2 KORINTH 1 - Khasi CL Bible (BSI)

¹ Na u Paul, u apostol U Khrist Jisu da ka mon U Blei, bad na u Timothi u para jong ngi — Sha ka balang U Blei kaba ha Korinth, bad sha ki briew jong U Blei baroh kiba ha Akhaïa:

² To U Blei uba U Kpa jong ngi bad U Jisu Khrist uba U Trai un ai ha phi ïa ka jingaiei bad ka jingsuk.

U Paul u ainguh ïa U Blei

³ To ngin ai ka jingnguh sha U Blei bad U Kpa jong U Jisu Khrist uba U Trai jong ngi, U Kpa ba-dap da jingisynei, U Blei na uba ka jingïarap baroh ka wan!

⁴ U ïarap ïa ngi ha ki jingjynjar jong ngi baroh, khnang ba ngi lah ban ïarap ïa kiwei kiba don ki jingjynjar babun jait, da kaba pyndonkam ïa kajuh ka lad jingïarap kaba ngi hi ngi la ïohpdiang na U Blei.

⁵ Kumba ngi ïoh bynta na ki jingshah shitom babun jong U Khrist, kumta ruh, lyngba U Khrist, ngi ïoh bynta na kita ki jingïarap bakhraw jong U Blei.

⁶ Lada ngi shahshitom, ka long na ka bynta ka jingïarap bad ka jingpynim jong phi; lada la ïarap ïa ngi, te la ïarap ïa phi ruh bad la ai ïa ka bor ban ïaineh lem da ka jingïaishah ha kita kijuh ki jingshahshitom ba ngi ruh ngi la ïaineh.

⁷ Kumta ba ka jingkyrmen jong ngi sha phi kan ym khih lano lano; ngi tip ba kumba phi ïoh bynta na kita ki jingshahshitom jong ngi, kumjuh ruh phi ïoh bynta lem na kata ka jingïarap kaba ngi ïohpdiang.

⁸ Ngi kwah ban pynkynmaw ïa phi, ko ki parabangeit, ïa kata ka jingjynjar kaba ngi la ïohmad ha ka probins jong ka Asia. Ki jingkit ba la buh halor jong ngi ki la long kiba khraw bad kiba khia kat haduh ba ngi la duh jingkyrmen ban dang im.

⁹ Ngi la sngew kumba la rai pynrem ïa ngi ban ïap. Hynrei kane ka la jia khnang ba ngi dei ban shaniah, ym ha ngi hi, hynrei tang ha U Blei keiñ, uba pynmihpat ïa kiba ïap.

¹⁰ Na kiba kum kita ki jingma bashyrkhei jong ka jingïap u la pynim ïa ngi, bad un pynim ïa ngi; bad ngi la buh ïa ka jingkyrmen jong ngi ha u ba un pynim biang ïa ngi, kumba phi ïarap ïa ngi lyngba ki jingduwai lem jong phi na ka bynta jong ngi.

¹¹ Kumta kan long ba ïa ki jingduwai babun na bynta jong ngi yn sa jubab, bad U Blei un kyrkhu ïa ngi; bad bun kin kyntiew ïa ki sur jingïaroh jong ki sha u ha ka jingainguh na ka bynta jong ngi.

Ka jingkylla ha ki jingthmu jong u Paul

¹² Ngi sngewsarong ba ka jingïatiplem jong ngi ka pynskhem ïa ngi ba ka jingim jong ngi ha kane ka pyrthei, bad khamtam eh ba ki jingïadei jong ngi bad phi, la pynïaid da kata ka jingkhuid bad ka jingsngur kaba na U Blei, da ka bor ka jingaiei U Blei bad ym da ka jingstad briew.

^13-14 Ngi thoh sha phi tang ïa kaba phi lah ban pule bad sngewthuh. Hynrei wat lada phi sngewthuh ïa ngi mynta tang katto katne, nga kyrmen ba phin poi sha kata ka jingsngewthuh kaba pura, khnang ba ha ka Sngi jong U Jisu uba U Trai jong ngi phin ïoh sngewsarong ïa ngi kumba ngi sngewsarong ïa phi.

¹⁵ Nga la sngewthikna bha shaphang kane baroh kumta nga la buh ki jingthmu nyngkong eh ban wan jngoh ïa phi, khnang ba phin ïoh jingkyrkhu ar shah.

¹⁶ Naba nga la thmu ban wan jngoh ïa phi ha ka lynti jong nga sha Makedonia bad kumjuh ynda nga wan phai, khnang ban ïoh jingïarap lem na phi na ka bynta ka jingleit jong nga sha Judia.

¹⁷ Ha kane ka jingthmu, hato nga i kum u bymneh jingmut? Haba nga pynlong ïa ki jingthmu jong nga, hato nga leh ïa ki da ki jingthmu ba khwan myntoi, kum uba la kloi ban ong “Ho-oid, ho-oid” bad “Em, em” ha kajuh ka por?

¹⁸ Kat kumba U Blei u kren ïa ka jingshisha, ka jingkular jong nga ïa phi kam long kaba “Ho-oid” bad kaba “Em.”

¹⁹ Naba U Jisu Khrist, u Khun U Blei, ïa uba la ïalap hapdeng jong phi da u Silas, u Timothi bad da nga hi, um long uta uba “Ho-oid” bad “Em.” Hynrei, u long ma u kaba “Ho-oid” jong U Blei; naba dei ma u, uba long kaba “Ho-oid” ïa ki jingkular U Blei baroh.

²⁰ Dei namar kane lyngba U Jisu Khrist ba ngi ïa-ong “Amen” na ka bynta ka burom U Blei.

²¹ U dei U Blei hi uba pynlong ïa ngi, ryngkat bad phi, ka jingpynthikna ïa ka jingim jong ngi ha U Khrist; u dei U Blei hi da lade uba la pynkyrpang ïa ngi,

²² uba la shon ïa ka shab jong ka jinglong trai halor jong ngi, bad uba la ai ïa U Mynsiem Bakhuid ha ki dohnud jong ngi kum ka jingbahkhlieh ïa kata baroh kaba u la buh tyngkai na ka bynta jong ngi.

²³ Nga ñiew ïa U Blei kum u sakhi jong nga — u tip ïa ka dohnud jong nga! Ka long na ka bynta ban ïada ïa phi ba nga la rai ban ym leit sha Korinth.

²⁴ Ngim shym pyrshang ban pynbor ïa kaei kaba phi dei ban ngeit; ngi tip ba phi ïeng skhem ha ka jingngeit. Pynban, ngi ïatrei lem bad phi na ka bynta ka jingkmen jong phi hi.