2 KHRONIKL 30 - Khasi CL Bible (BSI)

Ki jingpynkhreh ïa Ka Jingkhawai Niam Ka Jinglait

^1-3 Ki paidlang kim shym la lah ban rakhe ïa ka Jingkhawai Niam Ka Jinglait ha ka por kaba dei ha u bnai nyngkong, namar ym shym don bun ki lyngdoh kiba khuid kat kum ka jinglehniam bad ym pat da bun ki briew kiba ïalumlang ha Jerusalem. Kumta u syiem Hesekaïah, ki rangbah synshar jong u, bad ki briew ka Jerusalem, ki la ïamynjur ban rakhe ïa ka ha u bnai uba ar bad u syiem u la phah ktien sha ki briew baroh ha Israel bad ha Judah. U da kitkhia ban phah ki shithi sha ki jait Ephraim bad Manasseh da kaba khot sngewbha ïa ki ban wan sha ka Templ ha Jerusalem ban rakhe ïa ka Jingkhawai Niam Ka Jinglait ban ai burom ïa U Trai, U Blei ki Israel.

⁴ U syiem bad ki paidlang ki la sngewbha ïa kata ka jingpynbeit jong ki,

⁵ kumta ki la khot sngewbha ïa ki Israel baroh, naduh Dan ha ka phang bashatei haduh Beersheba ha ka phang bashathie ban ïawanlang ha Jerusalem bad rakhe ïa ka Jingkhawai Niam Ka Jinglait kat kum ka Hukum, ha ka jingïabun briew ban ïa kaba mynshuwa.

⁶ Ki nonglamktien ki la leit ha ka hukum u syiem bad ki rangbah synshar jong u sha kylleng ka Judah bad ka Israel lem bad ka jingkhot sngewbha kumne harum: “Ko paid Israel, phi la lait im na ka jinghiarthma jong ki Assyria ïa ka ri. Mynta to wan phai sha U Trai, U Blei jong u Abraham, u Isaak, bad u Jakob, bad un wan phai sha phi.

⁷ Wat long kum ki kpa tymmen jong phi bad ki para Israel jong phi kiba la lyndet ïa U Trai U Blei jong ki. Kumba phi ïohi, u la pynshitom tyngeh ïa ki.

⁸ Wat long kiba mutlop kum ma ki, hynrei to kohnguh ïa U Trai. Wan sha ka Templ ha Jerusalem ïa kaba U Trai U Blei jong phi u la pynlong khuid junom, bad to mane ïa U, ba kumta phin un ym bitar shuh ïa phi.

⁹ Lada phi wan phai sha U Trai, te kito kiba la rah koidi ïa ki ba-ha-ïing ha-sem jong phi kin sngewsynei ïa ki, bad shah ïa ki ban wan phai pat sha ïing. U Trai U Blei jong phi u long uba sbun bad uba dap da ka jingisynei, bad lada phi wan phai sha u, un pdiang ïa phi.”

¹⁰ Ki nonglamktien ki la leit sha kawei pa kawei ka nongbah ha ka ri jong ki jait Ephraim bad Manasseh, bad shaduh shaphang shatei sha ka jait Sebulun; hynrei ki briew ki rkhie bad ñiewbeiñ ïa ki.

¹¹ La katta ruh, don katto katne na ki jait Asher, Manasseh, bad Sebulun, kiba la pdiang sngewbha ban wan sha Jerusalem.

¹² U Blei ruh u trei ha Judah bad u la pynïatylli ïa ki briew ha ka jingkut jingmut ban kohnguh ïa ka mon jong u da kaba bud ïa ki hukum jong u Syiem bad ki rangbah synshar jong u.

La rakhe ïa Ka Jingkhawai Niam Ka Jinglait

¹³ U paidbah uba bun u la ïalumlang ha Jerusalem ha u bnai uba ar ban rakhe ïa ka Jingkhawai Niam U Kpu Bakhlem Thiat.

¹⁴ Ki la shim ïa baroh ki duwan ba la pyndonkam ha Jerusalem na ka bynta ki jingkñia bad ban thang jingiwbih bad ki bret ïa ki ha ka them Kidron.

¹⁵ Bad ha ka sngi kaba khatsaw jong u bnai ki la pynïap ïa ki khunlangbrot na ka bynta ka jingkñia ka Jingkhawai Niam Ka Jinglait. Ki lyngdoh bad ki Lebi, ki bymkhuid kat kum ka jinglehniam ki la sngewlehrain haduh katta katta ba ki da pynkyntang ïa lade sha U Trai, bad mynta ki la lah ban kñia ïa ki jingainguh thang ha ka Templ.

¹⁶ Ki la don ha la ki jaka ha ka Templ kat kum ki jingbthah ha ka Aiñ u Moses, u briew jong U Blei. Ki Lebi ki la ai ïa ka snam jong ki jingkñia ha ki Lebi kiba synreit ïa ka ha ka duwan.

¹⁷ Namar kiba bun ki briew ki long ki bymkhuid kat kum ka jinglehniam, kim shym lah ban pynïap ïa ki khunlangbrot ka Jingkhawai Niam Ka Jinglait, kumta ki Lebi ki la leh ïa kane na ka bynta jong ki, bad ki la pynkyntang ïa ki khunlangbrot sha U Trai.

¹⁸ Shuh shuh bun na kito kiba la wan na ki jait Ephraim, Manasseh, Issakhar, bad Sebulun, kim pat la pyndep ïa ka jingpynkhuid kat kum ka jinglehniam bad kumta ki rakhe ïa ka Jingkhawai Niam Ka Jinglait ym ha ka rukom kaba dei.

¹⁹ U syiem Hesekaïah u la duwai ïa kane ka jingduwai na ka bynta jong ki: “A U Trai U Blei jong ki kpa tymmen jong ngi, ha ka jingbha ka jong Me, to map ïa kito kiba mane ïa me da la ka dohnud baroh, wat la kim long kiba khuid kat kum ka jinglehniam.”

²⁰ U Trai u jubab ïa ka jingduwai jong u Hesekaïah, u la map ïa ki briew bad um shym pynshitom ïa ki.

²¹ Haduh hynñiew sngi ki briew kiba la ïalumlang ha Jerusalem, ki la rakhe ïa ka Jingkhawai Niam U Kpu Bakhlem Thiat da ka jingkmen kaba khraw; bad man la ka sngi ki Lebi bad ki lyngdoh ki la ïaroh ïa U Trai da la ka bor baroh.

²² U Hesekaïah u la ïaroh ïa ki Lebi na ka bynta ka jingtbit jong ki ha kaba pynïaid ïa ka jingmane ïa U Trai. Hadien ki hynñiew sngi ha kaba ki la ai ki jingkñia ban ïaroh ïa U Trai U Blei jong ki kpa tymmen jong ki,

Ka jingrakhe kaba ar

²³ ki la ïa-rai lang baroh ban rakhe sa hynñiew sngi. Kumta ki la rakhe da ka jingkmen.

²⁴ U syiem Hesekaïah u la synñiang shihajar tylli ki masi lyngraw bad hynñiew hajar tylli ki langbrot na ka bynta ki briew ban pynïap bad bam, bad ïa ki rangbah synshar u la ai ha ki, sa kiwei pat ki shihajar tylli ki masi lyngraw bad shiphew hajar tylli ki langbrot. Bun bah ki lyngdoh ki la leit lyngba ka jingpynkhuid kat kum ka jinglehniam.

²⁵ Kumta uwei pa uwei baroh u la kmen — ki paid Judah, ki lyngdoh, ki Lebi ki paidbah kiba la wan na ka phang bashatei, bad ki nongwei kiba la shongduh ha Israel bad ha Judah.

²⁶ Ka nongbah Jerusalem ka la dap da ka jingkmen, namar ym pat ju jia kaba kum kane naduh ki sngi jong u syiem Solomon, u khun jong u Dabid.

²⁷ Ki lyngdoh bad ki Lebi ki la kyrpad ïa ka jingkyrkhu jong U Trai halor u paidbah. Ha ka ïing jong u ha bneng, U Blei u la ïohsngew ïa ki jingduwai jong ki bad u la pdiang ïa ki.