2 KHRONIKL 31 - Khasi CL Bible (BSI)

U Hesekaïah u pynthymmai ïa ka jingim riewngeit

¹ Hadien ba ka Jingkhawai Niam ka la kut, baroh ki paid Israel ki leit sha kawei pa kawei ka nongbah ha Judah bad ki pynpra ïa ki rishot maw, ki pyndkut ïa ki dur ka blei Asherah, bad ki pynjot ïa ki duwan bad ki jaka mane blei thala. Ki leh ïa kajuh ha baroh ki bynta basah jong ka Judah, bad ïa ki ri jong ki Benjamin, Ephraim bad Manasseh; nangta baroh na ki, ki leit phai sha ïing.

² U syiem Hesekaïah u pynskhem biang ïa ka kynhun ki lyngdoh bad ki Lebi, hapoh jong kata uwei pa uwei u don la ka jong ka jong ka kamram. Kine ki kynthup ïa ki jingainguh thang bad ki jingainguh ïasyllok, kaba shim bynta ha ka jingmane ha ka templ, bad kaba ai ïa ka jingïaroh bad jingainguh ha ki bynta bapher jong ka Templ.

³ Na la ki kynhun jingri u pyndap ïa ki mrad na ka bynta ki jingainguh thang man la ka step bad man la ka janmiet, bad na ka bynta kito ïa kiba ainguh ha ka sngi Sabbaton, ha ka Jingkhawai Niam Bnai Thymmai, bad ha kiwei ki jinglehkmen ïa kiba donkam da ka hukum jong U Trai.

⁴ Nalor kane ruh, u syiem u la ong ïa ki briew ka Jerusalem ban wallam ïa ki jingainguh kiba long ki bynta kiba dei jong ki lyngdoh bad ki Lebi, khnang ba ki lah ban ai ïa ka por jong ki baroh sha ki jingdawa jong ka Hukum jong U Trai.

⁵ Tang mar ïa-ai hukum, ki paid Israel ki wanrah ïa ki jingai jong ki, kiba kynsai tam na u kew, ka waiñ, ka umphniang Olib, ka ngap, bad kiwei de ki jingmih na ka lyngkha, bad ki wanrah ruh ïa kawei-na-kaba-shiphew jong kiei kiei kiba ki don.

⁶ Ki briew baroh kiba shong ha ki nongbah jong ka Judah ki wanrah ïa kawei-na-kaba-shiphew jong ki masi bad ki langbrot, bad ki wanrah ruh shibun ki jingai, ïa kiba ki pynkyntang sha U Trai U Blei jong ki.

⁷ Ki jingai ki sdang ban poi ha u bnai uba lai bad ki ïai kynton ha ki saw bnai kiba bud.

⁸ Haba u syiem Hesekaïah bad ki rangbah synshar jong u ki la ïohi katno ba la ai, ki ïaroh ïa U Trai bad ki ïaroh ïa ki paid Israel.

⁹ U syiem u kren ha ki lyngdoh bad ki Lebi shaphang kine ki jingai,

¹⁰ bad u Asaraïah u Rangbah Lyngdoh, uba hiarpateng na u Sadok, u ong ha u, “Naduh ba ki briew ki sdang ban wanrah ïa ki jingai jong ki sha ka Templ, kaba la don, ka la biang ban bam bad kaba sah tam ka long kaba bun. Ngi don ïa kane baroh namar U Trai u la kyrkhu ïa ki briew jong u.”

¹¹ Ha ki hukum ki jong u syiem ki pynkhreh ha ka jaka jong ka Templ ïa ki kamra buh jingbuh

¹² bad ki buh ïa ki jingai baroh bad kawei-na-kaba-shiphew hangta ban shngain. Ki thung ïa u Lebi uba kyrteng u Konanaïah ban peit bad ki pynlong ïa u para jong u, u Shimei kum u nongïarap lem jong u.

¹³ Shiphew ngut ki Lebi ki shimti ban trei hapoh jong ki: u Jehiel, Asasaïah, Nahath, Asahel, Jerimoth, Josabad, Eliel, Ismakhaïah, Mahath, bad u Benaïah. La leh ïa kane baroh hapoh ka bor jong u syiem Hesekaïah bad u Asaraïah u Rangbah Lyngdoh.

¹⁴ U Kore u khun jong u Imnah, u Lebi uba long u rangbah ap phira ha ka Khyrdop Mihngi jong ka Templ, u long u khlieh ha ka jingpdiang ïa ki jingai ba ai sha U Trai bad ha kaba sam ïa ki.

¹⁵ Ha kiwei pat ki nongbah ha kiba ki lyngdoh ki shong, la kyrshan jingïarap ha kane da kiwei ki Lebi: u Eden, Miniamin, Jeshua, Shemaïah, Amaraïah, bad u Shekanaïah. Ki sam ryntih ïa ka jingbam sha ki para Lebi kat kum ki kamram jong ki, bad ym kat kum ki kur.

¹⁶ Ki ai bynta ïa baroh ki shynrang kiba laiphew snem ka rta ne kham ïaw kiba don jingkitkhlieh man ka sngi ha ka Templ kat kum ki kyrdan jong ki.

¹⁷ Ha ki lyngdoh la aiti ïa ki kam kat kum ki kur, bad ïa ki Lebi kiba arphew snem ka rta ne kham ïaw la aiti ha ki kat kum ki kynhun trei.

¹⁸ La kyntiew kyrteng ïa ki baroh ryngkat lang bad ki tnga jong ki, ki khun, bad kiba hap ha ka jingsumar jong ki, namar ka donkam ïa ki ban long kiba la kloi ban leh ïa ki kam bakyntang ha kano kano ka por.

¹⁹ Napdeng ki lyngdoh kiba shong ha ki nongbah ba la pynkhamti ha ki khun ki ksiew u Aaron, lane ha ki jaka phlang kiba dei jong kine ki nongbah, la don ki rangbah ba kitkhia ban sam ïa ka jingbam sha ki shynrang baroh ha ka longïing ki lyngdoh bad sha uwei pa uwei uba don kyrteng ha ka kur ki Lebi.

²⁰ Ha kylleng ka Judah, u syiem Hesekaïah u la leh ïa kaei kaba dei bad kaba sngewbha ïa U Trai U Blei jong u.

²¹ U la long uba jop, namar baroh kaba u la leh na ka bynta ka Templ lane ha kaba sumar ïa ka Hukum, u la leh ha ka mynsiem kaba ïaineh tylli bad aiti lut ha U Blei jong u.