2 KHRONIKL 8 - Khasi CL Bible (BSI)

Ki kam kiba u Solomon u la lah ban leh

¹ Ka la shim por arphew snem ïa u Solomon ban tei ïa ka Templ bad ïa ka ïingsyiem jong u.

² U thymmai ruh ïa ki nongbah ba u syiem Hiram u la ai ïa u, bad u phah ïa ki Israel ban shongduh ha ki.

³ U la ïohknieh ïa ka jaka Hamath bad Sobah bad u kerkut ïa ka nongbah Palmyra ha ka ri shyiap.

⁴ U la tei biang ïa ki nongbah baroh ha Hamath kiba long ki jaka buh jingbam.

⁵ U Solomon u la tei biang ïa kine ki nongbah: ka Beth Horon Neng bad ka Beth Horon Rum, (ki nongbah ba la ker kynroh bad ki khyrdop kiba lah ban khang),

⁶ ka nongbah Baalath, baroh ki nongbah ha kiba u kynshew jingbam, bad ki nongbah ha kiba u buh ïa ki kulai bad ki kali ïapom jong u. U pyndep ïa baroh ki jingthmu jong u ban tei ha Jerusalem, ha Lebanon, bad ha kylleng ka jaka kaba u synshar.

^7-8 U Solomon u pyndonkam ha kaba pyntrei jubor ïa baroh ki khun ki ksiew jong ki briew ka Kanaan kiba ki Israel kim shym la pynïap mynba ki knieh ïa ka ri jong ki. Kine ki kynthup ïa ki Hit, ki Amor, ki Peris, ki Hib, bad ki Jebus, kiba ki khun ki ksiew jong ki, ki dang long ki mraw haduh mynta.

⁹ Ïa ki Israel ym shym la pyndonkam ha kaba pyntrei jubor, hynrei ki shakri kum ki shipai, ki rangbah pynïaidkam, ki nongai hukum ïa kali ïapom, bad ki nongshong kulai.

¹⁰ Don arspah sanphew ngut ki rangbah synshar kiba dei peit ïa ki nongtrei ba la pynbor ban trei ïa kiba bunkam tei jingtei.

¹¹ U Solomon u wan ïalam noh ïa la ka tnga, ka khun u syiem Ijipt, na ka Nongbah u Dabid sha ka ïing ba u la tei ïa ka. U ong, “Kam dei ban shong ha ka ïingsyiem jong u Dabid, u syiem ka Israel, namar ha kano kano ka jaka ha kaba ka Synduk ka Jutang ka la don ka long kaba kyntang.”

¹² U Solomon u kñia ïa ki jingainguh ha U Trai ha ka duwan ba u la tei ha khmat ka Templ,

¹³ u la kñia ki jingainguh thang kat kum ka jingdawa jong ka Hukum u Moses na ka bynta kawei pa kawei ka sngi kaba khuid: ki Sabbaton, ki Jingkhawai Niam Bnai Thymmai, bad ki lai tylli ki Jingkhawai Niam kiba man ka snem — ka Jingkhawai Niam U Kpu Bakhlem Thiat, ka Jingkhawai Niam ka Jingot, bad ka Jingkhawai Niam Ki Ïingtrep.

¹⁴ Da kaba bud ïa ki rukom ba la buh da u Dabid u kpa jong u, u buh ryntih ïa ka kam shakri kaba man ka sngi jong ki lyngdoh bad ki Lebi kiba ïarap ïa ki lyngdoh ha ki jingrwai ïaroh bad haba pyndep ïa ki kam jong ki. U buh ryntih ruh ïa ki nongap jingkhang ka Templ da ki kynhun ha kawei pa kawei ka khyrdop, ban pyndep ïa ki kam jong ki kiba man la ka sngi kat kum ki hukum u Dabid, u briew jong U Blei.

¹⁵ Ïa ki jingbthah kiba u Dabid u la ai ha ki lyngdoh bad ki Lebi kiba ïadei bad ki ïing buh tiar bad kiwei kiwei ki kam la bud bniah.

¹⁶ Ha kum kane ka por la pyndep ïa ki kam ki jam u Solomon baroh. Naduh kaba seng ïa ka nongrim jong ka Templ U Trai haduh ka jingpyndep ïa ka, baroh ka kam ka la long kaba jop.

¹⁷ Nangta u Solomon u leit sha Esiongeber bad sha Elath, ki kadlieng harud ka Khmut Duriaw Akaba, ha ri ki Edom.

¹⁸ U syiem Hiram u phah sha u ïa ki liengbah hapoh ka hukum ki rangbah pynïaidkam jong u hi ryngkat bad ba la ñiah da ki maji kiba la mlien bha. Kine ki leit bad ki rangbah pynïaidkam jong u Solomon sha ka ri ki Ophir, bad ki wan kit nangta palat khatsan hajar kilo ka ksiar ïa u syiem Solomon.