2 KHRONIKL 27 - Khasi CL Bible (BSI)

U Jotham u syiem ka Judah

¹ U Jotham u long syiem haba u la don arphew san snem ka rta, bad u synshar khathynriew snem ha Jerusalem. Ka kmie jong u ka dei ka Jerushah, ka khun jong u Sadok.

² U la leh ïa kaei kaba pynsngewbha ïa U Trai, kumba u kpa jong u, u la leh; hynrei, ym kum u kpa jong u, um shym la leh pop da kaba thang jingiwbih ha ka Templ. Ki briew pynban, ki dang ïai leh pop.

³ Dei u Jotham uba tei ïa ka Khyrdop kaba shaneng jong ka Templ, bad u la tei pynheh shuh shuh ïa ka kynroh ka nongbah hapoh ka jaka jong ka Jerusalem ba la khot ka Ophel.

⁴ Ha ki lum jong ka Judah u tei ïa ki nongbah bad ha ki khlaw u tei ki kut bad ki jaka ap phira.

⁵ U ïaleh pyrshah ïa u syiem ka Ammon bad ïa ka kynhun shipai jong u bad u jop ïa ki. Nangta u pynbor ïa ki Ammon ban siew ïa u ka khajna man ka snem haduh lai snem kumne: lai hajar sawspah kilo ka rupa, shihajar ton u kew, bad shihajar ton u barli.

⁶ U Jotham u la nang khlaiñbor, namar u kohnguh hok ïa U Trai U Blei jong u.

⁷ Ïa kiwei kiwei pat ki kam jong ka jingsynshar jong u Jotham, ki thma jong u, bad ki rukom pynïaidkam jong u baroh la buh jingthoh ha Ka Histori Jong Ki Syiem Ka Israel Bad Ka Judah.

⁸ U Jotham u la don arphew san snem ka rta mynba u long syiem bad u synshar khathynriew snem ha Jerusalem.

⁹ U la ïap, bad la tep ïa u ha ka Nongbah u Dabid, bad u Ahas u khun jong u, u long syiem ha ka jaka jong u.