2 KHRONIKL 35 - Khasi CL Bible (BSI)

U Josaïah u rakhe ïa Ka Jingkhawai Niam Ka Jinglait

¹ U syiem Josaïah u rakhe ïa ka Jingkhawai Niam Ka Jinglait ha Jerusalem ban pyndonburom ïa U Trai; ha ka sngi kaba khatsaw jong u bnai uba nyngkong ki pynïap ïa ki jingri na ka bynta ka Jingkhawai Niam.

² U aiti ha ki lyngdoh ïa ki kamram kiba ki dei ban trei ha ka Templ bad u pynshlur ïa ki ban da lehbha ïa ki.

³ U ai ruh ïa kine ki jingbthah sha ki Lebi, ki nonghikai jong ki Israel, ïa kiba la pynkyntang sha U Trai: “Buh ïa ka Synduk ka Jutang bakyntang ha ka Templ kaba u syiem Solomon, u khun jong u Dabid, u la tei. Phim dei ban rah shuh ïa ka na kawei ka jaka sha kawei pat, hynrei phi dei ban shakri ïa U Trai U Blei jong phi bad ki briew jong u ki Israel.

⁴ Shim ïa ki jaka shong jong phi ha ka Templ shi kur shi kur, kat kum ki jingkitkhlieh ba la aiti ha phi da u syiem Dabid bad u syiem Solomon u khun jong u,

⁵ bad to pynbiang ïa lade khnang ba katto katne na phi phin long kiba la kloi ban ïarap ïa kawei pa kawei ka longïing jong ki paid Israel.

⁶ Phi dei ban pynïap ïa ki langbrot bad ki blang jong ka Jingkhawai Niam Ka Jinglait. Mynta pynlong ïa lade kiba la khuid kat kum ka jinglehniam bad pynkhreh ïa ki jingkñia ba ki para Israel kin ïoh bud ïa ki jingbthah kiba U Trai u la ai ha u Moses.”

⁷ Na ka bynta ka jingpyndonkam ki briew ha ka Jingkhawai Niam Ka Jinglait, u syiem Josaïah u la ai sngewbha na ki kynhun jong ki jingri jong u laiphew hajar tylli ki blang, ki langbrot, bad ki khunblang, bad lai hajar tylli ki masi lyngraw.

⁸ Ki rangbah synshar jong u ruh ki ai sngewbha ïa ki paidbah, ki lyngdoh, bad ki Lebi ba kin pyndonkam. Bad ki rangbah synshar ba dei peit ïa ka Templ — u Hilkaïah, u Rangbah Lyngdoh, u Sekharaïah, bad u Jehiel — ki ai ïa ki lyngdoh ar hajar hynriewspah tylli ki langbrot bad ki khunblang bad laispah tylli ki masi lyngraw na ka bynta ki jingkñia ha ka por ka Jingkhawai Niam.

⁹ Ki rangbah jong ki Lebi — u Konanaïah, u Shemaïah bad u para jong u, u Nethanel, u Hashabaïah, u Jeiel, bad u Josabad — ki ai sngewbha san hajar tylli ki langbrot bad ki khunblang bad sanspah tylli ki masi kyrtong na ka bynta ki Lebi ban ai kum ki jingkñia.

¹⁰ Haba la dep pynbiang ïa kiei kiei baroh na ka bynta ka Jingkhawai Niam Ka Jinglait, ki lyngdoh bad ki Lebi ki shim ïa la ki bynta, kumba la hukum da u syiem.

¹¹ Hadien ba la pynïap ïa ki langbrot bad ki blang, ki Lebi ki khoh snieh ïa ki, bad ki lyngdoh ki synreit snam ha ka duwan.

¹² Nangta ki pynïabynta hapdeng ki briew, kat kum ki kynhun longïing, ïa ki jingri na ka bynta ki jingainguh thang, khnang ba kin lah ban ai ïa ki kat kum ki jingbthah ha ka Hukum u Moses.

¹³ Ki Lebi ki syang ïa ki jingkñia ka Jingkhawai Niam Ka Jinglait ha ka ding, kat kum ki jingbuhbeit ryntih, bad ki syrwa ïa ki jingainguh bakyntang ha ki khiew, ki khiew heh, ki khiew rit, bad kloi lan ki sam ïa ka doh ha ki briew.

¹⁴ Hadien ba la dep ïa kane, ki Lebi ki pynbiang doh na ka bynta ïa lade bad na ka bynta ki lyngdoh kiba hiarpateng na u Aaron, namar ba ki lyngdoh ki bunkam haduh mynmiet, ha kaba thang tylli ïa ki jingri bad ïa ka khleiñ jong ki jingkñia.

¹⁵ Kine ki nongtem nongput harum na ka kur u Asaph jong ki Lebi ki don ha la ki jaka ba la aiti ha ki da ki jingbthah u Syiem Dabid: u Asaph, u Heman, bad u Jeduthun, u nongïathuhlypa jong u syiem. Ki nongap phira ha ki khyrdop ka Templ kim shym donkam ban mihnoh na ki jaka ba ki ap, namar kiwei pat ki Lebi ki pynkhreh ïa ka Jingkhawai Niam Ka Jinglait na ka bynta jong ki.

¹⁶ Te, kumba u syiem Josaïah u la hukum, la leh ïa kiei kiei baroh ha kata ka sngi ban mane ïa U Trai, ban sumar ïa ka Jingkhawai Niam Ka Jinglait, bad ïa ka jingai ïa ki jingainguh thang ha ka duwan.

¹⁷ Haduh hynñiew sngi baroh ki paid Israel kiba don hangta ki rakhe ïa ka Jingkhawai Niam Ka Jinglait bad ka Jingkhawai Niam U Kpu Bakhlem Thiat.

¹⁸ Naduh ki sngi jong u Samuel u nongïathuhlypa, ïa ka Jingkhawai Niam Ka Jinglait ym pat ju rakhe kum kane. Ym don napdeng ki syiem ba-mynshuwa kiba la rakhe ïa ka Jingkhawai Niam Ka Jinglait kum kane ba la rakhe da u Syiem Josaïah, ki lyngdoh, ki Lebi, bad ki paid Judah, Israel, bad Jerusalem

¹⁹ ha ka snem kaba khatphra jong ka jingsynshar u Josaïah.

Kaba kut ka jingsynshar u Josaïah

²⁰ Hadien ba u syiem Josaïah u la leh ïa kane baroh na ka bynta ka Templ, u Neko u syiem ka Ijipt u ïalam ïa ka kynhun shipai ban ïaleh pyrshah ha Karkhemish ha ka wah Ïuphratis. U Josaïah u la pyrshang ban pynsangeh ïa u, hynrei u Neko u phah sha u Josaïah ïa kane ka khubor:

²¹ “Kane ka thma kaba nga ïaleh kam don jingïadei ei ei bad phi, ko syiem ka Judah. Ngam shym la wan ban ïaleh ïa phi, hynrei ban ïaleh ïa ki nongshun jong nga, bad U Blei u la ong ïa nga ban pynstet. U Blei u don ha ka liang jong nga, wat ïeng pyrshah ïa nga, ïoh un pynjot ïa phi.”

²² Hynrei u Josaïah u kut jingmut ban ïaleh. U kyntait ban shahshkor ïa kaei kaba U Blei u la ong lyngba u syiem Neko, kumta u riam pher ïa lade bad u leit sha ka thma ha ka them jong ka Megiddo.

²³ Hapdeng ka thma u Syiem Josaïah u la shah siat da ki khnam u nong Ijipt. U hukum ïa la ki shakri, “Rah noh ïa nga; Nga la mynsaw jur!”

²⁴ Ki sei ïa u na ka kali ïapom jong u, ki buh ïa u ha ka kali ïapom kaba ar kaba u don hangta, bad ki kit ïa u sha Jerusalem. Hangta u la ïap bad la tep ha ka jingtep ki syiem. Baroh ki paid Judah bad Jerusalem ki ïambriew namar ka jingïap jong u.

²⁵ U Jeremaïah u nongïathuhlypa u thaw ïa ka jingrwai pangnud ïa u syiem Josaïah. Ka long ka rukom ha Israel na ka bynta ki nongrwai, kynthei bad shynrang, ban rwai ïa kane ka jingrwai haba ki ïambriew namar jong u. La shem ïa kane ka jingrwai ha ki jingrwai pangnud ba la lumlang.

^26-27 Baroh kiei kiei kiba u Josaïah u la leh — ka jingaiti lut jong u sha U Trai, ka jingkohnguh jong u ïa ka Hukum, bad ïa ka histori jong u naduh kaba sdang haduh kaba kut — la buh jingthoh ha Ka Histori Jong Ki Syiem Ka Israel Bad Ka Judah.