la leh bymdei lane na ka bynta uta uba la shah leh bymdei. Pynban, nga la thoh ïa ka khnang ban pynshai ha phi, ha khmat jong U Blei, katno ka long da shisha kaba jylliew ka jingaiti jong phi sha ngi.

¹³ Dei na kata ka daw balei ba la pynshlur ïa ngi. Ym tang ba la pynshlur ïa ngi; haduh katno u Titos u la pynkmen ïa ngi da ka jingkmen jong u halor ka rukom kaba phi baroh phi la ïarap ban pynkmen ïa u!

¹⁴ Nga la kob sarong shaphang jong phi ha u, bad phim shym pynduh jingkyrmen ïa nga. Ngi la kren borabor ïa ka jingshisha ha phi, bad ha kajuh ka rukom ka jingkob sarong kaba ngi la ong ha u Titos la ka long kaba shisha.

¹⁵ Bad kumta ka jingieit jong u ïa phi ka nang khraw, kumba u kynmaw kumno phi baroh phi la kloi ban kohnguh ïa ki jingbthah jong u, kumno phi la pdiang sngewbha ïa u da ka jingsheptieng bad ka jingkyiuh.

¹⁶ Katno nga kmen ba nga lah ban shaniah ha phi nadong shadong!