2 KHRONIKL 25 - Khasi CL Bible (BSI)

U Amasaïah u syiem ka Judah

¹ U Amasaïah u la don arphew san snem ka rta mynba u la long u syiem, bad u synshar arphew khyndai snem ha Jerusalem. Ka kmie jong u ka dei ka Jehoaddin kaba na Jerusalem.

² U la leh ïa kaei kaba pynsngewbha ïa U Trai, hynrei u leh ïa kata da ka jingbymmon.

³ Mar ïaskhem ha ka bor, u la pynïap ïa ki rangbah synshar kiba la pynïap ïa u kpa jong u.

⁴ Pynban um shym la pynïap ïa ki khun ki kti jong ki, hynrei u la bud ïa kaei kaba U Trai u la hukum ha Ka Hukum u Moses: “Ïa ki kmie ki kpa ym dei ban pynïap namar ki kam sniew ba la leh da ki khun jong ki, bad ïa ki khun ym dei ban pynïap namar ki kam sniew ba la leh da ki kmie ki kpa jong ki; ïa u briew dei ban pynïap tang namar ka kam sniew kaba ma u hi u la leh.”

Ka thma pyrshah ïa ka Edom

⁵ U Syiem Amasaïah u pynbeit ïa baroh ki rangbah jong ki jait Judah bad Benjamin ha ki kynhun shipai, kat kum ki kur jong ki, bad u la buh ki rangbah pynïaidkam ha ka jingai hukum ïa ki kynhun kiba shihajar ngut bad ki kynhun kiba shispah ngut. Kane ka kynthup ïa baroh ki rangbah kiba arphew snem ne kham ïaw, baroh ki long lai lakh ngut. Ki long ki shipai ba la jied, kiba la kloi ban ïaleh thma, kiba tbit ban pyndonkam ïa ki sum bad ki stieh.

⁶ Shuh shuh u la wai shi lakh ngut ki shipai na Israel ha ka dor kaba lai hajar sawspah kilo ka rupa.

⁷ Hynrei u nongïathuhlypa u la leit sha u syiem bad u ong ha u, “Wat shim ïa kine ki shipai Israel bad me. U Trai um don bad kine ki kynhun shipai kiba na ka Hima bashatei.

⁸ Me lah ban pyrkhat ba kin pynlong ïa me uba khlaiñ ha ka thma, hynrei u dei U Blei uba don ka bor ban ai ka jingjop ne ka jingshahjop, bad un shah ïa ki nongshun jong me ban jop ïa me.”

⁹ U Amasaïah u kylli ïa u nongïathuhlypa, “Hynrei kumno pat shaphang ka rupa baroh kaba nga la dep siew ïa ki?” U nongïathuhlypa u jubab, “U Trai u lah ban ai pat sha me kham bun ban ïa kata!”

¹⁰ Kumta u Amasaïah u la phah noh ïa ki kynhun shipai ba la shim wai bad u ong ïa ki ban leit noh sha ïing. Ha kane ki la leit sha ïing, ki da bitar tyngeh ïa ki briew ka Judah.

¹¹ U Amasaïah u la long shlur bad u ïalam ïa ka kynhun shipai jong u sha ka Them Mluh. Hangta ki la ïaleh bad ki pynïap shiphew hajar ngut ki shipai Edom,

¹² bad ki la ïohkem sa shiphew hajar ngut. Ki la ïalam ïa ki koidi sha ka kliar uwei u mawsiang ha ka nongbah Sela bad ki bret ïa ki, ba kumta la pynïap ïa ki ha ki mawsiang kiba don sha trai.

¹³ Ha kajuh ka por, ki shipai Israel kiba u Amasaïah um shym la shah ba kin leit sha ka thma bad u ki la tur ïaleh ïa ki nongbah ka Judia hapdeng ka Samaria bad ka Beth Horon, ki la pynïap lai hajar ngut ki rangbah, bad ki la kurup shibun ki mar lute.

¹⁴ Haba u Amasaïah u la wan phai na ka jingjop ïa ki Edom, u wanrah ïa ki bleithaw jong ki lem bad u, u pynïeng ïa ki, u la mane ïa ki, bad u thang jingiwbih ïa ki.

¹⁵ Kane ka la pynlong ïa U Trai ban bitar, kumta u la phah ïa u nongïathuhlypa sha u Amasaïah. U nongïathuhlypa u la dawa, “Balei ba phi mane ïa ki blei nongwei ki bym lah wat ban pyllait im ïa ki briew jong ki na ka bor jong me?”

¹⁶ “Naduh mynno,” u Amasaïah u kynrup ktien, “ba ngi la pynlong ïa me u nongai jingmut ïa u syiem? Sangeh ban kren, ïoh ngan pynïap ïa me!” U nongïathuhlypa u la sngap, hynrei ym shuwa ba un ong, “Mynta nga tip ba U Blei u la thmu ban pynjot ïa me namar ba me la leh ïa kane baroh bad ba mem shym sngap ïa ka jingai jingmut jong nga.”

Ka thma pyrshah ïa ki Israel

¹⁷ U Amasaïah u syiem ka Judah bad ki nongai jingmut jong u ki la ïasylla pyrshah ïa ka Israel. Kumta u la phah khubor sha u Jehoash u syiem ka Israel, u khun jong u Jehoahas bad u ksiew jong u Jehu, da kaba kob ïa u ban ïaleh.

¹⁸ U Jehoash u la phah ïa kane ka jubab sha u Amasaïah: “Shisien u dieng shiah ha ki Lum Lebanon u phah khubor sha u dieng Kedar: ‘To ai ïa ka khun jong me ban shongkurim ïa u khun jong nga.’ U mradkhlaw u ïaid lynti nangta bad u ïuhroit ïa u dieng shiah.

¹⁹ Mynta ko Amasaïah, me kob ba me la jop ïa ki Edom, hynrei nga ai jingmut ïa me ba men shong ha ïing. Balei me pynkhih jingkulmar ka ban shu wanrah tang ka jingjot ha me bad ki briew jong me?”

²⁰ Hynrei u Amasaïah u kyntait ban shahshkor. Ka dei ka mon U Blei ba U Amasaïah un shahjop, namar ba u la mane ïa ki bleithaw jong ki nong Edom.

²¹ Kumta u Jehoash, u syiem ka Israel u leit ïaleh thma pyrshah ïa u Amasaïah, u syiem ka Judah. Ki la ïakynduh ha Beth Shemesh kaba ha Judah,

²² ka kynhun shipai Judia ka la shahjop, bad ki shipai ki la phet sha la ki ïing.

²³ U Jehoash u la ïohkem ïa u Amasaïah bad u ïalam ïa u sha Jerusalem. Hangta u la pynkhyllem ïa ka kynroh nongbah naduh ka Khyrdop Ephraim haduh ka Khyrdop Dong, ka jingjngai kumba arspah mitar.

²⁴ U la rah pat sha Samaria kum ka mar lute ïa baroh ka ksiar bad ka rupa kaba ha ka Templ, ki tiar ki tar ka Templ ïa kiba la ap phira da ki khun ki ksiew jong u Obed Edom, bad ïa ki jingkynshew ka ïingsyiem. U la ïalam ruh ïa ki koidi lem bad u.

²⁵ U Amasaïah u syiem ka Judah, u im khatsan snem palat ïa u Jehoash u syiem Israel.

²⁶ Ïa baroh kiwei kiwei pat kiba u Amasaïah u la leh naduh kaba sdang haduh kaba kut ka jingsynshar jong u, la buh jingthoh ha Ka Histori Jong Ki Syiem Ka Judah Bad Ka Israel

²⁷ Naduh kata ka por mynba u la ïeng ïaleh pyrshah ïa U Trai, ka la don ka jingïasylla pyrshah ïa u ha Jerusalem. Ha kaba khatduh u la phet sha ka nongbah Lakhish, hynrei ki nongshun jong u ki la buddien ïa u shata bad ki la pynïap ïa u.

²⁸ Ïa ka met jong u la wan kit sha Jerusalem halor u kulai, bad la tep ïa u ha ka jingtep ki syiem ha ka Nongbah jong u Dabid.