2 KHRONIKL 4 - Khasi CL Bible (BSI)

Ki tiar ki tar jong ka Templ

¹ U syiem Solomon u la phah shna ïa ka duwan rnong, kaba khyndai mitar sawdong, bad 4.5 mitar ka kynjang.

² U la shna ruh kawei ka pipa bapyllun kaba da ka rnong; kaba 2.2 mitar ka jingjylliew, 4.4 mitar ka jingheh na rmiang ha rmiang, bad 13.2 mitar ka lyngwiar.

³ Ha baroh pyllun jong ka na shabar ka pipa la don ar kyrdan ki jingpynitynnat, kawei halor jong kawei pat. Ki jingpynitynnat ki long ha ka dur jong ki masi dab kiba la saiñ lang kawei bad kata ka pung.

⁴ Ïa ka pung-um la pynshong halor ki ingdong jong ki khat-ar tylli ki masi dab kiba da ka rnong kiba phai khmat shabar, lai tylli ki da phai kawei kawei sha kajuh ka liang.

⁵ Ki krung jong ka pipa ki rben hynñiewphew san milimitar. Ka rmiang jong ka, ka long kum ka rmiang khuri ba la pynkhun shabar kum u syntiew. Ka pung ka ngiam kumba hynriewphew hajar litar ka um.

⁶ Ki thaw ruh shiphew tylli ki dabor, san tylli ki ban buh ha ka bynta bashaphang shathie jong ka Templ bad san tylli ha ka bynta bashaphang shatei. Yn pyndonkam ïa ki ban sait ïa ki bynta jong ki mrad kiba dei ban thang kum ki jingkñia. Ka um ha ka pipa kaba heh ka dei na ka bynta ki lyngdoh ban pyndonkam ban sait jingsait.

^7-8 Ki la thaw shiphew tylli ki jingpynïeng sharak kiba da ka ksiar kat kum ka dur ba la ju don bad shiphew tylli ki miej bad la buh ïa ki ha ka kamra pdeng jong ka Templ, san tylli ki diengpynïeng sharak bad san tylli ki miej ha kawei kawei ka liang. Ki thaw ruh shispah tylli ki pliang ksiar.

⁹ Ki shna ïa ka phyllaw bashapoh na ka bynta ki lyngdoh bad ruh ïa ka phyllaw bashabar. Ïa ki jingkhang ha ki khyrdop hapdeng ki phyllaw la sop da ka rnong.

¹⁰ Ïa ka pipa la buh hajan ka dong bashaphang shathie lam mihngi jong ka Templ.

^11-16 U Huram u la thaw ruh ki khiew, ki siang, bad ki pliang. U la pyndep ban thaw ïa ki tiar baroh kiba u la kular ïa u syiem Solomon ba un shna na ka bynta ka Templ: Ar tylli ki rishot Ar tylli ki khlieh kiba kum ka dur pliang halor jong ki rishot Ka dur ki kynjri ba la thain ha kawei kawei ka khlieh rishot Sawspah tylli ki dur soh Pomkranet rnong ïa kiba la pynbeit ha ki ar laiñ sawdong ïa ka dur jong kawei kawei ka khlieh rishot Shiphew tylli ki kali tan Shiphew tylli ki dabor Ka pipa Khat-ar tylli ki masi dab kiba kyrshan ïa ka pipa Ki khiew, ki siang, bad ki proh U Huram u nongtrei batbit tam u la thaw ïa kine ki tiar baroh na ka rnong ba la pynphyrnai, kumba u syiem Solomon u la hukum, ïa ka ban pyndonkam ha ka Templ jong U Trai.

¹⁷ U syiem u la phah shna ïa ki baroh ha ka jaka saiñ nar kaba hapdeng ka Sukkoth bad ka Seredah ha ka Them Jordan.

¹⁸ Kumta la thaw bun tylli ki tiar ba ym don man mano batip ïa ka jingkhia jong ka rnong ba la pyndonkam.

¹⁹ U syiem Solomon u phah shna ruh ïa ki jingbuh jingsat da ka ksiar na ka bynta ka Templ: Ka duwan bad ki miej na ka bynta u kpu ba la ainguh sha U Blei;

²⁰ ki diengpynïeng sharak bad ki sharak da ka ksiar nylla, kiba dei ban pynmeh ha khmat jong ka Jaka Kaba Kyntang Tam, kat kum ba la thmu lypa;

²¹ ki jingpynitynnat da ki syntiew, ki sharak, bad ki nap;

²² ki jingpynlip sharak, ki pliang, ki jingdiang jingiwbih, bad ki khiew ba pyndonkam ha kaba rah ïa u rnga barhem. Ïa kine ki tiar ki tar baroh la thaw da ka ksiar nylla. Ïa ki jingkhang bashabar jong ka Templ bad ïa ki jingkhang sha ka Jaka Kaba Kyntang Tam la suit da ka ksiar.