2 KORINTH 12 - Khasi CL Bible (BSI)

Ki jingïohipaw bad ki jingpynpaw jong u Paul

¹ Nga dei ban sngewsarong, wat la kam wanrah jingbha ei ei. Hynrei ngan kren mynta shaphang ki jingïohipaw bad ki jingpynpaw ba la ai ha nga da U Trai.

² Nga ithuh ïa u briew uba ngeit ïa uba khatsaw snem mynshuwa la rong noh sha ka bneng kaba jrong tam (ngam tip la kane ka da jia shisha ne u la ïoh ïa ka jingïohipaw — tang U Blei uba tip).

^3-4 Nga ong biang, nga tip ba ïa une u briew la rong noh sha ka Paradais (sa shisien, ngam tip la kane ka da jia shisha ne ka la long tang ka jingïohipaw — tang U Blei uba tip), bad hangta u la ïohsngew ïa kiei kiei ïa kiba ym lah ban buh ha ki kyntien, kiei kiei kiba ki rmiang shyntur briew kim lah ban kren.

⁵ Kumta ngan sngewsarong shaphang une u briew — hynrei ngan ym kob sarong shaphang ïa lade, lait noh ïa kiei kiei kiba pynpaw haduh katno nga long uba tlot.

⁶ Lada nga la kwah ban sngewsarong, ngan ym jin da la long uba bieit, namar ngan jin da la ïathuh ïa ka jingshisha. Hynrei ngan ym kob sarong, namar ngam kwah mano mano ban don ka jingpyrkhat ba kham halor ïa nga ban ïa kaei kaba u la ïohi ba nga leh lane u la ïohsngew ïa kaba nga ong.

⁷ Hynrei ban pyllait ïa nga na kaba dap da ka jingsarong namar kiei kiei kiba bun kiba phylla ba nga la ïohi, la buh ha nga ïa ka jingpang kaba jur ha ka met, kaba long kum u nonglamktien jong u Soitan ban pynshitom ïa nga bad ban pyllait ïa nga na ka jingsngew sarong.

⁸ Lai sien nga la duwai ha U Trai shaphang kane bad nga la kyrpad ïa u ban weng noh ïa ka.

⁹ Hynrei ka jubab jong u ka la long: “Ka jingaiei jong nga ka long baroh kaba me donkam, naba ka bor jong nga ka khraw tam dei haba me tlot.” Nga kmen eh, namarkata, ban sngewsarong ha ki jingtlot jong nga, khnang ban mad ïa ka jingïada ka bor jong U Khrist halor jong nga.

¹⁰ Nga sngewhun ha ki jingtlot, ki jingkrenbeiñ, ki jingjynjar, ki jingshah pynshitom, bad ki jingeh na ka bynta U Khrist. Naba haba nga tlot, dei hangta ba nga khlaiñ.

Ka jingsngewkhia u Paul ïa ki nong Korinth

¹¹ Nga la leh mynleh kum u bieit — hynrei phi la pynlong ïa nga ban leh kumta. Dei ma phi kiba la dei ban pynpaw ïa ka jingmynjur jong phi ïa nga. Naba wat lada ngam long ei ei, ngam shym duna ei ei na kita ki “apostol” kiba kham kyrpang jong phi.

¹² Ïa ki kambah bad ki kamphylla kiba bun kiba pynshisha ba nga long u apostol la pynpaw hapdeng jong phi da ka jingïaishah bakhraw.

¹³ Kumno la ñiew ba phi kham sniew ban ïa kiwei pat ki balang, lait noh ba ngam shym pynkhuslai ïa phi ban kyrshan pisa ïa nga? Sngewbha map ïa nga na ka bynta kane ka jingleh bymdei!

¹⁴ Kane mynta ka long ka sien kaba lai ba nga la khreh ban wan jngoh ïa phi — bad ngan ym pynlong kino kino ki jingdawa na phi. Dei ïa phi ba nga kwah, ym ïa ka pisa jong phi. La kumno kumno, ki khun kim da dei ban pynbiang na ka bynta la ki kmie ki kpa, hynrei ki kmie ki kpa keiñ ki dei ban pynbiang na ka bynta la ki khun.

¹⁵ Ngan sngewkmen ban pynlut baroh kaba nga don, bad ïa lade ruh, khnang ban ïoh ïarap ïa phi. Hato phin ieit duna ïa nga namar ba nga ieit palat ïa phi?

¹⁶ Phin mynjur, namarkata, ba ngam shym la long ka jingbankhia ïa phi. Hynrei don ki ban ong ba nga la long uba sianti, bad riam ïa phi da ki jingshukor.

¹⁷ Kumno? Hato nga la shim kabu ïa phi lyngba uno uno na ki nonglamktien kiba nga la phah?

¹⁸ Nga la kyrpad ïa u Titos ban leit, bad nga la phah ïa uwei pat u parabangeit bad u. Hato phi lah ban ong ba u Titos u la shim kabu ïa phi? Hato ma u bad ma nga ngim shym la leh na kijuh hi ki jingthmu bad leh ha kajuh ka rukom?

¹⁹ Lehse phi pyrkhat ba baroh shi katta ngi la pyrshang ban ïasaid da ïa lade ha khmat jong phi. Em! Ngi kren kumba U Khrist un jin da la kwah ïa ngi ban kren ha ka jingdon ryngkat U Blei, bad baroh kaba ngi leh, ko paralok ba-ieit, la leh ban ïarap ïa phi.

²⁰ Nga sheptieng ba haba nga poi hangto ngan shem ïa phi kiba pher na kaei kaba nga kwah ïa phi ba phin long bad ba phin shem ïa nga ba nga pher na kaei kaba phi kwah ïa nga ban long. Nga sheptieng ba ïoh ngan shem ïa ka jingïania bad jingbishni, ki jingïabitar bad jingkhwan myntoi, ki jingkrenbeiñ bad jinglorni, ka jingsarong bad jingkynrum kynram.

²¹ Nga sheptieng haba ha kawei ka por ba nga wan, U Blei jong nga un pynjahburom ïa nga ha khmat jong phi, bad ngan ïam na ka bynta kiba bun kiba la leh pop mynshuwa bad ki bym pat shym kylla-kaba-mut na ki kam awria ba ki la leh — ki jingkwah brai bad ki pop awria jong ki.