2 KHRONIKL 9 - Khasi CL Bible (BSI)

Ka jingwan jngoh ka syiem jong ka Sheba

¹ Ka syiem jong ka Sheba ka bna shaphang ka nam u Solomon, bad ka leit sha Jerusalem ban tynjuh ïa u da ki jingkylli kiba eh. Ka wan ïalam shibun ki nongbud lem bad ki ut kiba kit ki musla, ki mawkordor, bad shibun ka ksiar. Haba ka la ïakynduh ïa u Solomon, ka kylli lut ïa baroh ki jingkylli kat kiba don ha ka jingmut jong ka.

² U jubab ïa ki baroh; ym don kano kano kaba eh than kaba um lah ban batai.

³ Ka syiem jong ka Sheba ka la ïohi ïa ka jingstad u Solomon, bad ka la ïohi ïa ka ïingsyiem ba u la tei.

⁴ Ka la ïohi ïa ka jingbam ba la sam ha ka miej jong u, ki jaka sah ïa ki rangbah synshar jong u, ka jingpynbeit ryntih ïa ki nongtrei ha ka ïingsyiem jong u bad ki jingriam ba ki phong, ki jaiñ jong ki shakri jong u, kiba ap ha ki jingkhawai bad ki jingainguh ba u kñia ha ka Templ. Ka la shu lyngngoh ngaiñ bad sngewphylla.

⁵ Ka ong ha u syiem, “Kaei kaba nga la ïohsngew ha la ka jong ka ri shaphang jong phi bad ka jingstad jong phi, ka long kaba shisha,

⁶ ngam shym la ngeit ïa kaei kaba ki ïathuh ïa nga tad ynda nga la wan bad ïohi da lade hi. Ngam shym pat ïohsngew wat tang shiteng na ka jingstad jong phi. Phi kham stad shuh shuh ban ïa kaba ki briew ki ong.

⁷ Katno ki long kiba donbok ki rangbah kiba shakri ïa phi, kiba don borabor ha khmat jong phi bad kiba ïohlad ban ïohsngew ïa ki kyntien jingstad jong phi!

⁸ Ïaroh ïa U Trai U Blei jong phi! U la pynpaw kaba katno u sngewbha ïa phi da kaba pynlong ïa phi u syiem u ban synshar ha ka kyrteng jong u. Namar ba u ieit ïa ki briew jong u, ki Israel, bad u kwah ban pynneh ïa ki junom, u la pynlong ïa phi u syiem jong ki khnang ban pynneh ïa ka hukum bad ka jingbishar hok.”

⁹ Ka ai sngewbha ïa u syiem Solomon ki jingai kiba ka la wanrah: palat saw hajar kilo ka ksiar bad shikatdei eh ki musla bad ki mawkordor. Ym pat ju don musla kiba bha kum kita kiba ka syiem jong ka Sheba ka la ai ha u syiem Solomon.

¹⁰ (Ki rangbah jong u syiem Hiram bad ki jong u syiem Solomon kiba wan kit ksiar na Ophir, ki wan kit ruh u dieng Kseh-Juniper bad ki mawkordor.

¹¹ U Solomon u pyndonkam ïa uta u dieng ha kaba shna ïa ki mawkyrdon ïa ka Templ bad ïa ka ïingsyiem jong u, bad ha kaba shna ïa ki duitara bad jingtem ksai na ka bynta ki nongput nongtem. Ym pat ju don kum kata ha kaba lah ban ïohi mynshuwa ha ka ri Judah.)

¹² U syiem Solomon u ai ïa ka syiem jong ka Sheba kat ïa kaba ka pan. Kane ka long nalor kaei kaba u la ai markylliang ha ka na ka bynta ki jingai sngewbha kiba ka la wanrah ïa u. Nangta ma ka bad ki nongbud jong ka ki la leit phai sha ka ri Sheba.

Ka spah u syiem Solomon

¹³ Man ka snem u syiem Solomon u ïohpdiang kumba arphew lai hajar kilo ka ksiar,

¹⁴ nalor ki khajna ba la siew da ki nongkhaïi bad ki mahajon. Ki syiem Arabia bad ki lat jong ki jylla Israel ruh ki wanrah ïa u ka rupa bad ka ksiar.

¹⁵ U syiem Solomon u shna arspah tylli ki stieh kiba heh, ïa kawei pa kawei la sop da ka ksiar ba la shoh kaba khia kumba hynriew kilo,

¹⁶ bad laispah tylli ki stieh kiba kham rit, ïa kawei pa kawei la sop da ka ksiar ba la shoh kaba khia kumba lai kilo. U phah buh ïa ki baroh ha ka Kamra Heh jong ka Khlaw Lebanon.

¹⁷ U syiem u phah shna ruh ka khet kaba heh. Shi bynta jong ka la sop da ka bniat hati, bad ïa kaba sah jong ka la sop da ka ksiar kaba nylla.

¹⁸ Don hynriew tylli ki mawkyrdon ban kiew sha ka khet bad ka don ka jingïuhkjat kaba la pyndait ha ka, ba la sop da ka ksiar. Ki don ki jingshan kti ha baroh arliang jong ka khet, bad ka dur u sing ka ïeng ha kawei kawei ka liang.

¹⁹ Khat-ar tylli ki dur sing ki don ha ki mawkyrdon, uwei uwei ha ka tduh jong kawei pa kawei ka kyrdon. Ym pat ju don ka khet kaba kum kane ha kawei pat ka hima.

²⁰ Ïa baroh ki khuri jong u syiem Solomon la shna da ka ksiar, bad baroh ki khiew ki pliang ha ka Kamra heh jong ka Khlaw Lebanon ki long kiba da ka ksiar nylla. Ha ki sngi u Solomon ïa ka rupa ym pat ñiew kaba kordor.

²¹ U don ka kynhun ki liengbah kiba ïaid sha duriaw ryngkat bad ki liengbah jong u syiem Hiram. Shisien lai snem ki lieng jong u ki wan phai, ki da kit ïa ka ksiar, ka rupa, ki bniat hati, ki tngaw, bad ki shrieh.

²² U syiem Solomon u kham riewspah bad kham stad ban ïa uno uno u syiem ha ka pyrthei.

²³ Baroh ki wad jingtip na u ban sngap ïa ka jingstad ba U Blei u la ai ha u.

²⁴ Uwei pa uwei na ki u wanrah ki jingai sngewbha ïa u Solomon — ki tiar kiba da ka rupa bad ka ksiar, ki barandi, ki tiar thma, ki musla, ki kulai, bad ki khashor. Kane ka ïai bteng na kawei ka snem sha kawei pat.

²⁵ U syiem Solomon u don saw hajar tylli ki sem kulai na ka bynta ki kali ïapom bad ki kulai jong u, bad u don khat-ar hajar tylli ki kulai thma. Katto katne na ki u buh ha Jerusalem bad ïa kiba sah u buh ha kiwei pat ki nongbah.

²⁶ U long u nongsynshar uba hakhlieh tam na ki syiem baroh ha ka thain naduh ka wah Ïuphratis haduh ka ri Philistia bad haduh khappud ka Ijipt.

²⁷ Ha ka por jong u, ka rupa ha Jerusalem ka kynrei kum u maw, bad u dieng Kedar u jyllei kum u dieng Sykomore ha trai ki lum Judah.

²⁸ Ïa ki kulai na ka bynta u Solomon la wan kit na Musri bad na kiwei pat ki ri.

Ka jingthoh kyllum shaphang ka jingsynshar u Solomon

²⁹ Ïa kiwei kiwei ki jingïathuh shaphang u Solomon naduh ba sdang haduh ba kut la buh jingthoh ha Ka Histori u Nathan u Nongïathuhlypa, ha Ka Jingïathuhlypa u Ahijah uba na Shiloh, bad ha Ki Jingïohipaw u Iddo u Nongïathuhlypa, kiba ïathuh ruh shaphang ka jingsynshar u Jeroboam u syiem ka Israel.

³⁰ U Solomon u synshar sawphew snem ha Jerusalem ïa ki Israel baroh.

³¹ U la ïap, bad la tep ïa u ha ka Nongbah u Dabid, bad u Rehoboam u khun jong u, u la long syiem ha ka jaka jong u.