2 KHRONIKL 34 - Khasi CL Bible (BSI)

U Josaïah u syiem ka Judah

¹ U Josaïah u la don phra snem ka rta mynba u long u syiem ka Judah, bad u synshar laiphew wei snem ha Jerusalem.

² U la leh ïa kaei kaba pynsngewbha ïa U Trai; u bud ïa ka nuksa u syiem Dabid u kpa tymmen jong u, da kaba bud thik ïa ki hukum U Blei baroh.

U Josaïah u ïaleh pyrshah ïa ka jingmane blei thala

³ Ha ka snem kaba phra ba u Josaïah u long syiem, haba u dang khynnah bha, u sdang ban mane ïa U Blei jong u syiem Dabid u kpa tymmen jong u. Saw snem hadien u sdang ban pynjot ïa ki jaka mane blei thala, ki dur jong ka blei Asherah, bad baroh kiwei de ki bleithaw.

⁴ Hapoh ka jingbthah jong u ïa ki duwan ha kaba la mane ïa u Baal la pynpra, bad ïa ki duwan jingiwbih hajan jong ki la pyntwa. Ki pynlwet kum ki pui pui ïa ki dur ka Asherah bad ïa kiwei ki bleithaw baroh bad nangta ki bret ïa u pui pui ha ki jingtep jong ki briew kiba la ai jingkñia ïa lade ha ki.

⁵ U thang ïa ki shyieng jong ki lyngdoh ba-thala ha ki duwan ba ki la mane. Da kaba leh ïa kane baroh, u pynlong ïa ka Judah bad ïa ka Jerusalem ba la pynkhuid pat kat kum ka jinglehniam.

⁶ U leh kumjuh ha ki nongbah bad ki jaka ba la ieh kynjah jong ki Manasseh, Ephraim, bad Simeon, bad jngai shaduh shatei haduh Naphtali.

⁷ Ha baroh kawei ka ri jong ka Hima bashatei u pynpra ïa ki duwan bad ki durblei jong ka Asherah, u pynlwet ïa ki bleithaw kum ki pui pui, bad pynpait lyngkhot lyngkhai ïa baroh ki duwan jingiwbih. Nangta u leit phai sha Jerusalem.

La shem ïa ka kitab jong ka Hukum

⁸ Ha ka snem kaba khatphra jong ka jingsynshar jong u, hadien ba u la pynkhuid ïa ka ri bad ïa ka Templ da kaba pynkut noh ïa ka jingmane blei thala, u syiem Josaïah u phah lai ngut ki rangbah ban tei pynbha ïa ka Templ jong U Trai U Blei: u Shaphan u khun jong u Asalaïah, Maaseïah, u lat ka Jerusalem, bad u Joah u khun jong u Joahas, u rangbah synshar ba-halor.

⁹ Ka pisa kaba ki Lebi kiba long ki nongap phira ki la lum ha ka Templ la aiti ha u Hilkaïah u Rangbah Lyngdoh. (La lum ïa ka na ki briew ka Ephraim bad Manasseh bad kaba sah jong ka Hima bashatei, bad na ki paid Judah, Benjamin, bad Jerusalem.)

¹⁰ Nangta ïa kane ka pisa la pynkhamti ha ki lai ngut ki rangbah kiba peit halor ka jingtei pynbha ïa ka Templ,

¹¹ bad ki ai ïa ka ha ki misteri dieng bad ki nongtei ban thied maw bad dieng sawdong ban pyndonkam ha kaba tei pynbha ïa ki ïing kiba ki syiem ka Judah ki la ieh ba kin pyut noh.

¹² Ki rangbah kiba trei ïa ka kam ki long kiba da sngur hok. La peit bniah halor jong ki da ki saw ngut ki Lebi: u Jahath bad u Obadaïah na ka kur Merari, bad u Sekharaïah bad u Meshullam na ka kur Kohath. (Ki Lebi ki dei ki nongtem nongput batbit bha.)

¹³ Kiwei pat ki Lebi ki peit halor ka jingpynkit jingkit bad halor ki nongtrei ha ki kam bapher bapher, bad kiwei ki buh jingkheiñ lane ki shakri kum ki nongap phira.

¹⁴ Katba dang sei ïa ka pisa na ka jaka kynshew, u Hilkaïah u shem ïa ka kitab jong ka Hukum jong U Trai, ka Hukum kaba U Blei u la ai ha u Moses.

¹⁵ U ong ha u Shaphan, “Nga la shem ïa ka kitab jong ka Hukum hangne ha ka Templ.”

¹⁶ U ai ha u Shaphan ïa ka kitab, bad u Shaphan u leit rah sha u syiem. U ïathuh, “Ngi la leh ïa baroh kaba phi la hukum.

¹⁷ Ngi la shim ïa ka pisa kaba la buh ha ka Templ bad ngi la aiti ha ki nongtrei bad ki nongkhmih ba-halor.”

¹⁸ Nangta u pyndap, “Nga don hangne ka kitab kaba u Hilkaïah u la ai ha nga.” Bad u pule jam ïa ka ha u syiem.

¹⁹ Haba u syiem u la ïohsngew ïa ka jingpule na kata ka kitab, u kad ïa la ki jaiñ ha ka jingsngewsih

²⁰ bad u ai ïa kane ka hukum harum ha u Hilkaïah, u Ahikam u khun jong u Shaphan, u Abdon u khun jong u Mikaïah, u Shaphan, u sekretari ka ïingbishar, bad u Asaïah, u nongbud jong u syiem:

²¹ “Khie leit bad kylli na U Trai na ka bynta jong nga bad na ka bynta ki briew kiba dang sah ha Israel bad Judah. Wad bniah shaphang ki jinghikai na kane ka kitab. U Trai u bitar ïa ngi namar ki kpa tymmen jong ngi kim shym la kohnguh ïa ka ktien U Trai bad kim shym la leh ïa kaei kaba kane ka kitab ka ong ban leh.”

²² Kat kum ka hukum jong u syiem, u Hilkaïah bad kiwei ki leit ïasyllok bad ka kynthei kaba kyrteng ka Huldah, ka nongïathuhlypa kaba sah ha ki bynta ba kham thymmai jong ka Jerusalem. (U Shallum u tnga jong ka, u khun jong u Tikbah bad u khun ksiew jong u Harhas, ki long kiba sumar ïa ki jaiñkup ha ka Templ.)

²³ Ki ïathuh ha ka ïa kaei kaba la jia, bad ka ong ïa ki ban leit phai pat sha u syiem bad ban ai ha u ïa kane harum ka khubor na U Trai:

²⁴ “Nga ngan pynshitom ïa ka Jerusalem bad ïa ki briew baroh da ka jingtim ba la thoh ha ka kitab ïa kaba la pule ha khmat u syiem.

²⁵ Ki la kyntait ïa nga bad ki la ai jingkñia ha kiwei ki blei, bad kumta ki la pynkhih ïa ka jingbitar jong nga da baroh kaba ki la leh. Ka jingbitar jong nga ka la khie buk, bad ngan ym pynjah kumto.

²⁶ Na ka bynta u syiem ïa lade hi, kane ka dei kaei kaba ma nga, U Trai U Blei ki Israel, nga ong: To shahshkor ïa kaei kaba la thoh ha kane ka kitab,

²⁷ bad to kylla-kaba-mut bad pynrit ïa lade ha khmat jong nga, da kaba kad ïa la ki jaiñ bad da kaba ïam, haba me ïohsngew kumno nga la byrngem ban pynshitom ïa ka Jerusalem bad ïa ki briew jong ka.

²⁸ Nga la ïohsngew ïa ka jingduwai jong me, bad ïa ka jingpynshitom kaba ngan wanrah ha Jerusalem kan ym wan tad hadien ka jingïap jong me. Ngan ai ba men ïap ha ka jingsuk.” Ki rangbah ki leit phai pat sha u syiem Josaïah ryngkat bad kane ka khubor.

U Josaïah u ïateh jutang ban kohnguh ïa U Trai

²⁹ U syiem Josaïah u phah khot ïa baroh ki nongïalam ka Judah bad Jerusalem,

³⁰ bad ryngkat lang ki leit sha ka Templ, ba la synran da ki lyngdoh bad ki Lebi bad da baroh kiwei ki briew, kiba riewspah bad kiba duk kumjuh. Ha khmat jong ki baroh, u syiem u pule jam ïa ka kitab baroh jong ka jutang, kaba la shem ha ka Templ.

³¹ U ïeng hajan ka jaka ïeng ki syiem bad u pynlong ka jutang bad U Trai ban kohnguh ïa u, ban sumar ïa ki aiñ bad ki hukum jong u da la ka dohnud bad mynsiem baroh, bad ban pyntreikam ïa ki jingdawa ba ïasoh bad ka jutang, kumba la thoh ha ka kitab.

³² U pynlong ïa ki paid Benjamin bad uwei pa uwei uba don ha Jerusalem ban kular ban sumar ïa ka jutang. Bad kumta ki briew jong ka Jerusalem ki kohnguh ïa ki jingdawa ka jutang kiba ki la pynlong bad U Blei jong ki kpa tymmen jong ki.

³³ U syiem Josaïah u pynjot ïa baroh ki bleithaw ba-ijli kiba don ha ka ri kaba dei jong ki paid Israel, bad katba u dang im, u dawa ba ki briew kin shakri ïa U Trai, U Blei jong ki kpa tymmen jong ki.