2 KORINTH 13 - Khasi CL Bible (BSI)

Ki jingmaham bakhatduh bad ki jingai khublei

¹ Kane ka long mynta ka sien kaba lai ba nga wan jngoh ïa phi. Kumba ka Jingthoh Bakhuid ka ong, “Ïa kano kano ka jingmudui dei ban pynksan da ka jingpynshisha da ki ar ngut ki sakhi ne tam ïa kata.”

² Nga kwah ban ïathuh ha kito na phi kiba la leh pop ha ki por ba la leit, bad sha baroh kiwei pat; nga la ong ïa kane mynshuwa ha ka jingwan jngoh kaba ar ïa phi, hynrei ngan ong biang mynta ba nga don jngai: Ha kawei ka por ba nga wan yn ym don mano mano ban lait na ka jingshah pynshitom.

³ Phin ïoh ïa ka jingpynshisha baroh kaba phi kwah ba U Khrist u kren ha nga. Haba u pynbeit ïa phi, um long uba tlot, pynban, u pynpaw ïa la ka bor hapdeng jong phi.

⁴ Wat la ka la long ha ka jingtlot ba u la shah pynïap halor ka diengphna, dei da ka bor U Blei ba u im. Ha u ngi ruh ngi long kiba tlot; hynrei ha ki jingïadei jong ngi bad phi ngin ïa-ïoh bynta lem ïa ka bor U Blei ha ka jingim jong u.

⁵ To tynjuh ïa lade bad bishar hi da lade, ban shem la phi im ne em ha ka jingngeit. Hato da shisha phi tip ba U Khrist Jisu u don ha phi? — lymda phi la long kiba la shahjop noh.

⁶ Nga ngeit ba phin ïoh tip ba ngim long kiba la shahjop.

⁷ Ngi duwai ha U Blei ba phin ym leh ïa ka bymdei — ym ban pynpaw ba ngi long kiba la jop, te hynrei ba phin ïoh leh ïa kaba dei, wat la ka i kumba ngi long kiba la shahjop.

⁸ Naba ngim lah ban leh ïa kaei kaei pyrshah ïa ka jingshisha, hynrei tang na ka bynta ka jingshisha.

⁹ Ngi sngewkmen haba ngi long kiba tlot hynrei phi long kiba khlaiñ. Bad kumta ngi duwai ruh ba phin long kiba janai.

¹⁰ Kata ka long balei ba nga thoh ïa kane katba nga dang don jngai na phi; ka long kumta ba haba nga poi ngan ym hap ban leh tyngeh ha kaba pyndonkam ïa ka iktiar ïa kaba U Trai u la ai ha nga — ka bor ïa ka ban tei ïa phi, ym ïa ka ban pynpra.

¹¹ Bad mynta, ko parabangeit jong nga, khublei! To ïabeh sha ka jingjanai; to shahshkor ïa ki jingkyrpad jong nga, to don kajuh ka jingmut para ma phi, to ïa-im ha ka jingsuk. Bad U Blei ka jingieit bad ka jingsuk un long ryngkat bad phi.

¹² To phin ïakhublei paralok da ka jingïadoh parabangeit.

¹³ Ki briew jong U Blei baroh ki phah jingkhublei ïa phi.

¹⁴ Ka jingaiei jong U Jisu Khrist uba U Trai, ka jingieit jong U Blei bad ka jingïasyllok jong U Mynsiem Bakhuid kin long lem bad phi baroh.