2 KHRONIKL 22 - Khasi CL Bible (BSI)

U Ahasaïah u syiem ka Judah

¹ Katto katne ngut ki Arab ki la leit lute bad pynïap ïa baroh ki khun shynrang jong u Jehoram lait noh u Ahasaïah, uba khatduh. Te mynta ki briew ka Jerusalem ki thung ïa u Ahasaïah kum u syiem ba mih bujli ïa u kpa jong u.

^2-3 U Ahasaïah u la long syiem haba u la don arphew ar snem ka rta, bad u la synshar shisnem ha Jerusalem. U Ahasaïah ruh u la bud ïa ka jingleh jong ka longïing jong u Syiem Ahab, naduh ba ka Athalaïah, ka kmie jong u — ka khun jong u syiem Ahab bad ka ksiew jong u Omri, u syiem ka Israel — ka la ai jingmut ïa u, kaba la ïalam sha ka jingsniew.

⁴ U la leh pop pyrshah ïa U Trai, namar hadien ka jingïap u kpa jong u kiwei pat ki dkhot jong ka longïing u syiem Ahab ki la long ki nongai jingmut ïa u, bad ki la pynlong ïa ka jingkyllon noh jong u.

⁵ Da kaba bud ïa ki jingai jingmut jong ki, u la ïasoh bad u Joram u syiem ka Israel ha ka thma pyrshah ïa u Hasael u syiem ka Syria. Ki kynhun shipai ki la ïaleh ha Ramoth ha Gilead, bad u Joram u la mynsaw ha ka thma.

⁶ U la leit phai pat sha ka nongbah Jesreel ban ïohkhiah na ki jingmong jong u, bad u Ahasaïah u la leit shata ban jngoh ïa u.

⁷ U Blei u pyndonkam ïa kane ka jingleit jngoh ïa u Joram ban wanrah ka jingkyllon noh jong u Ahasaïah. Katba u Ahasaïah u dang don hangta, ma u bad u Joram ki la shah kynroi ha u briew uba kyrteng u Jehu, u khun jong u Nimshi, uba U Trai u la jied ban pynjot ïa ka longïing syiem jong u Ahab.

⁸ Katba u Jehu u dang pyntreikam ïa ka rai jong U Blei halor ka longïing syiem, u la ïakynduh ïa ka kynhun kaba don ki nongïalam jong ka Judia bad ki pyrsa jong u Ahasaïah kiba la synran ïa u Ahasaïah ha ka jingleit jngoh jong u. U Jehu u la pynïap ïa ki baroh.

⁹ La pynlong ka jingleit wad bniah ïa u Ahasaïah, bad la shem ïa u ba u rieh ha Samaria. Ki la leit lam ïa u sha u Jehu bad pynïap ïa u. Hynrei ki la tep ïa ka met jong u naba ki burom ïa u syiem Jehoshaphat u kparad jong u, uba la leh kat kaba u lah ban shakri ïa U Trai. Ym don uno uno u dkhot jong ka longïing jong u Ahasaïah uba dang sah uba lah ban synshar ïa ka hima.

Ka Athalaïah ka syiem Judah

¹⁰ Tang mar ïabna ïa ka jingshah pynïap u khun jong ka, ka Athalaïah, ka kmie jong u syiem Ahasaïah ka la ai hukum ban pynïap ïa baroh ki dkhot jong ka longïing syiem Judah.

¹¹ U Ahasaïah u don kawei ka para ar kmie, ka Jehosheba, kaba shongkurim ïa u lyngdoh uba kyrteng u Jehoïada. Ka la pyllait im jar jar ïa u Joash, uwei na ki khun shynrang jong u Ahasaïah, ka la shim ïa u na kiwei pat ki khun syiem kiba la dei ban shah pynïap bad ka la buhrieh ïa u bad ka nongri khun ha ka kamra thiah ha ka Templ. Da kaba buhrieh ïa u, ka la pyllait im ïa u na ka jingshah pynïap ha ki kti jong ka Athalaïah.

¹² Hynriew snem u la don hangta ha kaba rieh, katba ka Athalaïah ka synshar kum ka syiem.