2 KORINTH 3 - Khasi CL Bible (BSI)

Ki shakri jong ka Jutang kaba Thymmai

¹ Hato kane ka pynpaw kumba ngi pynsarong biang shaphang ïa lade? Hato ka lah ban long ba, kumba long lem kiwei ki briew ruh, ngi donkam ïa ki shithi pynithuh sha phi lane na phi?

² Ma phi hi phi long kata ka shithi ba ngi don, ïa kaba la thoh ha ki dohnud jong ngi khnang ba baroh kin tip bad kin pule.

³ Ka long kaba shai ba U Khrist da lade hi u la thoh ïa kane ka shithi bad u la phah ïa ka da ngi. Naba la thoh, ym da ka sia hynrei da U Mynsiem jong U Blei uba im, bad ym ha ki mawlyngkniap hynrei ha ki dohnud briew keiñ.

⁴ Ngi ong ïa kane namar ngi don ka jingsngewskhem ha U Blei lyngba U Khrist.

⁵ Ym don ei ei ha ngi kaba ngi lah ban dawa ba ngi long kiba bit ban leh ïa kane ka kam. Ka jinglah jong ngi ka wan na U Blei;

⁶ dei ma u, uba pynlah ïa ngi ban shakri ïa ka jutang kaba thymmai, kaba khlem kynthup ïa ka hukum ba la thoh hynrei kaba da U Mynsiem. Ka hukum ba la thoh ka wallam ïa ka jingïap, hynrei U Mynsiem u ai jingim.

⁷ Ïa ka Hukum la oh dur da ki dak halor ki mawlyngkniap, bad ka burom U Blei ka la wan hiar mynba la ai ïa ka. Wat la ka jingtyngshaiñ ha ka durkhmat u Moses ka la sdang ban lip noh, ka la long kaba khlaiñ haduh katta katta ba ki paid Israel kim shym lah ban peit shlip ïa la ki khmat ha u.

⁸ Lada kata ka Hukum, kaba wallam ïa ka jingïap haba la pyntreikam ïa ka, ka la wan ha kat kata ka burom, kaba katno tam ka burom kaba kham khraw ka long kata ka jingtrei jong U Mynsiem!

⁹ Ka rukom pynïaid kaba wanrah ïa ka jingpynrem ka la long kaba donburom; kaba katno tam kaba kham donburom kata ka jingtrei kaba wanrah ïa ka jingpynim!

¹⁰ Ngi lah ban ong ba namar jong kata ka burom kaba kham khraw mynta, kata ka burom kaba la tyngshaiñ bha ha ka por ba la leit, ka la jah noh.

¹¹ Naba lada la don ka burom ha kata kaba la neh tang shipor, kaba haduh katno keiñ ka burom ka don ha kata kaba neh junom!

¹² Namar ba ngi don ïa kane ka jingkyrmen, ngi long kiba shlur bha.

¹³ Ngim long kum u Moses, uba la hap ban buh da ka jingkah ha ka durkhmat jong u khnang ba ki paid Israel kin ym ïohi ba kata ka jingtyngshaiñ ka lip bad jah noh.

¹⁴ Ki jingmut jong ki, da shisha, ki long kiba la set khop; bad haduh kane ka sngi ki jingmut jong ki, ki dang long kiba la tap da kata kajuh ka jingkah haba ki pule ïa ki kitab jong ka jutang barim. Ïa kata ka jingkah, la weng noh tang haba u briew u la pynïasoh ïa lade ha U Khrist.

¹⁵ Wat mynta ruh, man ba pule ïa ka Hukum u Moses, kata ka jingkah ka dang tap hi ïa ki jingmut jong ki.

¹⁶ Hynrei lah ban weng noh ïa ka, kumba ka Jingthoh Bakhuid ka ong shaphang u Moses: “Ïa ka jingkah jong u la weng noh mynba u la phai sha U Trai.”

¹⁷ Mynta, “U Trai” ha kane ka jingthoh u long U Mynsiem; bad hangno haba U Mynsiem jong U Trai u don, hangta ka don ka jinglaitluid.

¹⁸ Te, baroh na ngi, ngi phalang ïa ka burom jong U Trai da ki durkhmat ba khlem tap; bad kata kajuh ka burom, kaba wan na U Trai, uba long U Mynsiem, ka pynkylla dur ïa ngi sha ka jingïasyriem ïa u ha kata ka kyrdan kaba kham khraw jong ka burom.