2 KHRONIKL 32 - Khasi CL Bible (BSI)

Ki nong Assyria ki byrngem ïa ka Jerusalem

¹ Hadien kine ki jingjia, ha kaba u syiem Hesekaïah u la ïaineh ha ka jingshakri ïa U Trai, u Sennakherib, u patsha ka Assyria, u tur ïaleh ïa ka Judah. U kerkut ïa ki nongbah ba la tei kynroh bad u ai ki hukum ïa ka kynhun shipai jong u ban pynpra ïa ka lynti lyngba ki kynroh.

² Haba u Hesekaïah u la ïohi ïa u Sennakherib ba u thmu ban tur ïaleh ïa ka Jerusalem ruh,

^3-4 ma u bad ki rangbah synshar jong u ki rai ban ot noh ïa ka jingpynpoi um shabar ka nongbah khnang ban khanglad ïa ki nong Assyria ban ïoh um ynda kin poi ha Jerusalem. Ki rangbah synshar ki ïalam ïa u paidbah babun ban ïamih bad ban set noh ïa baroh ki umpohliew, khnang ba yn ym don um ka ban tuid shabar na ki.

⁵ U syiem u pynkhlaiñ ïa ki jingïada ïa ka nongbah da kaba tei bha ïa ka kynroh, kaba tei ïa ki kut halor jong ka, bad ban shna ïa ka kynroh na shabar. Nalor kata, u tei pat ïa ki jingïada ba la tei ha ka jaka kaba la pyndap khyndew ha ka phang mihngi jong ka Jerusalem ha ka bynta kaba rim. U phah shna ruh bun bah ki sum bad ki stieh.

⁶ U buh ïa baroh ki rangbah ha ka nongbah hapoh ka jingai hukum ki rangbah shipai bad u hukum ïa ki ban ïalumlang ha ka jaka kaba kylluid ha ka khyrdop ka nongbah.

⁷ U ong ha ki, “To long kiba kut jingmut bad kiba sngewskhem, bad wat sheptieng ïa u patsha ki nong Assyria lane ïa ka kynhun shipai kaba u ïalam. Ngi don kham bun ka bor ha ka liang jong ngi ban ïa kaba u don ha ka liang jong u.

⁸ U don ka bor briew, hynrei ngi don U Trai U Blei jong ngi u ban ïarap ïa ngi ban ïaleh ïa ki thma jong ngi.” Ki briew ki ïoh ïa ka jingpynshlur da kine ki ktien jong u syiem jong ki.

⁹ Hadien katto katne por, katba u Sennakherib bad ka kynhun shipai jong u ki dang don ha Lakhish, u phah ïa kane ka khubor sha u Hesekaïah bad sha ki paid Judah kiba dang don bad u ha Jerusalem:

¹⁰ “Ma nga, u Sennakherib, u Patsha ka Assyria, nga kylli uei uba ai ha phi ba phin don ïa ka jingsngewskhem katba ka Jerusalem ka dang don ha ka jingshah kerkut.

¹¹ U Hesekaïah u ïathuh ïa phi ba U Trai U Blei jong phi un pyllait ïa phi na ka bor jong ngi, hynrei u Hesekaïah u shukor ïa phi bad un shah ba phin ïap na ka jingthngan bad ka jingsliang.

¹² Dei ma u uba pynjot ïa ki jaka mane bad ki duwan bad nangta u ong ïa ki paid Judah bad ïa ka Jerusalem ban mane bad thang jingiwbih tang ha kawei ka duwan.

¹³ Hato phim tip kaei kaba ki kpa tymmen jong nga bad nga ngi la leh ïa ki briew jong kiwei pat ki hima? Hato ki blei jong kano kano ka hima ki pyllait ïa la ki briew na u patsha ka Assyria?

¹⁴ Mynno napdeng ki blei jong kito ki ri baroh, kiba lah ban pyllait ïa la ka ri na ngi? Te kaei kaba pynlong ïa phi ban pyrkhat ba U Blei jong phi un pynim ïa phi?

¹⁵ Mynta wat ai ba u Hesekaïah un shukor ïa phi lane ïalam bakla ïa phi kumta. Wat ngeit ïa u! Ym don blei jong kano kano ka hima uba la lah ban pyllait ïa la ki briew na uno uno u patsha ka Assyria. Kumta da kaba thikna une U Blei jong phi un ym lah ban pyllait im ïa phi!”

¹⁶ Ki rangbah synshar jong ki Assyria ki la ong ïa kiei kiei kiba kham sniew shaphang U Trai U Blei bad ïa u Hesekaïah, u shakri U Trai.

¹⁷ Ka shithi kaba u patsha u la thoh ka kren pyrshah ïa U Trai, U Blei ki Israel. Ka ong, “Ki blei jong ki hima kim shym lah ban pyllait ïa ki briew jong ki na ka bor jong nga, bad da lei lei U Blei jong u Hesekaïah un ym lah ban pyllait im ïa la ki briew na nga.”

¹⁸ Ki rangbah synshar ki pyrta ïa kane ha ka ktien Hebru khnang ban pynsheptieng bad pynnoh mynsiem ïa ki briew ka Jerusalem kiba don ha ka kynroh jong ka nongbah, te kan long kaba kham suk ban knieh ïa ka nongbah.

¹⁹ Ki ïakren shaphang U Blei ka Jerusalem kumba ki ïakren shaphang ki blei jong kiwei pat ki jaitbynriew, ki bleithaw ba la shna da ki kti ki briew.

²⁰ Nangta u syiem Hesekaïah bad u nongïathuhlypa Isaïah u khun jong u Amos ki duwai ha U Blei bad ki khot kyrpad ïa u ban ïoh jingïarap.

²¹ U Trai u phah ïa u angel uba pynap ïa ki shipai bad ïa ki rangbah shipai jong ka kynhun shipai Assyria. Te u patsha u leit phai pat sha Assyria ha ka jinglehrain. Ha kawei ka sngi haba u dang don ha ka templ jong U Blei jong u, katto katne na ki khun shynrang jong u ki la pynïap ïa u da la ki waitlam.

²² Ha kane ka rukom U Trai u la pyllait im ïa u syiem Hesekaïah bad ki briew ka Jerusalem na ka bor u Sennakherib, u patsha ka Assyria, bad ruh na kiwei ki nongshun jong ki. U ai ba ki briew kin im ha ka jingsuk bad baroh ki ri kiba marjan.

²³ Bun ki briew ki la wan sha Jerusalem, da kaba wanrah ïa ki jingainguh sha U Trai bad ki jingai ïa u Hesekaïah, ba nangta sha khmat baroh ki jaitbynriew ki pyndonburom ïa u Hesekaïah.

Ka jingpang bad jingsarong u Hesekaïah

²⁴ Ha kaba kum kane ka por u syiem Hesekaïah u la kem pang bad u la jan ïap. U duwai, bad U Trai u ai ha u ïa ka dak ba un sa khiah pat.

²⁵ Hynrei u Hesekaïah u sngewsarong palat ban pynpaw ïa ka jingsngewnguh ïa kaei kaba U Trai u la leh namar jong u, bad ka Judah bad ka Jerusalem ki mad jingjynjar na kata.

²⁶ Khatduh pat u Hesekaïah bad ki briew ka Jerusalem ki pynrit ïa lade, bad kumta U Trai um shym pynshitom ïa ki briew haduh hadien ka jingïap u Hesekaïah.

Ka spah bad ka burom u Hesekaïah

²⁷ U syiem Hesekaïah u la kylla riewspah bha, bad uwei pa uwei u burom ïa u. U don ki kamra kynshew ba la shna na ka bynta ka ksiar, ka rupa, ki mawkordor, ki musla, ki stieh, bad kiwei ki tiar baremdor jong u.

²⁸ Nalor kita, u don ki ïing kynshew ba la shna na ka bynta u kew, ka waiñ, bad umphniang Olib, ki sem masi, bad ki jaka set ïa ki langbrot jong u.

²⁹ Nalor kine, U Blei u la ai ha u ïa ki langbrot bad ki masi bad shibun ka spah ka phew ba u ïoh ban tei shibun ki nongbah.

³⁰ U dei u syiem Hesekaïah uba set ïa ka jingmih ka um na ka Umpohliew Gihon bad ban pun ïa ka um ba kan tuid lyngba ka nur-um sha ka tduh hapoh ki kynroh jong ka Jerusalem.

³¹ U Hesekaïah u ïoh jingjop ha kiei kiei baroh kiba u la leh, bad wat haba ki nonglamktien ka Babilon ki wan ban kylli shaphang ki jingjia bym ju kham jia kiba jia ha ka ri, U Blei u shah ba u Hesekaïah un leit ha la ka lynti tang ban tynjuh ïa ka jinglong jong u.

Kaba kut ka jingsynshar u Hesekaïah

³² Baroh kiei kiei kiba u syiem Hesekaïah u la leh bad ka jingaiti lut jong u sha U Trai la buh jingthoh ha Ka Jingïohipaw jong u Nongïathuhlypa Isaïah u khun jong u Amos bad ha Ka Histori Jong Ki Syiem Ka Judah Bad Ka Israel.

³³ U Hesekaïah u la ïap bad la tep ïa u ha ka bynta ba-halor jong ka jingtep ki syiem. Baroh ki paid jong ka Judah bad Jerusalem ki ai ka burom kaba khraw ha ka jingïap jong u. U Manasseh u khun jong u, u long syiem ha ka jaka jong u.