2 KHRONIKL 33 - Khasi CL Bible (BSI)

U Manasseh u syiem ka Judah

¹ U Manasseh u la don khat-ar snem ka rta mynba u la long u syiem ka Judah, bad u synshar ha Jerusalem sanphew san snem.

² Da kaba bud ïa ki jingleh ba-ijli jong ki hima kiba U Trai u la beh noh na ka ri katba ki briew jong u ki dang tur shaphrang, u Manasseh u la leh pop pyrshah ïa U Trai.

³ U tei pat ïa ki jaka mane blei thala kiba u Hesekaïah u kpa jong u, u la pynjot. U tei ki duwan ban mane ïa u Baal, u thaw ki dur jong ka bleithaw Asherah, bad u mane ïa ki khlur.

⁴ U tei ki duwan ki blei thala ha ka Templ, ka jaka ha kaba U Trai u la ong ba yn mane ïa u junom.

⁵ Ha ki ar tylli ki phyllaw jong ka Templ, u tei ïa ki duwan na ka bynta ka jingmane ïa ki khlur.

⁶ U kñia ïa la ki khun shynrang ha ka Them Hinnom kum ki jingainguh thang. U leh ïa ki jingkhan bad ki jingleh myntor bad u wad jingmut na ki nongbatai kupar bad ki nongleh byrtong. U leh pop palat pyrshah ïa U Trai bad u pynkhih ïa ka jingbitar jong U.

⁷ U buh ïa ka durblei ha ka Templ, ka jaka ha kaba U Blei u la ong ha u Dabid bad ha u Solomon u khun jong u: “Hangne ha Jerusalem, ha kane ka Templ, ka long ka jaka ïa kaba nga la jied na baroh kawei ka ri jong ki khat-ar jait ki Israel kum ka jaka ha kaba yn mane ïa nga.

⁸ Bad lada ki paid Israel kin kohnguh ïa ki hukum jong nga baroh, bad sumar ïa ka Hukum baroh kaba u Moses u shakri jong nga u la ai ïa ki, te ngan ym shah ban beh noh ïa ki na ka ri kaba nga la ai ha ki kpa tymmen jong ki.”

⁹ U Manasseh u ïalam ïa ki paid Judah ban leh ïa ki pop kiba kham khraw ban ïa kito kiba ki jaitbynriew kiba U Trai u la beh noh na ka ri katba ki briew jong u ki dang tur shaphrang.

U Manasseh u kylla-kaba-mut

¹⁰ Wat la U Trai u la maham ïa u Manasseh bad ïa ki briew jong u, ki kyntait ban shahshkor.

¹¹ Kumta U Trai u shah ïa ki rangbah shipai jong ka kynhun shipai Assyria ban tur ïaleh ïa ka Judah. Ki la kem ïa u Manasseh, ki pyndait jingbnoh ha u, ki teh ki kynjri ïa u, bad ïalam ïa u sha Babilon.

¹² Ha ka jingshitom jong u, u la pynrit ïa lade, u phai sha U Trai U Blei jong u, bad u kyrpad ïa ka jingïarap jong u.

¹³ U Blei u pdiang ïa ka jingduwai u Manasseh bad jubab ïa ka da kaba pynlah ïa u ban leit phai sha Jerusalem bad synshar pat. Kane ka pynskhem ïa u Manasseh ba U Trai u long U Blei.

¹⁴ Hadien kane, u Manasseh u tei pynjrong ïa ka kynroh bashabar ha ka phang mihngi jong ka Nongbah u Dabid, na ka tduh jong ka them hajan ka umpohliew Gihon shaphang shatei sha ka Khyrdop Dohkha bad ka jaka jong ka nongbah ba khot ka Ophel. U buh ruh ïa u shipai pynïaidkam ban ai hukum ïa ka kynhun ki shipai ha man ki nongbah ba la ker kynroh jong ka Judah.

¹⁵ U pynkynriah na ka Templ ïa ki blei nongwei bad ïa ka durblei kaba u la buh hangta, bad ki duwan ki blei thala kiba la don halor u lum ha kaba ka Templ ka la ïeng bad ha kiwei ki jaka ha Jerusalem; u kit lut ïa kine kiei kiei shabar ka nongbah bad u bret lut ïa ki.

¹⁶ U tei pynbha ïa ka duwan ha kaba ïa U Trai la mane, bad u kñia ïa ki jingainguh ïasyllok bad ki jingainguh thang ha ka. U hukum ïa ki paid Judah baroh ban mane ïa U Trai, U Blei ki Israel.

¹⁷ Wat la ki paidbah ki ïai bteng ban ai jingainguh thang ha kiwei ki jaka mane, ki ainguh ïa ki tang sha U Trai.

Kaba kut ka jingsynshar u Manasseh

¹⁸ Kiei kiei baroh kiba u Manasseh u la leh, ka jingduwai ba u pynlong sha U Blei, bad ki khubor jong ki nongïathuhlypa kiba la kren ha u ha ka kyrteng jong U Trai, U Blei ki Israel, la buh jingthoh ha Ka Histori Jong Ki Syiem Ka Israel.

¹⁹ Ka jingduwai u syiem bad ka jingjubab U Blei ïa ka, bad ka jingthoh shaphang ki pop kiba u la leh ha shuwa ba un kylla-kaba-mut — ka jingsniew kaba u la leh, ki jaka mane blei thala bad ki durblei jong ka blei Asherah kaba u la thaw bad ki bleithaw kiba u la mane — baroh la buh jingthoh ha Ka Histori jong ki Nongïathuhlypa.

²⁰ U Manasseh u la ïap bad la tep ïa u ha ka ïingsyiem, bad u Amon u khun jong u, u long syiem ha ka jaka jong u.

U Amon u syiem ka Judah

²¹ U Amon u la don arphew ar snem ka rta mynba u la long u syiem ka Judah bad u la synshar ar snem ha Jerusalem.

²² Kum u Manasseh u kpa jong u, u la leh pop pyrshah ïa U Trai, bad u la mane ïa ki bleithaw kiba u kpa jong u, u la mane.

²³ Hynrei ym kum u kpa jong u, um shym long uba pynrit ïa lade bad phai sha U Trai; u kham long uba pop ban ïa kaba long u kpa jong u.

²⁴ Ki rangbah synshar jong u Amon ki ïasylla pyrshah ïa u bad ki pynïap ïa u ha ka ïingsyiem.

²⁵ Ki paid ka Judah ki pynïap kylla ïa ki nongpynïap ïa u Amon bad ki pynlong syiem ïa u Josaïah u khun jong u.