2 KHRONIKL 6 - Khasi CL Bible (BSI)

U Solomon u kren ha ki paidbah

¹ Te u syiem Solomon u la duwai, “A Trai Me la jied ban shong ha ki lyoh bad haba dum tliw tliw.

² Mynta nga la tei ïa ka Templ kaba ishongkhia na ka bynta jong me, ka jaka ba men shong junom la junom.”

³ Baroh ki paid Israel ki ïa-ïeng hangta. U syiem u phai ka khmat sha ki bad u pan ïa ka jingkyrkhu U Blei halor jong ki.

⁴ U ong, “Ïaroh ïa U Trai U Blei ki Israel! U la bat ïa la ka kular ba u la pynlong bad u Dabid u kpa jong nga, mynba u ong ha u,

⁵ ‘Naduh ka por ba nga la wan ïalam ïa ki briew jong nga na Ijipt haduh mynta, ngam shym la jied ïa kano kano ka nongbah ha ri Israel kum ka jaka ban tei ïa ka Templ ha kaba yn mane ïa nga, bad ngam shym la jied ruh ïano ïano ban ïalam ïa ki briew jong nga ki Israel.

⁶ Hynrei mynta nga la jied ïa ka Jerusalem kum ka jaka ha kaba yn mane ïa nga, bad ïa me, Dabid, ban synshar ïa ki briew jong nga.’”

⁷ Bad u Solomon u la ong shuh shuh, “U Dabid u kpa jong nga u la buh jingmut ban tei ïa ka Templ ban mane ïa U Trai, U Blei ki Israel,

⁸ hynrei U Trai u la ong ha u, ‘Me la mut ïa kaba dei haba me kwah ban tei ka Templ ïa nga,

⁹ hynrei men ym ïoh tei ïa ka. U dei u khun jong me, u khun jong me hi, u ban tei ïa ka Templ jong nga.’

¹⁰ “Mynta U Trai u la pyndep ïa la ka kular: Nga la shimti kum u syiem ka Israel ha ka jaka u kpa jong nga, bad nga la tei ïa ka Templ ban mane ïa U Trai U Blei ki Israel.

¹¹ Nga la buh ha ka Templ ïa ka Synduk ka Jutang ha kiba la don ki mawlyngkniap jong ka jutang kaba U Trai u la pynlong bad ki paid Israel.”

Ka jingduwai u Solomon

¹² Nangta ha ka jingïadon lang u paidbah u Solomon u leit bad u ïeng ha khmat ka duwan bad u rah ïa la ki kti ha ka jingduwai.

¹³ (U Solomon u la shna ïa ka rynsan kaba da ka rnong bad u la buh ïa ka hapdeng ka phyllaw. Ka don 2.2 mitar sawdong ka jingheh, bad 1.3 mitar ka kynjang. U kiew ha kane ka rynsan, u dem khohsiew ba baroh kin ïohi ïa u, bad u rah ïa la ki kti sha bneng.)

¹⁴ U duwai, “A Trai, U Blei ki Israel, ym don U Blei uba kum ma me ha ka bneng lane ha ka pyrthei baroh. Me bat ïa la ka jutang bad ki briew jong me bad me pynpaw ïa ka jingieit jong me haba ki im ha ka jingkohnguh ïa me da la ka mynsiem baroh.

¹⁵ Me la bat ïa la ka kular kaba me la pynlong ha u Dabid u kpa jong nga; mynta ka sngi la pyndep ïa kawei pa kawei ka ktien.

¹⁶ Mynta, A Trai, U Blei ki Israel, to men bat ruh ïa ka kular kaba me la pynlong ha u kpa jong nga mynba me ong ïa u ba yn don borabor uwei na ki khun ki ksiew jong u, u ban synshar kum u syiem ka Israel, tang lada ki sumar bha ban kohnguh ïa ka Hukum jong me kumba u la leh.

¹⁷ Te mynta, A Trai, U Blei ki Israel, to ai ba baroh kaba me la kular ha u Dabid u shakri jong me kan urlong.

¹⁸ “Hynrei A Blei me lah ban shong shisha ha ka pyrthei hapdeng ki rangbah bad ki kynthei? Wat ka bneng baroh kawei kam lah ban ngiam ïa me, kumno keiñ kane ka Templ kaba nga la tei kan biang?

¹⁹ A Trai, U Blei jong nga, nga long u shakri jong me. Shahshkor ïa ka jingduwai jong nga bad to ai ïa ki jingkyrpad jong nga ba nga pynlong sha me.

²⁰ To khmih halor kane ka Templ mynsngi bad mynmiet. Me la kular ba kane kan long ka jaka ha kaba yn mane ïa me, kumta to sngew ïa nga haba nga phai khmat sha kane ka Templ bad duwai.

²¹ To sngew ïa ki jingduwai jong nga bad ki jingduwai jong ki briew jong me ki Israel haba ki phai khmat sha kane ka jaka bad duwai. Na ka ïing jong me ha bneng, to sngew ïa ngi bad map ïa ngi.

²² “Haba u briew u shah kynnoh ba u leh palat ïa uwei pat bad la wallam ïa u sha ka duwan ha kane ka Templ ban shim jingsmai ba u long uba lui lui,

²³ A Trai, to shahshkor na bneng bad bishar ïa ki shakri jong me. Pynshitom ïa uba leh palat kumba ka dei ïa u bad pynksan ïa uta uba lui lui.

²⁴ “Haba ki briew jong me ki Israel ki shahjop ha ki nongshun jong ki namar ba ki la leh pop pyrshah ïa me bad nangta ki phai sha me bad wan sha kane ka Templ, da kaba dem rit bad duwai ha me na ka bynta ban ïoh jingmap,

²⁵ to shahshkor ïa ki na bneng. To map ïa ki pop jong ki briew jong me, bad wan ïalam biang ïa ki sha kata ka ri ïa kaba me la ai ha ki bad ha ki kpa tymmen jong ki.

²⁶ “Haba me khang ïa u slap ban hap namar ba ki briew jong me ki la leh pop pyrshah ïa me, bad nangta haba ki kylla-kaba-mut bad phai khmat sha kane ka Templ, da kaba dem rit bad duwai sha me,

²⁷ A Trai, to shahshkor ïa ki na bneng, bad map ïa ka pop jong ki shakri jong me, ki briew jong ka Israel, bad to hikai ïa ki ban leh ïa kaba dei. Te, A Trai to phah ïa u slap ha kane ka ri jong me, ïa kaba me la ai ha la ki jong ki briew kum ka jingïohkynti junom.

²⁸ “Haba don ka 'nemsniew ha ka ri, lane ka jingïapthem, lane haba la pynduh khoit ïa ki jingthung jingtep da ki lyer khluit ne da ki kynhun ki puit lane haba ïa ki briew jong me la wan tur ïaleh da ki nongshun jong ki, lane haba don ka khlam lane ka jingpang hapdeng jong ki, to shahshkor ïa ki jingduwai jong ki.

²⁹ Lada mano mano na ki briew jong me ki Israel da ka jingkhia mynsiem ki rah ïa la ki kti ha ka jingduwai sha kane ka Templ; to shahshkor ïa ki jingduwai jong ki.

³⁰ To shahshkor ïa ki na ka ïing jong me ha bneng bad to map ïa ki. Tang ma Me, me tip ïa ki jingpyrkhat ka dohnud briew. To leh ïa uwei pa uwei u briew kumba ka dei ïa u,

³¹ khnang ba ki briew jong me kin burom bad kohnguh ïa me borabor katba ki dang im ha kane ka ri ïa kaba me la ai ha ki kpa tymmen jong ngi.

³² “Haba u nongwei uba shong basah ha ka ri bajngai u ïohsngew katno me long uba khraw bad uba donbor bad kumno me long uba kloi borabor ban leh ïa kano kano, bad haba u wan ban duwai ha kane ka Templ, to shahshkor ïa ka jingduwai jong u.

³³ Na bneng ha kaba me shong, to sngew ïa u bad leh ïa kaei kaba u kyrpad ïa me ban leh, khnang ba ki jaitbynriew ka pyrthei baroh kin tip bad kohnguh ïa me, kumba ki briew jong me ki Israel ki leh. Te kin tip ba kane ka Templ ïa kaba nga la tei ka dei ka jaka ha kaba yn mane ïa me.

³⁴ “Haba me hukum ïa ki briew jong me ba kin leit sha ka thma pyrshah ïa ki nongshun jong ki bad ki duwai ha me, hangno hangno haba ki don, da kaba phai khmat sha kane ka nongbah ïa kaba me la jied bad sha kane ka Templ ïa kaba nga la tei na ka bynta jong me, to shahshkor ïa ki jingduwai jong ki.

³⁵ To sngew ïa ki na bneng bad to ai ha ki ïa ka jingjop.

³⁶ “Haba ki briew jong me ki leh pop pyrshah ïa me — bad ym don uwei ruh uba khlem leh pop — bad ha la ka jingbitar me shah ïa ki nongshun jong ki ban jop ïa ki bad ban ringmraw ïa ki sha kawei pat ka ri, la kata ka ri ka long sha jngai, to shahshkor ïa ki jingkyrpad ki briew jong me.

³⁷ Lada ha kata ka ri, ki kylla-kaba-mut, bad ki duwai sha me da kaba phla haduh katno ki la leh pop, bad ki la leh bymman, to sngew ïa ki jingkyrpad jong ki A Trai.

³⁸ Lada ha kata ka ri ki kylla-kaba-mut shisha bad ha ka jingsngur mynsiem bad ki duwai sha me da kaba phai khmat sha kane ka ri ïa kaba me la ai ha ki kpa tymmen jong ngi, sha kane ka nongbah ïa kaba me la jied, bad sha kane ka Templ ïa kaba nga la tei na ka bynta jong me, to shahshkor ïa ki jingduwai jong ki.

³⁹ Na ka ïing jong me ha bneng, to sngew ïa ki bad isynei ïa ki bad map ïa baroh ki pop jong ki briew jong me.

⁴⁰ “Mynta, Ko Blei jong nga, khmih ïa ngi, bad shahshkor ïa ki jingduwai kiba ngi buh ha kane ka jaka.

⁴¹ To ïeng mynta, A Trai U Blei, bad ryngkat bad ka Synduk ka Jutang ka dak jong ka bor jong me, to rung sha ka Templ bad to shongduh hangne. To kyrkhu ïa ki lyngdoh jong me ha kaei kaei baroh ba ki leh, bad ai ba ki briew jong me kin kmen namar ka jingbha jong me halor jong ki.

⁴² A Trai U Blei, wat kyntait ïa u Syiem uba me la jied. To kynmaw ïa ka jingieit kaba me don ïa u Dabid u shakri jong me.”