2 KHRONIKL 7 - Khasi CL Bible (BSI)

Kaba pynkyntang ïa ka Templ

¹ Haba u syiem Solomon u la dep ban duwai, ka ding ka wan hiar na bneng bad ka thang duh ïa ki jingkñia kiba la ainguh, bad ka jingshai batyngshaiñ jong ka jingdon ryngkat U Trai ka pyndap ïa ka Templ.

² Namar ba ka Templ ka la dap da ka jingshai batyngshaiñ, ki lyngdoh kim shym lah ban rung shapoh.

³ Haba ki paid Israel ki ïohi ïa ka ding ba ka wan hiar na bneng bad ba ka jingshai ka dap ha ka Templ, ki dem khrup ha lynti ba la siang maw, ki da mane ïa U Blei bad ïaroh ïa U namar ka jingbha bad ka jingieit bymjukut jong u.

⁴ Nangta u Solomon bad u paidbah baroh ki kñia ïa ki jingainguh ha U Trai.

⁵ U kñia arphew ar hajar tylli ki masi bad shi lakh arphew hajar tylli ki langbrot kum ki jingainguh ïasyllok. Bad kumta ma u bad uta u paidbah baroh ki pynkyntang ïa ka Templ.

⁶ Ki lyngdoh ki ïeng ha ki jaka ba la pynbeit na ka bynta jong ki; bad ha pyrshah jong ki, ki ïeng ki Lebi, ki da ïaroh ïa U Trai ryngkat bad ki jingput jingtem ba u syiem Dabid u la pynkhreh bad ki ïarwai ïa ka jingrwai, “Ka jingieit jong u ka neh junom!” kumba u Dabid u la bthah ïa ki. Ki lyngdoh ki put ïa ki turoi, katba ki paidbah baroh ki ïa-ïeng.

⁷ U Solomon u pynkyntang ïa ka jaka pdeng jong ka phyllaw, ka jaka kaba ha khmat ka Templ, bad u ai ki jingkñia hangta ba la thang tylli, ki jingainguh bam, bad ïa ka khleiñ na ki jingainguh ïasyllok. U leh ïa kane namar ba ka duwan rnong ba u la thaw ka rit than ïa kine ki jingainguh baroh.

⁸ U Solomon bad baroh ki paid Israel ki la rakhe ïa ka Jingkhawai Niam Ki Ïingtrep hynñiew sngi. La don u paidbah uba bun naduh ka Khim Hamath na shatei haduh ka khappud Ijipt na shathie.

⁹ Ki la pynlut hynñiew sngi ha kaba pynkyntang ïa ka duwan, bad nangta sa hynñiew sngi ha kaba rakhe ïa ka Jingkhawai Niam. Ha ka sngi kaba khatduh ki la pynlong ïa ka jingrakhe pynwai.

¹⁰ Ha ka sngi kaba bud kaba long ka sngi kaba arphew lai jong u bnai uba hynñiew, u Solomon u phah noh ïa ki briew sha la ïing. Ki la kmen ïa baroh ki jingkyrkhu ba U Trai u la ai ha ki briew jong u ki Israel, ha u Dabid bad ha u Solomon.

U Blei u paw biang ha u Solomon

¹¹ Hadien ba u Syiem Solomon u la pyndep ïa ka Templ bad ïa ka ïingsyiem, u da pyndep janai ïa kiei kiei baroh kumba u la buh jingmut ban leh ïa ki,

¹² U Trai u wanpaw ha u Solomon mynmiet. U ong ha u, “Nga la ïohsngew ïa ka jingduwai jong me, bad nga la pdiang ïa kane ka Templ kum ka jaka ha kaba yn ai ïa ki jingkñia ha nga.

¹³ Man ba nga khang ïa u slap ba un ym hap lane phah ïa ki puit ban bam ïa ki jingthung lane phah ïa ka khlam ha ki briew jong nga,

¹⁴ lada ki duwai sha nga bad ki kylla-kaba-mut bad phai noh na ki kam bymman ba ki leh, te ngan shahshkor ïa ki na bneng, ngan map ïa ki pop jong ki, bad ngan pynmanbha biang ïa ka ri jong ki.

¹⁵ Ngan khmih halor kane ka Templ bad ngan kloi ban shahshkor ïa ki jingduwai baroh ba yn pynlong hangne,

¹⁶ namar nga la jied ïa ka bad nga la pynkyntang ïa ka kum ka jaka ha kaba yn mane ïa nga junom. Ngan khmih halor jong ka bad ïada ïa ka ha ki por baroh.

¹⁷ Lada me shakri hok ïa nga kumba leh u Dabid u kpa jong me, da kaba kohnguh ïa ki aiñ jong nga bad leh kat ïa kaba nga hukum ïa me,

¹⁸ ngan bat ïa ka kular kaba nga la pynlong bad u Dabid u kpa jong me mynba nga la ong ha u ba ïa ka Israel yn synshar borabor da ki khun ki ksiew jong u.

¹⁹ Hynrei lada ma me bad ki briew jong me kin ym kohnguh ïa ki aiñ bad ki hukum ïa kiba nga la ai ha phi, bad phi mane ïa kiwei pat ki blei,

²⁰ te ngan weng noh ïa phi na kane ka ri ïa kaba nga la ai ha phi, bad ngan iehnoh ïa kane ka Templ ba nga la pynkyntang kum ka jaka ha kaba yn mane ïa nga. Ki briew kylleng kin krenbeiñ bad ñiewbeiñ ïa ka.

²¹ “Ka Templ ka long mynta kaba ïoh burom shibun, hynrei kat uba ïaid najan jong ka un lyngngoh bad un kylli, ‘Balei ba U Trai u la leh kumne ïa kane ka ri bad ïa kane ka Templ?’

²² Ki briew kin jubab, ‘Dei namar ba ki la iehnoh na U Trai U Blei uba la wan ïalam ïa ki kpa tymmen jong ki na ka ri Ijipt. Ki la ai ïa la ka jingnguh ïa kiwei pat ki blei, bad ki la mane ïa ki. Kata ka long balei ba U Trai u la pynngat ha ki ïa kane ka apot.’ ”