2 KHRONIKL 36 - Khasi CL Bible (BSI)

U Joahas u syiem ka Judah

¹ Ki paid Judah ki jied ïa u Joahas u khun jong u Josaïah bad ki pynsleh syiem ïa u ha Jerusalem.

² U Joahas u la don arphew lai snem ka rta mynba u long u syiem ka Judah, bad u synshar lai bnai ha Jerusalem.

³ U Neko u syiem ka Ijipt u kem koidi ïa u bad u pynlong ïa ka Judah ban siew lai hajar sawspah kilo ka rupa bad laiphew saw kilo ka ksiar kum ka khajna.

⁴ U Neko u pynlong ïa u Eliakim u para jong u Joahas kum u syiem ka Judah bad u pynkylla ïa ka kyrteng jong u sha u Jehoïakim. Ïa u Joahas la ïalam sha Ijipt da u Neko.

U Jehoïakim u syiem ka Judah

⁵ U Jehoïakim u la don arphew san snem ka rta mynba u long u syiem ka Judah, bad u la synshar khatwei snem ha Jerusalem. U la leh pop pyrshah ïa U Trai U Blei jong u.

⁶ U Nebukhadnessar u syiem ka Babilonia u tur ïaleh ïa ka Judah, u kem ïa u Jehoïakim, bad u ïalam ïa u sha Babilonia da kaba khum ha ki kynjri.

⁷ U Nebukhadnessar u rah lang katto katne ki jingkynshew jong ka Templ bad u buh ïa ki ha ka ïingsyiem jong u ha Babilon.

⁸ Baroh kiei kiei kiba u Jehoïakim u la leh, kaba kynthup ïa ki jingleh ba-ijli jong u bad ki kam bymman kiba u la leh, la buh jingthoh ha Ka Histori Jong Ki Syiem Ka Israel Bad Ka Judah. U Jehoïakhin u khun jong u, u long syiem ha ka jaka jong u.

U Jehoïakhin u syiem ka Judah

⁹ U Jehoïakhin u la don khatphra snem ka rta mynba u long u syiem ka Judah, bad u la synshar tang lai bnai bad shiphew sngi ha Jerusalem. U ruh u leh pop pyrshah ïa U Trai.

¹⁰ Haba ka pyrem ka la poi, u syiem Nebukhadnessar u ïalam ïa u Jehoïakhin sha Babilon kum u koidi, bad u rah lang ïa ki jingkynshew jong ka Templ. Nangta u Nebukhadnessar u pynlong ïa u Sedekaïah u kñi jong u Jehoïakhin kum u syiem ka Judah bad ka Jerusalem.

U Sedekaïah u syiem ka Judah

¹¹ U Sedekaïah u la don arphew wei snem ka rta mynba u long u syiem ka Judah, bad u la synshar khatwei snem ha Jerusalem.

¹² U la leh pop pyrshah ïa U Trai bad um shym shahshkor da kaba pynrit ïa lade ha u Jeremaïah u nongïathuhlypa, uba kren ïa ka ktien U Trai.

Ka jingkyllon noh ka Jerusalem

¹³ U Sedekaïah u ïaleh pyrshah ïa u Syiem Nebukhadnessar, uba pynbor ïa u bad smai ha ka kyrteng U Blei ba un ïaineh ha u. Da kaba leh mutlop u kyntait ban kylla-kaba-mut bad ban phai pat sha U Trai, U Blei ki Israel.

¹⁴ Nalor kane, ki nongïalam ka Judah, ki lyngdoh, bad ki briew ki bud ïa ka jingleh bymman jong ki jaitbynriew sawdong jong ki ha kaba mane ïa ki bleithaw, bad kumta ki pyntngit ïa ka Templ, ïa kaba U Trai da lade hi u la pynlong kaba kyntang.

¹⁵ U Trai, U Blei ki kpa tymmen jong ki, u ïai phah ïa ki nongïathuhlypa ban maham ïa ki briew jong u, namar ba u kwah ban da ïa ki bad ïa ka templ.

¹⁶ Hynrei ki rkhiebeiñ ïa ki nonglamktien jong U Blei, kim suidñiew ïa ki ktien jong u bad ki rkhiebeiñ ïa ki nongïathuhlypa, ha kaba kut ka jingbitar U Trai pyrshah ïa la ki briew ka long kaba jur katta katta kat ban ym don lad shuh ban lait na ka.

¹⁷ Kumta U Trai u wallam ïa u syiem ka Babilonia bad tur ïaleh ïa ki. U syiem u pynïap ïa ki samla shynrang ka Judah, wat hapoh ka Templ hi. Um don jingsngewsynei ïano ïano, samla ne tymmen, shynrang ne kynthei, uba pang ne uba koit. U Blei u aiti ïa ki baroh ha u.

¹⁸ U syiem ka Babilonia u lute ïa ka Templ, ïa ka ïing jingkynshew ka Templ, bad ka spah jong u syiem bad ki rangbah synshar jong u, bad u kit baroh sha Babilon.

¹⁹ U thang ïa ka Templ bad ïa ka nongbah, lem bad ki ïingsyiem baroh bad ka spah jong ka, bad u pyntwa ïa ka kynroh jong ka nongbah.

²⁰ U ïalam ïa baroh kiba dang lait im sha Babilonia, ha kaba ki shakri ïa u bad ïa kiba hiarpateng na u, kum ki mraw haduh ka por ka jingkhie rasong ka Hima Persia.

²¹ Bad kumta ïa kaei kaba U Trai u la ïathuh mynshuwa lyngba u Jeremaïah u nongïathuhlypa la pyndep: “Ka ri kan sa sah kynjah haduh hynñiewphew snem, ban pynïabiang ïa ka jingshongthait Sabbaton, ïa kaba ym pat shym la rakhe.”

U Syros u hukum ïa ki Jiw ban leit phai pat

²² Ha ka snem kaba nyngkong ba u Syros ka ri Persia u long u patsha. U Trai u pynlong ïa kaei kaba u la ong lyngba u nongïathuhlypa Jeremaïah ban urlong shisha. U pynsngew ha u Syros ban pynmih ïa ka hukum harum bad ban phah ha ka jingthoh ïa ka ban pule jam ha kylleng ka hima jong u:

²³ “Kane ka dei ka hukum jong u Syros, u Patsha ka ri Persia. U Trai, U Blei ka Bneng, u la pynlong ïa nga u nongsynshar halor ka pyrthei baroh kawei bad u la ai ha nga ka jingkitkhlieh ban tei ïa ka templ na ka bynta jong u ha Jerusalem kaba ha Judah. Mynta, ma phi baroh kiba long ki briew jong U Blei, khie leit shata, bad to ai ba U Trai U Blei jong phi un long lem bad phi.”