2 KHRONIKL 24 - Khasi CL Bible (BSI)

U Joash u syiem ka Judah

¹ U Joash u la don hynñiew snem ka rta mynba u long u syiem ka Judah, bad u synshar sawphew snem ha Jerusalem. Ka kmie jong u ka dei ka Sibaïah na ka nongbah Beersheba.

² U la leh ïa kaei kaba pynsngewbha ïa U Trai katba u Jehoïada u lyngdoh u dang im.

³ U Jehoïada u jied ar ngut ki tnga na ka bynta u syiem Joash, bad ki kha ïa u, ki khun shynrang bad ki khun kynthei.

⁴ Ynda u la long syiem katto katne por, u Joash u la kut jingmut ban shna pynbha pat ïa ka Templ.

⁵ U la hukum ïa ki lyngdoh bad ki Lebi ban leit sha ki nongbah jong ka Judah bad ban lum na ki briew baroh kat ban biang ban shna pynbha ïa ka Templ man ka snem. U ong ïa ki ban leh kloi, hynrei ki Lebi ki pyntud,

⁶ kumta u phah khot ïa u Jehoïada, u nongïalam jong ki, bad u dawa, “Balei ba phim peit ïa kane ba ki Lebi ki lum na Judah bad Jerusalem ïa ka khajna kaba u Moses, u shakri jong U Trai, u la pan na ki briew ban siew ïa ka ban kyrshan ïa ka Ïingjaiñ Ka Jingdon Ryngkat U Trai?”

⁷ (Ki nongbud jong ka Athalaïah, kata ka kynthei bymman, ki la pynjot ïa ka Templ bad ki la pyndonkam ïa kiba bun ki tiar ki tar bakyntang ha ka jingmane ïa u Baal.)

⁸ U syiem u hukum ïa ki Lebi ban shna ka synduk na ka bynta ki jingnoh synñiang bad ban buh ïa ka ha ka khyrdop ka Templ.

⁹ Ki la phah ktien sha kylleng ka Jerusalem bad ka Judah ïa baroh ban wallam sha U Trai ïa ka khajna ba u Moses, u shakri U Blei, u la lum nyngkong ha ka ri khlaw.

¹⁰ Kane ka la pynsngewbha ïa ki briew bad ïa ki nongïalam jong ki, bad ki la wallam ïa ka khajna jong ki bad ki pyndap ïa ka synduk da ka.

¹¹ Man ka sngi ki Lebi ki leit rah ïa kata ka synduk sha u nongpynïaidkam u syiem, uba dei peit ïa ka. Ha man ba ka dap, u sekretari syiem bad u nongmihkhmat ïa u Rangbah Lyngdoh ki sei shabar ïa ka pisa bad ki leit buh biang ïa ka synduk ha ka jaka jong ka. Bad kumta ki la ïohlum shibun ka pisa.

¹² U syiem bad u Jehoïada ki ai ïa kata ka pisa ha kito kiba dei peit ïa ka kam shna pynbha ïa ka Templ, bad ki wai ïa ki misteri maw, ki misteri dieng, ki nongtrei nar, ban shna pynbha.

¹³ Baroh na ki, ki trei shitom, bad ki pynwandur biang ïa ka Templ kumba ka ju long mynshuwa kaba ïeng skhem.

¹⁴ Ynda ki la pyndep ïa ka jingpynbha, ïa ka ksiar bad ka rupa kaba tam la ai sha u syiem bad sha u Jehoïada, kiba la pyndonkam ïa ka ha kaba phah shna ïa ki pliang bad kiwei ki pat ki khiew ki pliang na ka bynta ka Templ. Katba u Jehoïada u dang im, ïa ki jingkñia la ai tista ha ka Templ.

La pynkylla khongpong ïa ki rukom treikam u Jehoïada

¹⁵ Hadien ba u la kynjoh ka rta kaba la tymmen bha haba u la don shispah laiphew snem, u la ïap.

¹⁶ Ki la tep ïa u ha ka jingtep ki syiem ha ka Nongbah jong u Dabid kum ka dak ka jingñiewkor ïa ka jingshakri kaba u la leh na ka bynta ki paid Israel, na ka bynta U Blei bad na ka bynta ka Templ.

¹⁷ Hynrei haba u Jehoïada u la ïap, ki nongïalam jong ka Judah ki khroh ïa u syiem Joash ban shahshkor noh ïa ki.

¹⁸ Kumta ki paidbah ki sangeh noh ban mane ha ka Templ jong U Trai, U Blei jong ki kpa tymmen jong ki, bad ki sdang ban mane ïa ki bleithaw bad ïa ki dur jong ka blei Asherah. Ka jingrem jong ki namar kine ki pop ka la wallam ïa ka jingbitar U Trai halor ka ha Judah bad ka Jerusalem.

¹⁹ U Trai u la phah ïa ki nongïathuhlypa ban maham ïa ki ban phai pat sha u, hynrei ki paidbah ki kyntait ban shahshkor.

²⁰ Nangta U Mynsiem U Blei u wan ha u Sekharaïah u khun jong u Jehoïada u lyngdoh. U la ïeng ha ka jaka ba ki briew ki lah ban ïohi ïa u, bad u pyrta, “U Trai U Blei u kylli balei ba phim shym kohnguh ïa ki hukum jong u bad ba phi wallam ka jingpynjot halor lade hi! Phi la iehnoh ïa u, kumta u la iehnoh ïa phi!”

²¹ U syiem Joash u la ïasnohkti ha ka jingïasylla pyrshah ïa u Sekharaïah, bad ha ka hukum jong u syiem, ki paidbah ki la lynthem maw ïa u Sekharaïah ha ka phyllaw ka Templ.

²² U syiem u la klet ïa ka jingshakri bahok ba u Jehoïada, u kpa jong u Sekharaïah u la ai ïa u, bad u la phah pynïap ïa u Sekharaïah. Shuwa ba u Sekharaïah un ïap, u pyrta, “Ai ba U Trai un ïohi ïa kaei kaba phi leh bad un pynshitom ïa phi!”

Kaba kut ka jingsynshar jong u Joash

²³ Haba ka synrai ka la poi ha kata ka snem, ka kynhun shipai Syria ka la tur ïaleh ïa ka Judah bad ka Jerusalem, ki la pynïap ïa ki nongïalam baroh, bad ki la kit shibun ki mar lute sha Damaskos.

²⁴ Ka kynhun shipai Syria ka long kaba rit, hynrei U Trai u la shah ïa ki ban jop ïa ka kynhun shipai Judia kaba kham heh namar ki paidbah ki la iehnoh ïa u, U Trai U Blei jong ki kpa tymmen jong ki. Ha kane ka rukom la pynshitom ïa u syiem Joash.

²⁵ U la mynsaw jur, bad haba ki nongshun ki la leit noh, ar ngut ki rangbah synshar jong u ki la ïasylla pyrshah ïa u bad ki la pynïap ïa u ha ka jingthiah jong u ban pynhiarkput ïa ka jingpynïap ïa u khun jong u Jehoïada, u lyngdoh. La tep ïa u ha ka Nongbah jong u Dabid, hynrei ym ha ka jingtep ki syiem.

²⁶ (Kito kiba la ïasylla pyrshah ïa u ki dei u Sabad, u khun jong ka nong Ammon kaba kyrteng ka Shimeath, bad u Jehosabad, u khun jong ka nong Moab kaba kyrteng ka Shimrith).

²⁷ Ka Komentari halor ka Kitab ki Syiem ka don ki jingïathuhkhana shaphang ki khun shynrang jong u Joash, ki jingïathuhlypa kiba la kren pyrshah ïa u, bad ka jingbuh jingthoh kumno ba u la tei pat ïa ka Templ. U Amasaïah u khun jong u, u long syiem ha ka jaka jong u.