2 KORINTH 5 - Khasi CL Bible (BSI)

¹ Naba ngi tip ba haba kane ka ïingjaiñ kaba ngi shong — ka met jong ngi hangne ha pyrthei — ka la jot noh, U Blei un buh ha bneng ïa ka ïing na ka bynta jong ngi ba ngin shong, ka ïing kaba ma u hi u la thaw, ka ban neh junom la junom.

^2-3 Bad mynta ngi ïa-ud, kaba khraw ka long ka jingkwah hir hir jong ngi ba ïa kata ka ïing kaba wan na bneng dei ban pynkup halor jong ngi; ba haba la pynkup da ka, ngin ym long shuh kiba khlem ka met.

⁴ Katba ngi dang shong ha kane ka ïingjaiñ kaba na kane ka khyndew, ngi ud sat da ka jingsngew ba shah banbeiñ; kam dei ba ngi kwah ban lait noh na ka met kaba na ka khyndew, hynrei ba ngi kwah ban ïoh noh ban phong da kata kaba kynja bneng, khnang ba ïa kata kaba ïap yn ïoh pynkylla dur noh da kaba im.

⁵ U Blei u long uta uba la pynkhreh ïa ngi na ka bynta kane ka jingpynkylla dur, bad u la ai ha ngi ïa U Mynsiem jong u kum ka jingbahkhlieh ïa kata baroh kaba u la buh tyngkai na ka bynta jong ngi.

⁶ Kumta ngi long borabor kiba dap da ka jingshlur. Ngi tip ba katba ngi dang don ha kane ka met ngi don jngai na ka ïing ka jong U Trai.

⁷ Naba ka jingim jong ngi ka long da ka jingngeit, ym da ka jingïohi.

⁸ Ngi dap da ka jingshlur bad ngi kham kwah ban iehnoh ïa kane ka ïing jong ngi ha ka met bad ban ïoh long ha ka ïing bad U Trai.

⁹ Pynban, palat ban ïa kaei kaei baroh, ngi kwah ban pynsngewbha ïa u, la ngi don ha kane ka ïing hangne lane hangtei.

¹⁰ Naba baroh na ngi ngin paw ha khmat U Khrist, ba yn bishar ïa ngi da u. Ngin ïohpdiang ïa kaei kaba ngi dei hok, kat kum kiei kiei baroh kiba ngi la leh, la bha ne la sniew, ha kane ka jingim ha ka met jong ngi.

Ka jingïalong paralok bad U Blei lyngba U Khrist

¹¹ Ngi tip ka mut aïu ban sheptieng ïa U Trai, bad kumta ngi pyrshang ban pynkohnguh ïa kiwei. U Blei u tip lut shaphang jong ngi, bad nga kyrmen ba ha ki dohnud jong phi, phi tip ïa nga kumjuh.

¹² Ngim pyrshang biang ban ïaroh ïa lade ha khmat jong phi; pynban, ngi pyrshang ban ai ha phi ïa ka daw kaba biang ba phin sngewsarong shaphang jong ngi, khnang ba phin lah ban ai jubab sha kito kiba sngewsarong shaphang kata kaba paw shabar jong u briew bad ym ha ka jinglong jingim jong u.

¹³ Hato ngi da lamwir shisha? Ka long na ka bynta U Blei. Lane hato ngi long kiba tipbriew? Te ka long na ka bynta jong phi.

¹⁴ La synshar ïa ngi da ka jingieit U Khrist, mynta ba ngi tip ba uwei u briew u la ïap na ka bynta jong uwei pa uwei, kaba mut ba baroh ki ïoh bynta lang ha ka jingïap jong u.

¹⁵ U la ïap na ka bynta baroh, khnang ba kito kiba im kim dei shuh ban im na ka bynta ïa lade, hynrei tang na ka bynta jong uta uba la ïap bad ba la pynmihpat na ka bynta jong ki.

¹⁶ Namarkata, ngam bishar shuh ïano ïano da ka rukom briew. Wat la shisien ngi la bishar ïa U Khrist kat kum ka rukom briew, ngim leh shuh kumta.

¹⁷ Uno uno ïa uba la pynïasoh ha U Khrist u long u jingthaw uba thymmai; kaba rim ka la leit noh, kaba thymmai ka la wan.

¹⁸ Ïa kane baroh la leh da U Blei, uba lyngba U Khrist u la pynkylla ïa ngi na ki nongshun sha ki paralok jong u bad u la aiti ha ngi ïa ka kamram ban pynlong ïa kiwei ruh ki paralok jong u.

¹⁹ Ka khubor jong ngi ka long ba U Blei u la pynlong paralok ïa u bynriew baroh lyngba U Khrist. U Blei um shym la buh jingkheiñ ïa ki pop jong ki, bad u la ai ha ngi ka khubor kaba ïathuh kumno u pynlong ïa ki, ki paralok jong u.

²⁰ Hangne ngi don, namarkata, da kaba kren na ka bynta U Khrist, la kumba U Blei hi da lade u kyrpad lyngba jong ngi. Ngi kyrpad na ka bynta U Khrist: To ai ba U Blei un pynkylla ïa phi na ki nongshun sha ki paralok jong u!

²¹ U Khrist u la long uba khlem pop, hynrei na ka bynta jong ngi U Blei u la pynlong ïa u ban don bynta ha ka pop jong ngi khnang ba haba ngi don ha u ngin lah ban ïoh bynta na ka hok U Blei.