2 KHRONIKL 23 - Khasi CL Bible (BSI)

Ka jingïeng pyrshah ïa ka Athalaïah

¹ Hadien ka jingap kaba hynriew snem, u Jehoïada u lyngdoh u la rai ba ka la dei ka por ban leh ei ei. U ïateh kular bad san ngut ki rangbah shipai: u Asaraïah u khun jong u Jeroham, u Ishmael u khun jong u Jehohanan, u Asaraïah u khun jong u Obed, u Maaseïah u khun jong u Adaïah, bad u Elishaphat u khun jong u Sikhri.

² Ki la ïaleit sha baroh ki nongbah jong ka Judah bad ki wallam pat bad ki sha Jerusalem ïa ki Lebi bad ïa baroh ki rangbah kur.

³ Baroh ki la ïalumlang ha ka Templ bad hangta ki la pynlong ka jutang bad u Joash, u khun jong u syiem. U Jehoïada u ong ha ki, “Une hangne u dei u khun jong u syiem ba la khlad noh! Mynta u dei ban long syiem, kumba U Trai u la kular ba ki khun ki ksiew u Dabid kin long.

⁴ Kane ka dei kaei ba ngin leh. Haba ki lyngdoh bad ki Lebi ki wan ban pyndep kam ha ka Sabbaton, shi bynta na ka lai bynta na ki kin ap phira ïa ki khyrdop ka Templ,

⁵ sa shi bynta kin ap phira ïa ka ïingsyiem, bad ïa kiba sah yn buh ha ka Khyrdop Nongrim. Ki briew baroh kin ïalumlang ha ki phyllaw ka Templ.

⁶ Ym don mano mano u ban rung sha ki ïing ka Templ lait noh tang ki lyngdoh bad ki Lebi kiba wan ban pyndep kam. Ki lah ban rung, namar ki long kiba la pynkyntang, hynrei kiba sah jong ki paidbah ki dei ban kohnguh ïa ki jingbthah jong U Trai bad ban shong shabar.

⁷ Ki Lebi ki dei ban ïeng ïada sawdong ïa u syiem, lem bad ki waitlam jong ki, kiba ki la sei, bad ki dei ban don ryngkat bad u syiem kat shaba u leit. Uno uno uba pyrshang ban rung shapoh ka Templ u dei ban shah pynïap.”

⁸ Ki Lebi bad ki briew ka Judah ki leh kumba la bthah da u Jehoïada. Ym shym la phah noh ïa ki rangbah haba ki la pyndep ïa la ki kamram ha ka Sabbaton, kumta ki rangbah ai hukum ki ïoh lang ïa kito kiba dang wan sha la ki kam bad kito kiba la pyndep kam.

⁹ U Jehoïada u ai ha ki rangbah pynïaidkam ïa ki sum bad ki stieh kiba dei ki jong u syiem Dabid bad kiba la buh ha ka Templ.

¹⁰ U la buh ïa ki rangbah kiba bat ki waitlam ha baroh ka bynta ba ha khmat jong ka Templ ban ïada ïa u syiem.

¹¹ Nangta u Jehoïada u ïalam shabar ïa u Joash, u buh ïa ka pansngiat halor ka khlieh jong u, bad u ai ha u ïa ka kopi jong ki aiñ kiba ïadei bad ka jingsynshar. U Jehoïada u lyngdoh bad ki khun shynrang jong u ki pynsleh ïa u Joash, bad uwei pa uwei u pyrta: “To un im slem u syiem.”

¹² Haba ka Athalaïah ka ïohsngew ïa ka jingrisa jong ki paidbah ïa u syiem, ka la pynkloi sha ka Templ, ha kaba ki paidbah ki la ïalumlang.

¹³ Hangta ka la ïohi ïa u syiem thymmai ha ka jaka rung sha ka Templ, ba u ïeng ha syndah u rishot ba la buh khnang na ka bynta ki syiem bad ba la ker sawdong ïa u da ki rangbah shipai bad ki nongput turoi. Ki paidbah baroh ki ïarisa da ka jingkmen bad ki put ïa ki turoi, bad ki nongput nongtem ka Templ ki ïalam ïa ka jinglehkmen da ki jingput jingtem jong ki. Ka la kad ïa la ki jaiñ ha ka jingsngewsih bad ka lynñiar, “Ka Jingshetkylla! Ka Jingshetkylla!”

¹⁴ U Jehoïada u lyngdoh um kwah ba ka Athalaïah kan shah pynïap hapoh ka jaka jong ka Templ, kumta u khot ïa ki rangbah shipai bad u ong, “Ïalam ïa ka shabar napdeng ki laiñ jong ki nongap phira, bad pynïap ïa uno uno uba pyrshang ban pyllait im ïa ka.”

¹⁵ Ki la kem ïa ka, ki ïalam ïa ka sha ka ïingsyiem, bad hangta ha ka Khyrdop Kulai ki pynïap ïa ka.

Ki jingpynbeit thymmai u Jehoïada

¹⁶ U Jehoïada u lyngdoh u pynlong ïa u syiem Joash bad ïa ki paidbah ban ïasnohkti lang bad u ha kaba pynlong ka jutang ba kin long ki briew jong U Trai.

¹⁷ Nangta baroh ki ïaleit sha ka templ u Baal bad ki pyntwa ïa ka. Ki tied pynpra lyngkhot lyngkhai ïa ki duwan bad ïa ki bleithaw hangta bad ki pynïap ïa u Mattan, u lyngdoh jong u Baal, ha khmat jong ki duwan.

¹⁸ U Jehoïada u buh ïa ki lyngdoh bad ki Lebi ban peit ïa ka kam ha ka Templ. Ki dei ban pyndep ïa ki kamram kiba la bynshet ha ki da u syiem Dabid bad ban thang ïa ki jingkñia kiba la ai sha U Trai kat kum ka Aiñ u Moses. Ki la peit ruh ïa ka jingput jingtem bad ïa ka jinglehkmen.

¹⁹ U Jehoïada u buh ruh ki nongap phira ha ka kam ha ki khyrdop jong ka Templ ban khang ïa uno uno u bymkhuid kat kum ka niam.

²⁰ Ki rangbah shipai, ki riewpawkhmat, ki rangbah pynïaidkam, bad ki briew baroh, ki ïadon lang bad u Jehoïada ha jingïa-ïaid paidbah kaba wan ïalam ïa u syiem na ka Templ sha ka ïingsyiem. Ki rung na ka khyrdop bah, bad u syiem u shong halor ka khet.

²¹ La pyndap da ka jingkmen ïa ki briew baroh, bad ka nongbah ka la shongsuk, mynta ba la pynïap ïa ka Athalaïah.