2 KORINTH 6 - Khasi CL Bible (BSI)

¹ Ha ka jingtrei jong ngi lem bad U Blei, namarkata, ngi kyrpad ïa phi kiba la ïohpdiang ïa ka jingaiei U Blei ban ym pynlehnoh-ei ïa ka.

² Ha sngap aïu U Blei u ong: “Haba ka por ka la poi ïa nga ban pyn-i ïa ka jingshem sngewbha ha phi, nga la ïohsngew ïa phi; haba ka sngi ka la poi ïa nga ban pynim ïa phi, nga la ïarap ïa phi.” To shahshkor! Kane ka dei ka kynta ban pdiang ïa ka jingshem sngewbha U Blei; Mynta, ka dei ka sngi jong ka jingpynim!

³ Ngim kwah ïano ïano ban wad daw ïa ka jingtrei jong ngi, kumta ngi pyrshang ban ym buh ïa ki jingjynthut ha ka lynti jongno jongno.

⁴ Pynban, ha kiei kiei baroh kiba ngi leh ngi pyn-i ba ngi long ki shakri U Blei da kaba ïaishah slem ha ki jingjynjar, ki jingeh, bad ki jingshitom.

⁵ La sympat ïa ngi, la set byndi, bad la shah ktah kti ha u paidbhur; ngi la trei palat bad ngi la duh thiah ne duh bam.

⁶ Da ka jinglong sngur jong ngi, ka jingtip, jingïaishah, bad jingsbun ngi la pyn-i ïa lade ba ngi long ki shakri U Blei — da U Mynsiem Bakhuid, da ka jingieit bashisha jong ngi, da ka khubor jong ka jingshisha jong ngi, bad da ka bor U Blei.

⁷ Ngi don ïa ka hok kum ka atiar jong ngi, ïa ka ban ïaleh bad ban ïada ïa lade ruh.

⁸ Ïa ngi la pyndonburom bad la pynlehrain; la krenbeiñ bad la ïaroh. La ñiew ïa ngi kum ki nongshukor, pynban ngi kren ïa ka jingshisha;

⁹ kumba ym don ba la ithuh, pynban la ithuh ïa ngi da baroh; la kum kiba la ïap, hynrei, kumba phi ïohi, ngi dang ïai im.

¹⁰ Wat haba la pynshitom, ym shym la pynïap; wat haba la pynsngewsih, ngi long borabor kiba kmen; ngi paw kum kiba duk, hynrei ngi pynriewspah ïa ki briew kiba bun; ngi paw kum ki bym don ei ei, pynban ngi don lut ïa kiei kiei baroh.

¹¹ Ko ki paralok ba-ieit ha Korinth! Ngi la kren da kaba shai kdar ha phi; ngi la plie ïar ïa la ki dohnud.

¹² Ym dei ma ngi kiba la khang khop ïa la ki dohnud sha phi; dei ma phi kiba khang khop ïa la ki dohnud sha ngi.

¹³ Nga kren mynta kum ïa la ki jong ki khun: To pyn-i ha ngi ïa kijuh ki jingsngew kiba ngi don na ka bynta jong phi. To plie ïar ïa ki dohnud jong phi!

Ka jingmaham pyrshah ïa ka jingringpah da ki bymngeit

¹⁴ Wat pyrshang ban ïatreilang ryngkat bad ki bymngeit, naba kam lah ban long. Kumno kaba dei bad kaba bakla kin ïadon bynta lang? Kumno ka jingshai bad ka jingdum kin ïasah lang?

¹⁵ Kumno U Khrist bad u Ksuid kin ïahap jingmut? Kumno uba ngeit u don bynta bad u bymngeit?

¹⁶ Kumno ka templ jong U Blei kan don jingïateh bad ki bleithaw? Naba ngi long ka templ jong U Blei uba im! Kumba U Blei da lade hi u la ong, “Ngan pynlong ïa ka ïing jong nga bad ki briew jong nga bad ngan shong hapdeng jong ki; ngan long U Blei jong ki, bad kin long ki briew jong nga.”

¹⁷ Bad kumta U Trai u ong, “Phi dei ban iehnoh ïa ki bad pynïakhlad ïa lade na ki. Wat ïadon bynta bad kaei kaei ka bymkhuid, bad ngan pdiang ïa phi.

¹⁸ Ngan long U Kpa jong phi, bad phin long ki khun shynrang bad ki khun kynthei jong nga, ong U Trai Badonbor Baroh.”