2 KHRONIKL 29 - Khasi CL Bible (BSI)

U Hesekaïah u syiem ka Judah

¹ U Hesekaïah u la long u Syiem ka Judah haba u la don arphew san snem ka rta, bad u synshar arphew khyndai snem ha Jerusalem. Ka kmie jong u ka dei ka Abijah, ka khun u Sekharaïah.

² Da kaba bud ïa ka nuksa u syiem Dabid, u kpa tymmen jong u, u leh ïa kaei kaba pynsngewbha ïa U Trai.

Ka jingpynkhuid ïa ka Templ

³ Ha u bnai uba nyngkong jong ka snem hadien ba u Hesekaïah u la long syiem, u plie biang ïa ki jingkhang jong ka Templ, bad u phah shna pynbha ïa ki.

⁴ U khot lang ïa ka kynhun ki lyngdoh bad ki Lebi ha ka phyllaw kaba shaphang mihngi jong ka Templ bad u kren ïa ki hangta.

⁵ U ong, “Phi ki Lebi, phi dei ban pynkyntang ïa lade, bad pynkhuid ïa ka Templ U Trai U Blei ki kpa tymmen jong phi. Weng noh na ka Templ ïa kata baroh kaba pynjakhlia ïa ka.

⁶ Ki kpa tymmen jong ngi kim shym la ïaineh bad U Trai U Blei jong ngi, bad ki la leh ïa kata kaba pynsngewsih ïa u. Ki la iehnoh ïa u, bad ki la phai dien noh na kata ka jaka ha kaba u shong.

⁷ Ki la khang ïa ki jingkhang jong ka Templ, ki la pynlip ïa ki sharak, bad kim shym la thang ïa ki jingiwbih lane kñia ïa ki jingainguh thang ha ka Templ jong U Blei ka Israel.

⁸ Namar kane, U Trai u la bitar ïa ka Judah bad ka Jerusalem, bad kaei kaba u la leh ïa ki ka la pynkyndit bad pyntieng ïa uwei pa uwei. Phi tip bha shaphang kane.

⁹ Ki kpa jong ngi ki la ïap ha ka thma, bad ki tnga bad ki khun ki kti jong ngi ki la shah ring kum ki koidi.

¹⁰ “Mynta nga la rai ban pynlong ka jutang bad U Trai, U Blei ka Israel, khnang ba un ym bitar shuh ïa ngi.

¹¹ Ko khun jong nga, wat pyntud shuh. Phi long kiba la jied da U Trai ban thang ki jingiwbih ïa u, bad ban ïalam ïa ki briew ha kaba mane ïa u.”

^12-14 Ki Lebi kiba don hangta ki long kumne harum: Na ka kur u Kohath, u Mahath u khun jong u Amasai, bad u Joel u khun jong u Asaraïah Na ka kur u Merari, u Kish u khun jong u Abdi, bad u Asaraïah u khun jong u Jehallelel; Na ka kur u Gershon, u Joah u khun jong u Simmah, bad u Eden u khun jong u Joah Na ka kur u Elisaphan, u Shimri bad u Jeuel; Na ka kur u Asaph, u Sekharaïah bad u Mattanaïah; Na ka kur u Heman, u Jehuel bad u Shimei; Na ka kur u Jeduthun, u Shemaïah bad u Ussiel.

¹⁵ Kine ki rangbah ki la ïalumlang ïa la ki para Lebi bad baroh ki pynkhuid ïa lade kat kum ka jinglehniam. Nangta, kumba u syiem u la hukum ïa ki ban leh ki sdang ban pynkhuid ïa ka Templ katba kum ka Hukum U Trai.

¹⁶ Ki lyngdoh ki rung shapoh ka Templ ban pynkhuid ïa ka, bad ki sei shabar sha phyllaw jong ka Templ ïa baroh ka bymkhuid na kata ka jaka. Ki Lebi ki pynkit ïa ka baroh shabar ka nongbah sha ka Them Kidron.

¹⁷ Ka kam ka sdang ha ka sngi kaba nyngkong jong u bnai uba nyngkong, bad ha ka sngi kaba phra ki la pyndep ïa ka baroh kynthup ïa ka kamra rung sha ka Templ. Nangta sa phra sngi ki trei, haduh ka sngi kaba khathynriew jong u bnai ban pynkhreh ïa ka Templ na ka bynta ka jingmane.

La pynkyntang biang ïa ka Templ

¹⁸ Ki Lebi ki wanrah ïa kane ka jingïathuh harum sha u syiem Hesekaïah: “Ngi la dep pynkhuid ïa ka Templ baroh kawei kat kum ka jinglehniam, kynthup ïa ka duwan na ka bynta ka jingainguh thang, ïa ka miej na ka bynta u kpu bakyntang, bad ïa ki tiar ki tar jong ki baroh.

¹⁹ Ngi la wanrah pat ïa ki tiar ki tar baroh kiba u syiem Ahas u la kit noh ha kito ki snem kiba u la lyndet ïa U Blei, bad ngi la pynkyntang biang ïa ka. Baroh ki don ha khmat ka duwan U Trai.”

²⁰ Khlem da pyntud, u syiem Hesekaïah u la lumlang ïa ki riewkhmat jong ka nongbah, bad ki la ïaleit lang sha ka Templ.

²¹ Kum ka jingainguh ban weng noh ïa ki pop jong ka longïing syiem bad jong ki briew ka Judah bad ban pynkhuid ïa ka Templ, ki la wanlam hynñiew tylli ki masi lyngraw, hynñiew tylli ki langbrot, hynñiew tylli ki khunlangbrot, bad hynñiew tylli ki blang. U Syiem u bthah ïa ki lyngdoh, kiba hiarpateng na u Aaron, ban ainguh ïa ki jingri kum ki jingkñia halor ka duwan.

²² Ki lyngdoh ki pynïap nyngkong ïa ki masi lyngraw, nangta ïa ki langbrot, bad nangta pat ïa ki khunlangbrot, bad ki synreit ïa ka snam jong kawei pa kawei ka jingkñia halor ka duwan.

²³ Khatduh eh ki leit lam ïa ki blang sha u syiem bad sha kiwei pat ki nongmane, kiba la buh ïa la ki kti halor jong ki.

²⁴ Nangta ki lyngdoh ki la pynïap ïa ki blang, bad theh ïa ka snam jong ki halor ka duwan kum ka jingkñia ban weng noh ïa ka pop jong ki briew baroh. Namar u syiem u la hukum ban pynlong ki jingkñia ainguh thang bad ki jingkñia sait pop na ka bynta ki Israel baroh.

²⁵ U syiem u bud ïa ki jingbthah kiba U Trai u la ai ha u syiem Dabid lyngba u Gad, u nongïathuhlypa jong u syiem, bad lyngba u Nathan, u nongïathuhlypa; u la buh ïa ki Lebi ha ka Templ lem bad ki duitara bad ki shakuriaw, ki jingtem kum kito kiba u syiem Dabid u la pyndonkam.

²⁶ Ki lyngdoh ruh ki la ïeng hangta lem bad ki turoi.

²⁷ U Hesekaïah u la ai hukum na ka bynta ban ai ïa ka jingainguh thang bad mar ïasdang ka jingainguh, ki briew ki rwai ïaroh ïa U Trai bad ki nongtem ki sdang ban put ïa ki turoi bad tem ïa baroh kiwei pat ki jingtem.

²⁸ Baroh kiba ïadon hangta ki ïasnohlang ha ka jingmane bad ka jingrwai bad kaba sah jong ka put ka tem ka bteng haduh ban da dep thang ïa ki jingkñia baroh. U paidlang baroh u ïamane dem, ki nongrwai ki rwai, bad ki nongput ki put; bad kane ka neh haduh ba la pyndep ïa ka jingainguh thang.

²⁹ Nangta u syiem Hesekaïah bad ki briew baroh ki dem khohsiew bad mane ïa U Blei.

³⁰ U syiem bad ki nongïalam jong ka jaitbynriew ki bthah ïa ki Lebi ban rwai ha U Trai ïa ki jingrwai ïaroh ba la thoh da u Dabid bad u Asaph, u nongïathuhlypa. Kumta uwei pa uwei u la rwai da ka jingkmen bakhraw katba ki dem khohsiew bad ki mane ïa U Blei.

³¹ U Hesekaïah u ong ïa ki briew, “Mynta phi long kiba khuid kat kum ka jinglehniam, to wallam ïa ki jingkñia kum ki jingai jingainguh sha U Trai.” Ki la kohnguh bad katto katne na ki da ka mon sngewbha ki wallam ïa ki jingri ban kñia kum ka jingainguh thang.

³² Ki la wallam hynñiewphew tylli ki masi lyngraw, shispah tylli ki langbrot, bad arspah tylli ki khunlangbrot kum ki jingainguh thang ïa U Trai;

³³ ki la wallam ruh hynriewspah tylli ki masi lyngraw bad lai hajar tylli ki langbrot kum ki jingkñia ba ki briew kin ïabam.

³⁴ Namar bym don bun ngut ki lyngdoh ki ban pynïap ïa kine ki jingri baroh; ki Lebi ki ïarap ïa ki haduh ban da dep ka kam. Mar kumta, la nang bun ki lyngdoh kiba la pynkhuid ïa lade kat kum ka jinglehniam naba ki Lebi ki la ïarap ïa ki tad haduh ban da pyndep ïa ka kam. Haduh kata ka por bun ki lyngdoh ki la pynkhuid ïa lade kat kum ka jinglehniam. (Ki Lebi ki kham skhem ha kaba ri khuid kat kum ka jinglehniam ban ïa ki lyngdoh.)

³⁵ Nalor ki jingkñia ba la thang tylli, ki lyngdoh ki kitkhlieh ban thang ïa ka khleiñ kaba la ai na ki jingkñia kiba ki briew ki la bam bad ban theh ïa ka waiñ ba la ai lang bad ki jingainguh thang. Bad kumta ka jingmane ha ka Templ ka la sdang biang.

³⁶ U syiem Hesekaïah bad ki briew ki la kmen, namar ba U Blei u la ïarap ïa ki ban leh ïa kane baroh ha ka rukom kaba kloi.