2 KORINTH 10 - Khasi CL Bible (BSI)

U Paul u ïasaid da na ka bynta ka jingtrei jong u

¹ Nga u Paul, nga pynlong ka jingkyrpad ïa phi — ïa nga ïa kaba la ong ba nga long uba jemnud bad jai jai haba nga don bad phi, hynrei uba eh haba nga don jngai na phi.

² Da ka jingjemnud bad jingbha U Khrist, nga kyrpad ïa phi ban nym pynbor ïa nga ban long uba eh haba nga wan; naba nga thikna ba nga lah ban leh da kaba eh ïa kito kiba ong ba ngi leh ïa kiei kiei na ki jingthmu ba kynja pyrthei.

³ Ka long kaba shisha ba ngi im ha ka pyrthei, hynrei ngim ïaleh na ki jingthmu ba kynja pyrthei.

⁴ Ki atiar kiba ngi pyndonkam ha ka jingïaleh jong ngi kim long ki atiar jong ka pyrthei hynrei ki atiar kiba donbor jong U Blei, ïa kiba ngi pyndonkam ban pynpra ïa ki kut baskhem.

⁵ Ngi pynïap nia ïa ki jingïatainia ba-thala; ngi pynduh ïa ka jingpynwit basngewmeng baroh ba la pynïeng pyrshah ïa kata ka jingtip U Blei; ngi shim ïa ka jingpyrkhat baroh bad pynkohnguh ïa ka ha U Khrist.

⁶ Bad hadien ba phi la pynshisha ïa ka jinglong baïaineh ba-pura jong phi, ngin kloi ban pynshitom ïa kano kano ka jingleh ka bymïaineh.

⁷ Phi khmih ïa kiei kiei kiba paw shabar. Hato don mano mano hangto uba dawa ne kaba dawa ïa lade ba phi dei jong U Khrist? La kumno kumno, ai ba un pyrkhat biang shaphang ïa lade, namar ngi long ki jong U Khrist, kumba long ma u hi.

⁸ Naba ngam sngewlehrain, wat lada nga la sngewsarong lehse palat shaphang ka bor kaba U Trai u la ai ha ngi — ka bor ban tei ïa phi, ym ban pynjot ïa phi.

⁹ Ngam kwah ba kan paw kumba nga pyrshang ban pynsheptieng ïa phi da ki shithi jong nga.

¹⁰ Don u ban ong, “Ki shithi u Paul ki long kiba pyrkhing bad kiba khia, hynrei haba u don bad ngi markhmat, u long uba tlot, bad ki ktien jong u kim long ei ei!”

¹¹ To ai ba kum uta u briew un sngewthuh ba kam don ka jingïapher hapdeng kaei kaba ngi thoh ha ki shithi jong ngi haba ngi don sha jngai bad ïa kaei kaba ngin leh haba ngi don markhmat bad phi.

¹² Ha ka jingshisha ngin ym nud ban pynïaryngkat ïa lade lane ïanujor ïa lade bad kito kiba pynkiew skong palat ïa lade. Katno kiba mutlop ki long! Ki buh ïa la ki jong ki kyndon ban thew ïa lade, bad ki bishar ïa lade da la ki jong ki jingthew!

¹³ Pynban na ka bynta jong ngi, ki jingkob sarong jong ngi kin ym ïaid palat pud; kan don hapoh u pud jong ka jingtrei kaba U Blei u la buh na ka bynta jong ngi, bad kane ka kynthup ïa ka jingtrei jong ngi hapdeng jong phi.

¹⁴ Bad namar ba phi don hapoh kita ki pud, ngim shym la jam palat ïa ki mynba ngi la wan sha phi, da kaba wanrah ïa ka Khubor Babha shaphang U Khrist.

¹⁵ Kumta ngim leh sarong shaphang ka kam kaba kiwei ki la leh palat shabar u pud ïa uba U Blei u la buh na ka bynta jong ngi. Pynban, ngi kyrmen ba ka jingngeit jong phi ka nang san bad ba ngi lah ban leh ïa ka kam kaba kham khraw hapdeng jong phi, borabor hapoh ki pud ba U Blei u la buh na ka bynta jong ngi.

¹⁶ Te ngi lah ban ïalap ïa ka Khubor Babha ha kiwei pat ki ri jngai na phi bad yn ym donkam ban leh sarong shaphang ka jingtrei ïa kaba la lah leh lypa ha ka lyngkha jong uwei pat u briew.

¹⁷ Hynrei kumba ka Jingthoh Bakhuid ka ong, “Uno uno uba kwah ban sngewsarong u dei ban sngewsarong ïa kaei kaba U Trai u la leh.”

¹⁸ Naba ka long haba U Trai u pyrkhat bha ïa u briew, ba u briew u long uba la pdiang hun, bad ym haba u briew u pyrkhat bha shaphang ïa lade.