2 KORINTH 2 - Khasi CL Bible (BSI)

¹ Kumta nga la kut jingmut ban ym wan shuh sha phi ïoh ka pynsngewsih ïa phi.

² Naba lada ka long ba nga pynsngewsih ïa phi, mano pat ban pyntngen ïa nga? Lait tang da kita hi ïa kiba nga la pynsngewsih.

³ Dei na kata ka daw nga la thoh ïa kata ka shithi sha phi — ngam shym kwah ban wan sha phi bad ba yn pynsngewsih da kita hi ki briew kiba la dei ban pynkmen ïa nga. Naba nga sngewdei ba haba nga kmen, te ma phi baroh phi ïakmen lang.

⁴ Nga la thoh sha phi da ka dohnud kaba sngewkhia bad sngewkhuslai ryngkat bad ki ummat kiba bun; ka jingthmu jong nga kam shym long ban pynsngewsih ïa phi, hynrei ban pynsngewthuh ïa phi haduh katno nga ieit ïa phi baroh.

Ka jingmap ïa u nongleh palat

⁵ Mynta, lada don mano mano ba la pynsngewsih ïano ïano, um shym la leh ïa kata ha nga hynrei ha phi baroh — la kumno kumno shi bynta. (Nga ong ïa kane namar ngam kwah ban da leh tyngeh halor jong u.)

⁶ Ka la biang ba ïa une u briew la pynshitom ha kane ka rukom da kiba bun na phi.

⁷ Pynban, mynta, phi dei ban map ïa u bad ban pynshlur ïa u, khnang ban ïada ïa u na kaba sngewsih eh kat ban da kyntait noh shisyndon ïa u.

⁸ Bad kumta nga kyrpad ïa phi ban shah ïa u ban tip ba phi ieit ïa u da shisha.

⁹ Nga la thoh sha phi ïa kato ka shithi namar nga la kwah eh ban tip haduh katno phi la ïeng ha kata ka jingtynjuh bad la phi la kloi borabor ban kohnguh ïa ki jingbthah jong nga.

^10-11 Haba phi map ïano ïano ïa kaei kaba u la leh, nga ruh nga map ïa u kumjuh. Naba haba nga map — lada, shisha, ka dei ïa nga ban map ïa kano kano — nga leh ïa kata ha khmat U Khrist namar jong phi, khnang ban ym shah ïa u Soitan ban leh donbor halor jong ngi; naba ngi tip kiei ki jingthmu jong u ki long.

Ka jingsahnud jong u Paul ha Troas

¹² Haba nga la poi ha Troas ban ïalap ïa ka Khubor Babha shaphang U Khrist, nga la shem ba U Trai u la lah plie ïa ka lynti na ka bynta ka kam hangto.

¹³ Hynrei nga la khuslai jur eh, namar ngam shym ïashem ïa u para jong ngi, u Titos. Kumta nga la kren khatduh ïa ki briew hangto bad nga la leit noh sha Makedonia.

Ka jingjop lyngba U Khrist

¹⁴ Hynrei ki jingnguh ki long sha U Blei! Naba ha U Khrist ngi long borabor kiba la ïalam da U Blei kum ki koidi ha ka jingïaid lynti ka jingjop U Khrist. U Blei u pyndonkam ïa ngi ba kata ka jingtip ïa U Khrist kan saphriang kylleng kum ka jingiwbih.

¹⁵ Naba ngi long kum ka jingiwbih ba la ai da U Khrist sha U Blei, kaba saphriang hapdeng kito kiba la pynim bad kito kiba la jah noh.

¹⁶ Ïa kito kiba jah noh, ka dei ka jingiwtung kaba pynïap; hynrei ha kito kiba la pynim, ka long ka jingiwbih kaba wallam jingim. Uei keiñ, uba lah ban leh ïa kaba kum kata ka kam?

¹⁷ Ngim long kum kita kiba bun, kiba pynlong ïa ka khubor U Blei kum ka mar khaïi kaba tad dor; hynrei namar ba U Blei u la phah ïa ngi, ngi kren da ka jingsngur ha khmat jong u, kum ki shakri U Khrist.