2 KORINTH 4 - Khasi CL Bible (BSI)

Ka jingkynshew ba kynja mynsiem ha ki khiew khyndew

¹ U Blei ha ka jingisynei jong u, u la ai ha ngi ïa kane ka kam ban trei, bad kumta ngim shym la noh mynsiem.

² Ngi buh noh sharud ïa baroh ki kam barieh bad ba pynlehrain; ngim shym leh da ka jingshukor, lymne ngim pynbakla ïa ka ktien jong U Blei. Ha ka jingshai kaba pura jong ka jingshisha, ngi im ha khmat U Blei bad ngi pyrshang ban aiti ïa lade sha ka jingïatiplem babha jong uwei pa uwei.

³ Naba lada la buhrieh ïa ka gospel kaba ngi ïalap, la buhrieh ïa ka tang na kito kiba la jah noh.

⁴ Kim shym la ngeit, namar ba ïa ki jingmut jong ki la kah dum da u blei basniew jong kane ka pyrthei. U khang ïa ki ba kin ïohi ïa ka jingshai kaba tyngshaiñ ha ki, ka jingshai kaba mihnoh na kata ka Khubor Babha shaphang ka burom jong U Khrist, uba long ka dur jong U Blei.

⁵ Naba ym dei ïa lade ba ngi ïalap; ngi ïalap ïa U Jisu Khrist kum U Trai, bad ma ngi kum ki shakri jong phi na ka bynta U Jisu.

⁶ U Blei uba la ong, “Na ka jingdum ka jingshai kan tyngshaiñ!” u long ujuh U Blei uba la pynlong ïa ka jingshai jong u ban tyngshaiñ ha ki dohnud jong ngi, ban wanrah ha ngi ïa ka jingtip shaphang ka burom U Blei kaba tyngshaiñ ha U Khrist.

⁷ Pynban ma ngi kiba don ïa kane ka jingkynshew kaba kynja mynsiem ngi long kum ki khiew khyndew, khnang ban pyn-i ba ka bor kaba halor tam ka long ka jong U Blei, ym ka jong ngi.

^8-9 La pynjynjar ïa ngi bunsien, hynrei ym shym la pynlwet noh; teng teng hapdeng ka jingartatien, hynrei da lei lei ym ha ka jingduh jingkyrmen; don bun ki nongshun, hynrei ngim ju duh paralok; bad wat la ngi jur ka jingmong hateng hateng, ym shym la pynjot noh ïa ngi.

¹⁰ Ha ki por baroh ngi kit halor ki met baïap jong ngi ïa ka jingïap U Jisu, khnang ba ka jingim jong u ruh kan paw ha ki met jong ngi.

¹¹ Ha shi lynter ka jingim, ngi don ha tmier jong ka jingïap na ka bynta U Jisu, khnang ba yn ïohi ïa ka jingim jong u ha kane ka met baïap jong ngi.

¹² Kane ka mut ba ka jingïap ka trei hapoh jong ngi, hynrei, ka jingim ka trei hapoh jong phi.

¹³ Ka jingthoh Bakhuid ka ong, “Nga la kren namar nga la ngeit.” Ha kajuh ka mynsiem jong ka jingngeit ngi ruh ngi kren namar ba ngi ngeit.

¹⁴ Ngi tip ba U Blei, uba la pynmihpat ïa U Trai Jisu na kiba ïap, un pynmihpat ïa ngi ruh lem bad U Jisu bad un ïalam ïa ngi, ryngkat bad phi, sha ka jingdon ryngkat jong u.

¹⁵ Kane baroh ka long na ka bynta jong phi; bad katba ka jingaiei U Blei ka dang kner noh sha kiba bun ki briew, kin ai sha ka burom U Blei kham bun ki jingduwai ainguh.

Kaba im da ka jingngeit

¹⁶ Na kane ka daw ngim ju duh jingkyrmen. Wat la ki met ba kynja doh jong ngi ki la nang pyut noh, pynban, ïa ki met ba kynja mynsiem jong ngi la nang pynthymmai na kawei ka sngi sha kawei ka sngi.

¹⁷ Bad kane ka jingshahshitom kaba khyndiat bad kaba tang shipor kaba ngi shah kan wallam ha ngi ïa ka burom bakhraw bad ba bymjukut, kaba kham khraw palat ban ïa kata ka jingjynjar.

¹⁸ Naba ngi pynleit jingmut, ym ha kiei kiei kiba lah ban ïohi, hynrei ha kiei kiei ki bym lah ban ïohi. Kata kaba lah ban ïohi ka neh tang shipor, hynrei kata ka bym lah ban ïohi ka neh junom.