2 KHRONIKL 5 - Khasi CL Bible (BSI)

¹ Haba u syiem Solomon u la pyndep ïa ka jingtrei baroh ha ka Templ, u la buh ha ki kamra buh tiar ha ka Templ ïa kiei kiei baroh kiba u Dabid u kpa jong u, u la pynkyntang sha U Trai — ka rupa, ka ksiar, bad kiwei ki tiar ki tar.

Ïa ka Synduk Ka Jutang la wallam sha ka Templ

² Nangta u syiem Solomon u la phah khot ïa baroh ki nongïalam jong ki jait bad ki kur jong ki Israel ban ïalumlang ha Jerusalem, khnang ban wallam ïa ka Synduk ka Jutang jong U Trai na Seïon, ka nongbah jong u Dabid, sha ka Templ.

³ Baroh ki la ïalumlang ha ka por jong ka Jingkhawai Niam Ki Ïingtrep.

⁴ Haba ki nongïalam baroh ki la ïalumlang, kumta ki Lebi ki rah ïa ka Synduk ka Jutang bad ki bah ïa ka sha ka Templ.

⁵ Ki lyngdoh bad ki Lebi ki pynkynriah noh ruh ïa ka Ïingjaiñ Ka Jingdon Ryngkat U Trai bad ïa ki tiar ki tar jong ka baroh sha ka Templ.

⁶ U Syiem Solomon bad baroh ki paid Israel ki la ïalumlang ha khmat Ka Synduk ka Jutang bad ki kñia bun bah ki langbrot bad ki masi — ki la bun palat bym lah ñiew shuh.

⁷ Nangta ki lyngdoh ki bah ïa ka Synduk ka Jutang jong U Trai sha ka Templ bad ki buh ïa ka ha ka Jaka Kaba Kyntang Tam, ha trai jong ki kherub.

⁸ Ki thapniang jong ki, kiba pyiar shabar ki tap ïa ka Synduk bad ïa ki dieng jingbah jong ka.

⁹ Ïa ki tduh jong ki jingbah lah ban ïohi dano dano kiba ïeng pyrshah ha khmat jong ka Jaka Kaba Kyntang Tam, hynrei ym nawei pat. (Ki jingbah ki dang don hangta mynta.)

¹⁰ Ym don ei ei ruh hapoh ka Synduk ka Jutang lait tang ki ar tylli ki mawlyngkniap kiba u Moses u la buh hangta ha u Lum Sinai, mynba U Trai u pynlong ka jutang bad ki paid Israel katba ki dang wan mihnoh na Ijipt.

Ka burom jong U Trai

^11-14 Baroh ki lyngdoh kiba don, khlem da pynpher na kano ka kynhun ki dei, ki la pynkyntang ïa lade. Bad baroh ki nongtem nongput na ki Lebi — u Asaph, u Heman, bad u Jeduthun, bad baroh ki dkhot jong ki kur jong ki — ki la phong ki jaiñ linen. Ki Lebi ki la ïeng hajan ka liang mihngi jong ka duwan lem bad ki shakuriaw bad ki duitara, bad lem bad ki la don shispah arphew ngut ki lyngdoh kiba put ïa ki turoi. Ïa ki nongrwai la synran ha ka jingpynbang sur da ki turoi, ki shakuriaw, bad kiwei ki tiar jingtem, katba ki dang ïaroh ïa U Trai da kaba rwai: “To ïaroh ïa U Trai, naba u long uba bha, Bad ka jingieit jong u ka neh junom.” Katba ki lyngdoh ki dang ïamih na ka Templ, la pyndap kynsan ïa ka da u lyoh uba phyrnai bad ka jingshai ba-thaba jong ka jingdon ryngkat jong U Trai, bad kim shym lah ban bteng ïa ka jingshakri ha kaba mane.