2 KHRONIKL 3 - Khasi CL Bible (BSI)

¹ U syiem Dabid, u kpa jong u Solomon u la lah pynkhreh ïa ka jaka na ka bynta ka Templ. Ka long ha Jerusalem, halor u Lum Moraïah, ha kaba U Trai u la mihpaw ha u Dabid; ka jaka ha kaba u Araunah u nong Jebus u la pyndonkam kum ka jaka shoh kew.

² U syiem Solomon u la sdang ïa ka jingtei ha u bnai uba ar jong ka snem kaba saw kaba u long syiem.

³ Ka Templ kaba u syiem Solomon u la tei ka don arphew hynñiew mitar ka lynter bad khyndai mitar ka pyngkiang.

⁴ Ka kamra rung ka heh kat ka pyngkiang jong ka Templ, khyndai mitar, bad ka jingjrong kaba sanphew saw mitar. Ïa ka bynta bashapoh jong ka kamra la suit da ka ksiar nylla.

⁵ Ïa ka kamra pdeng u sop da ki lyntang dieng Kedar bad suit da ka ksiar nylla, ha kaba la don ki jingoh-shrong dur dieng Tlai bad ki dur kynjri.

⁶ U syiem u la pynitynnat ïa ka Templ da ki mawkordor ba-itynnat bad da ka ksiar ba la wan kit na ka ri Parbaim.

⁷ U la pyndonkam ïa ka ksiar ban suit ïa ki kynroh jong ka templ, ki khanshi, ki shawkad bad ki jingkhang. Ha ki kynroh, ki nongtrei ki oh-shrong ïa ki dur jong ki Kherub.

⁸ Ka kamra kaba kham shapoh, ïa kaba la khot ka Jaka Kaba Kyntang Tam; ka don khyndai mitar ka lynter bad khyndai mitar ka pyngkiang, kaba long kat ka pyngkiang jong ka Templ. Palat ïa arphew ton ka ksiar la pyndonkam ban tap ïa ki kynroh jong ka Jaka Kaba Kyntang Tam;

⁹ sanspah hynñiewphew gram ka ksiar la pyndonkam ha kaba shna preg, bad ïa ki kynroh jong ka kamra ba haneng ruh la sop da ka ksiar.

¹⁰ U syiem u la hukum ruh ïa ki nongtrei jong u ban shna ar tylli ki Kherub da ka nar, ban tap ïa ki da ka ksiar, bad ban buh ïa ki ha ka Jaka Kaba Kyntang tam,

^11-13 ha kaba ki ïeng marsyndah da kaba phai ïa ka jaka rung. Uwei uwei u don ar tylli ki thapniang, kawei kawei ka thapniang ka ïar 2.2 mitar, kiba la pyiar shabar ba kumta ki da ïakynduh kawei ïa kawei ha ka pdeng jong ka kamra bad ki kot ïa ka kynroh ha baroh arliang jong ka kamra, ki da pyiar kat ka jingheh jong ka pyngkiang kaba khyndai mitar.

¹⁴ Ïa ka pyrda na ka bynta ka Jaka Kaba Kyntang Tam la thaw na ka jaiñ linen bad kiwei pat ki jait jaiñ, ba la wieh rong jngum, sawbthuh, bad saw, lem bad ki dur Kherub ba la thain ha ki.

Ki ar tylli ki rishot rnong

¹⁵ U syiem u la shna ar tylli ki rishot, uwei uwei u jrong khatsan mitar shiteng, bad u buh ïa ki ha khmat jong ka Templ. Uwei uwei u don ka khlieh kaba jrong 2.2 mitar.

¹⁶ Ïa ki khlieh jong ki rishot la pynitynnat da ki dur jong ki kynjri ba la thain bad shispah tylli ki soh Pomkranet.

¹⁷ Ïa ki rishot la pynïeng ha ki rud jong ka jaka rung jong ka Templ: Ïa uba ha ka liang bashathie la khot kyrteng u Jakhin, bad ïa uba ha ka liang bashatei la khot kyrteng u Boas.