2 KHRONIKL 26 - Khasi CL Bible (BSI)

U Ussaïah u syiem ka Judah

¹ Ki briew ka Judah baroh ki jied ïa u Ussaïah, u khun jong u Amasaïah, uba dang khathynriew snem ka rta, ban long syiem ha ka jaka u kpa jong u.

² (Dei hadien ka jingïap jong u Amasaïah, ba u Ussaïah u la ïohknieh biang ïa ka Elath bad tei thymmai pat ïa ka nongbah.)

³ U Ussaïah u long syiem haba u la don khathynriew snem ka rta; bad u synshar sanphew ar snem ha Jerusalem. Ka kmie jong u ka dei ka Jekolaïah kaba na Jerusalem.

⁴ Da kaba bud ïa ka nuksa jong u kpa jong u, u la leh ïa kaei kaba pynsngewbha ïa U Trai.

⁵ Katba u Sekharaïah u nongaibuit jong u ha kaba ïadei bad ka niam u dang im; u la shakri hok ïa U Trai bad U Blei u la kyrkhu ïa u.

⁶ U Ussaïah u leit ïaleh thma pyrshah ïa ki Philistia. U pyntwa ïa ki kynroh jong ki nongbah jong ka Gath, ka Jamnia, bad ka Ashdod; bad u tei ïa ki shnong ba la ker kynroh hajan ka Ashdod bad ha ki jaka basah jong ki Philistia.

⁷ U Blei u ïarap ïa u ban jop ïa ki Philistia, ïa ki Arab kiba shong ha Gurbaal, bad ïa ki Meun.

⁸ Ki Ammon ki siew khajna ha u Ussaïah, bad u kylla long uba khlaiñbor haduh katta kata ba ka nam jong u ka phriang wat shaduh sha Ijipt.

⁹ U Ussaïah u pynkhlaiñ ïa ki jingker kynroh ïa ka Jerusalem da kaba tei ïa ki kut ha Khyrdop Dong, ha Khyrdop Them, bad ha ka jaka ba khun ka kynroh.

¹⁰ U tei ruh ki kut kiba skhem ha ki rudnong, bad u tih shibun ki pukri, naba u don ki kynhun jingri kiba bun ha kjat ki lum bashaphang sepngi bad ha ki pyntha. Namar ba u ieit ïa ka rep ka riang, u pynshlur ïa ki briew ban thung dieng sohwaiñ ha ki jaka lum bad ban rep ha ki jaka kiba seisoh.

¹¹ U don ruh ka kynhun shipai kaba heh kaba la kloi na ka bynta ka thma. Ïa ki jingbuh jingthoh jong ka la sumar da u Jeiel u bad u Maaseïah, ki sekretari jong u hapoh ka jingpeit u Hananaïah, u dkhot jong ki nongtrei jong u syiem.

¹² Ïa ka kynhun shipai la ai hukum da ki ar hajar hynriewspah ngut ki rangbah pynïaidkam.

¹³ Hapoh jong ki don lai lakh hynñiew hajar sanspah ngut ki shipai kiba lah ban ïaleh tyngeh na ka bynta u syiem pyrshah ïa ki nongshun jong u.

¹⁴ U Ussaïah u pynbiang ïa ka kynhun shipai da ki stieh, ki sum, ki jingda khlieh, ki jingphong nar, ki ryntieh bad ki khnam, bad ki maw ban kawang.

¹⁵ Ha Jerusalem, ki nongshna tiar jong u ki shna ïa ki tiar ki tar ban siat ïa ki khnam bad kawang ïa ki maw kiba heh na ki kut bad ki kyndong jong ka kynroh ka nongbah. Ka nam jong u ka la phriang kylleng sawdong, bad u la long uba khlaiñbor katta katta namar ka jingïarap ba u ïohpdiang na U Blei.

U Ussaïah u shah pynshitom na ka bynta ka jingsarong jong u

¹⁶ Hynrei haba u syiem Ussaïah u la kylla long uba khlaiñbor, u la sngewmeng noh pynban, bad kata ka ïalam sha ka jingkhyllem noh jong u. U ïaleh pyrshah ïa U Trai U Blei jong u da kaba u leit rung sha ka Templ ban thang jingiwbih ha ka duwan thang jingiwbih.

¹⁷ U Asaraïah u lyngdoh ryngkat bad phraphew ngut ki lyngdoh kiba khlaiñ bad bashlur ki bud nadien jong u Syiem Ussaïah ban khang ïa u.

¹⁸ Ki ong, “Ko Ussaïah! Phim don hok ban thang jingiwbih ha U Trai. Dei tang ki lyngdoh kiba hiarpateng na u Aaron ïa kiba la pynkyntang ban leh ïa kane. Khie mihnoh na kane ka jaka kyntang. Phi la pynsngewsih ïa U Trai U Blei, bad phin ym ïoh shuh ïa ka jingkyrkhu jong u.”

¹⁹ U Ussaïah u ïeng hangta hapoh ka Templ harud ka duwan thang jingiwbih, bad u bat ïa ka pliang thang jingiwbih. U la bitar ïa kita ki lyngdoh, bad mar kumta ka jingpang 'ñiangthohlieh ka mih ha ka shyllangmat jong u.

²⁰ U Asaraïah bad kiwei pat ki lyngdoh, ki peit sah ïa ka shyllangmat jong u syiem da ka jingsheptieng, bad mar mar ki tan jubor ïa u shabar ban mihnoh na ka Templ. U pynkloi ban mih shabar, namar U Trai u la pynshitom ïa u.

²¹ Ha ka jingim ba dang sah jong u syiem Ussaïah, u la long u bymkhuid kat kum ka jinglehniam namar ka jingpang jong u. Namar ba um lah shuh ban rung sha ka Templ u shong u sah ha la ka ïing, khlem da leh shuh ïa la ki kamram, katba u Jotham u khun jong u, u synshar ïa ka ri.

²² U nongïathuhlypa Isaïah, u khun jong u Amos, u buh jingthoh ïa baroh kiwei pat ki kam ba u syiem Ussaïah u la leh ha ka por ka jingsynshar jong u.

²³ U Ussaïah u la ïap bad la tep ha ka jaka tep syiem hynrei namar ka jingpang jong u ym shym la tep ïa u ha ka jingtep ki syiem. U Jotham u khun jong u, u long syiem ha ka jaka jong u.