2 KORINTH 11 - Khasi CL Bible (BSI)

U Paul bad ki apostol Lamler

¹ Nga da kwah ba phin ïaishah bad nga, wat haba nga leh bieit khyndiat. Sngewbha leh kumta!

² Nga don ka jingsngewkhia na ka bynta jong phi, kumba U Blei u sngew; phi long kum ka theisotti basngur ïa kaba nga la kular ha ka jingshongkurim bad tang ïa uwei u briew, U Khrist hi.

³ Nga sheptieng ïoh ïa ki jingmut jong phi yn pynjngut noh bad ba phin iehnoh noh ïa ka jingaiti basngur pura jong phi ha U Khrist — kumba ïa ka Im la shukor da ki buit sianti uta u bseiñ.

⁴ Naba phi la ïaishah da kaba kmen ïa uno uno uba wan ha phi bad ïalap ïa uwei pat U Jisu, ym uta uba ngi la ïalap; bad phi pdiang ïa u mynsiem bad ïa ka gospel kaba pher shibun na U Mynsiem bad ka gospel kaba phi la ïohpdiang na ngi!

⁵ Ngam tharai ba nga long uba khampoh khyndiat ban ïa kito ki riewkyrpang ïa kiba la khot ki “apostol” jong phi!

⁶ Lehse nga long u bym da nang ban kren, hynrei da kaba sngewthikna ym ha ka jingtip; ngi la pynshai ïa kane ha phi man la ka por bad ha ki jingshem baroh.

⁷ Ngam shym la buh dor ei ei ïa phi haba nga la ïalap ïa ka Khubor Babha jong U Blei ha phi; nga la pynrit ïa lade khnang ban kyntiew ïa phi. Hato nga la leh bakla?

⁸ Mynba nga dang trei hapdeng jong phi, la siew ïa nga da kiwei pat ki balang. Kum ban shu ong noh, nga la lute na ki khnang ban ïarap ïa phi.

⁹ Bad ha ka por ba nga la don bad phi, ngam shym la pynkhuslai ïa phi ban ïarap haba nga la donkam pisa; ki parabangeit kiba la wan na Makedonia ki la wanrah sha nga ïa kiei kiei baroh kiba nga la donkam. Kum ha kaba mynshuwa, kumta ruh ha ka lawei: Da lei lei ngan ym bankhia ïa phi!

¹⁰ Da ka jingshisha U Khrist kaba don ha nga, nga kular ba ïa kane ka jingsngew sarong jong nga yn ym pynsngap jar hangno hangno ha Akhaïa baroh kawei.

¹¹ Hato nga ong ïa kane namar ba ngam ieit ïa phi? U Blei u tip ba nga ieit ïa phi!

¹² Ngan ïai leh ïa kaei kaba nga leh mynta, khnang ban khanglad ïa kito kiwei ki “apostol” ba kin ïoh daw ban kob sarong bad ban ong ba ki trei ha kajuh ka rukom kumba ngi trei.

¹³ Kito ki briew kim long ki apostol kiba shisha — ki long ki apostol lamler, kiba shukor shaphang ka jingtrei jong ki bad thawdur ïa lade ban i kum ki apostol bashisha jong U Khrist.

¹⁴ Ngin lyngngoh lei ïa kata? Wat u Soitan hi u lah ban thawdur ïa lade ban paw kum u angel ka jingshai!

¹⁵ Kumta kam long kaei kaei kaba khraw lada ki shakri jong u ki thawdur ïa lade ban i kum ki shakri jong ka hok. Ha kaba khatduh kin ïoh thik kumta ïa kaei kaba ki jingleh jong ki, ki dei hok.

Ka jingshah shitom u Paul kum u apostol

¹⁶ Nga ong pat: wat ai ba uno uno un ñiew ïa nga uba bieit. Hynrei lada phi pyrkhat kumta, la kumno kumno to pdiang ïa nga kum uba bieit, khnang ba ngan don ei ei ban sngewsarong.

¹⁷ Da shisha ïa kaei kaba nga ong mynta kam long kaei kaba U Trai u kwah ïa nga ban ong; ha kane ka kam ban sngewsarong nga kren shisha kum uba bieit.

¹⁸ Hynrei namar don shibun kiba kob sarong na ki daw ba kynja briew, nga ruh ngan leh kumjuh.

¹⁹ Phi hi da lade phi long kiba stad bha, bad kumta phi ïaishah da kaba kmen sngewbha ïa ki bieit.

²⁰ Phi ïaishah ïa uno uno uba hukum ïa phi lane uba shim kabu ïa phi lane uba riam pah lane uba peit poh ïa phi lane uba thab ïa phi ha ka ngab.

²¹ Nga sngewlehrain ban phla ba phim shym la long kiba shlur ban leh ïa kito kiei kiei! Hynrei lada uno uno ud nud ban sngewsarong shaphang kaei kaei — nga kren kum uba bieit — ngan shu long uba shlur.

²² Hato ki long ki Hebru? Nga ruh nga long. Hato ki long ki Israel? Nga ruh nga long. Hato ki long kiba hiarpateng na u Abraham? Nga ruh nga long.

²³ Hato ki long ki shakri U Khrist? Ki sngew ïa nga kum uba lamwir — hynrei nga long u shakri uba kham bha ban ïa kaba ki long! Nga la trei kham shitom palat, nga la don bunsien ha byndi, nga la shah sympat kham bun, bad nga la jan sha ka jingïap kham bunsien.

²⁴ San sien la shoh ïa nga laiphew khyndai thri da ki Jiw; lai sien la sympat ïa nga da ki nong Rom; bad shisien nga la shah lynthem maw.

²⁵ Lai sien nga la shah paitlieng; bad shisien nga la pynlut arphew saw kynta ha duriaw.

²⁶ Ha ki jingleit jong nga kiba bun nga la don ha ka jingma na ki jingshlei um bad na ki nonglute, ha ka jingma na ki para Jiw bad na ki Jentil; ki la don ki jingma ha ki nongbah, ki jingma ha ki ri khlaw, ki jingma ha ki duriaw-bah, bad ki jingma na ki paralok kiba shukor.

²⁷ Nga la thait na ka jingtrei shitom; bunsien ngam ju ïohthiah; nga la thngan bad sliang; bunsien ngam shym la don ka jingbam kaba biang, ka jakarieh, lane khlem jaiñkup.

²⁸ Bad khlem da pynpaw ïa kiwei pat kiei kiei, man ka sngi la ban ïa nga da ka jingsngewkhia na ka bynta ki balang baroh.

²⁹ Haba uno uno u tlot, te nga ruh nga tlot; haba uno uno u hap ha ka pop, la pyndap ïa nga da ka jingkthang mynsiem.

³⁰ Lada nga dei ban sngewsarong, ngan sngewsarong shaphang kiei kiei kiba pyn-i haduh katno nga long uba tlot.

³¹ U Blei bad U Kpa jong U Trai Jisu — long ba la kyrkhu ïa ka kyrteng jong u junom! — u tip ba ngam shym lamler.

³² Haba nga la don ha Damaskos, u lyngskor hapoh u syiem Aretas u la pynap phira ïa ki khyrdop ka nongbah ban kem ïa nga.

³³ Hynrei la pynhiar ïa nga ha ka shang na ka jingkhangïit kaba ha ka kynroh bad la pyllait im ïa nga na u.