2 KHRONIKL 21 - Khasi CL Bible (BSI)

¹ U Jehoshaphat u la ïap bad la tep ïa u ha ka jingtep ki syiem ha ka Nongbah jong u Dabid bad u Jehoram u khun jong u, u long syiem ha ka jaka jong u.

U Jehoram u syiem ka Judah

² U Jehoram, u khun jong u Jehoshaphat u syiem ka Judah u don hynriew ngut ki para shynrang: u Asaraïah, u Jehiel, u Sekharaïah, u Asaraïahu, u Mikhael, bad u Shephataïah.

³ U kpa jong ki u la ai ha ki shibun ka ksiar, ka rupa, bad kiwei kiwei ki markordor, bad u la buh ïa uwei pa uwei na ki ban peit ïa kawei kawei ka nongbah ba la ker kynroh jong ka Judah; hynrei namar u Jehoram u dei uba nyngkong eh, u Jehoshaphat u la pynlong ïa u, u nongmih bujli jong u.

⁴ Haba u Jehoram u la skhem ha ka jingsynshar ïa ka hima, u la pynïap ïa ki para shynrang jong u baroh, bad ruh ïa ki katto katne ngut ki nong Israel kiba dei ki rangbah synshar.

⁵ U Jehoram u la long syiem haba u don laiphew ar snem ka rta, bad u synshar phra snem ha Jerusalem.

⁶ U bud ïa ka jingleh bymman jong u Syiem Ahab bad kiwei pat ki syiem Israel, namar u la shongkurim ïa kawei na ki khun kynthei jong u Ahab, u la leh pop pyrshah ïa U Trai,

⁷ hynrei U Trai um mon ban pynduh ïa ka longïing syiem jong u Dabid, namar u la lah pynlong ka jutang bad u Dabid bad ba u la kular ba ki khun ki ksiew jong u kin ïai bteng ban synshar.

⁸ Ha ki sngi ba u Jehoram u synshar, ki Edom ki ïaleh pyrshah ïa ki Judah, bad ki la long ka hima kaba laitluid.

⁹ Kumta u Jehoram lem bad ki rangbah pynïaidkam ki la mih bad ki kali ïapom bad ki hiarthma ïa ka Edom. Hangta ka kynhun shipai jong ki Edom ka la kerkut ïa ki, hynrei ha ka por mynmiet ki la ïohlad ban mih shabar bad lait phet.

¹⁰ Ka Edom ka la laitluid na ka Judah naduh kata ka por. Ha kane kajuh ka por, ka nongbah Libnah ruh ka la ïeng ïaleh pyrshah, namar u Jehoram u la iehnoh ïa U Trai, U Blei ki kpa tymmen jong u.

¹¹ U la tei wat ïa ki jaka mane blei thala ha ki ri lum Judia bad u ïalam ïa ki briew ka Judah bad ka Jerusalem ban leh pop pyrshah ïa U Trai.

¹² U Elijah u nongïathuhlypa u la phah shithi sha u Jehoram, kaba ong kumne harum: “U Trai, U Blei jong u Dabid, u kpa tymmen jong me, u pynrem ïa me, namar mem shym bud ïa ki nuksa u syiem Jehoshaphat, u kpa jong me lane ïa ka jong u syiem Asa, u kparad jong me.

¹³ Pynban me la bud ïa ka jingleh jong ki syiem ka Israel bad me la ïalam ïa ki briew ka Judah bad Jerusalem sha ka jinglong bymïaineh shuh ha U Blei, kumba u Ahab bad ki nongmih bujli jong u ki la ïalam ïa ki Israel sha ka jingbymïaineh. Me la pynïap wat ïa la ki para shynrang, kiba long ki rangbah kiba kham bha ban ïa kaba me long.

¹⁴ Namar kata, U Trai un pynshitom tyngeh ïa ki briew jong me, ïa ki khun jong me, bad ïa ki tnga jong me, bad un pynjot thiaw ïa ki jingdon jingem jong me.

¹⁵ Me hi men ïoh ka jingpang bajur ha ki snier ka ban kham jur na kawei ka sngi sha kawei pat.”

¹⁶ Katto katne ngut ki Philistia bad ki Arab ki shong ki sah hajan ka jaka ha kaba katto katne ngut ki nong Sudan ki la shongduh harud ka duriaw. U Trai u la pynkhih ïa ki ban leit ïaleh thma pyrshah ïa u Jehoram.

¹⁷ Ki la hiarthma ïa ka Judah, ki la lute ïa ka ïingsyiem, bad ki ïalam kum koidi ïa baroh ki tnga bad ïa ki khun shynrang jong u syiem lait noh tang u Ahasaïah, u khun khatduh jong u.

¹⁸ Nangta hadien kane baroh, U Trai u pynngat ha u syiem da ka jingpang kaba jur ha ki snier.

¹⁹ Kumba ar snem ka la nang jur tad haduh ba u syiem u la ïap ha ka jingkordit. Ki raïot jong u kim shym thang ding shabar ha kaba ïambriew ïa u kumba la leh ïa ki kpa tymmen jong u.

²⁰ U Jehoram u la don laiphew ar snem ka rta mynba u long syiem, bad u synshar phra snem ha Jerusalem. Ym don mano mano ba sngewsih haba u ïap. Ki la tep ïa u ha ka Nongbah jong u Dabid, hynrei ym ha ka jingtep ki syiem.