2 KHRONIKL 20 - Khasi CL Bible (BSI)

Ka thma pyrshah ïa ka Edom

¹ Hadien katto katne por, ki kynhun shipai jong ka Moab bad ka Ammon, ryngkat bad kiba ïateh lok bad ki, ki Meun, ki hiarthma ïa ka Judah.

² Katto katne ki nonglamktien ki wan bad ki ïathuh ha u syiem Jehoshaphat: “Ka kynhun shipai babun paid na Edom ka la wan na sha shiliang ka Duriaw Baïap ban tur ïaleh ïa phi. Ki la dep knieh ïa ka Hasason Tamar.” (Kane ka dei kawei pat ka kyrteng jong ka Engedi.)

³ U Jehoshaphat u la sheptieng bad duwai ha U Trai na ka bynta ka jingïalam. Hadien kata u ai hukum ban pynlong ka jingshah jingit ha ka ri baroh kawei.

⁴ Na kawei pat kawei ka nongbah jong ka Judah ki briew ki leit kloi kloi sha Jerusalem ban pan na U Trai ïa ka jingïalam,

⁵ bad ma ki bad ki briew ka Jerusalem ki ïalumlang ha ka phyllaw bathymmai jong ka Templ. U syiem Jehoshaphat u leit bad u ïeng ha khmat jong ki bad duwai jam,

⁶ “A Trai U Blei jong ki kpa tymmen jong ngi, me synshar ha bneng halor ki jaitbynriew baroh jong ka pyrthei. Me long uba donbor bad uba khrawbor, bad ym don ba lah ban pyrshah ïa me.

⁷ Me long U Blei jong ngi. Mynba u paid Israel jong me u wan sha kane ka ri, me beh krad ïa ki briew kiba shong hangne bad me ai ïa ka ri ha ki khun ki ksiew u Abraham, u paralok jong me, ban long ka jong ki junom.

⁸ Ki la shong la sah hangne bad tei ïa ka templ ban burom ïa me, da kaba tip

⁹ ba lada kano kano ka jingjia bashyrkhei kan ktah ban pynshitom ïa ki — ka thma, ka jingïapthem, lane ka 'nemsniew — te ki lah ban wan bad ïeng ha khmat kane ka Templ ha kaba la mane ïa me. Ki lah ban duwai ha me ha ka jingshitom jong ki bad ba men sngew bad pyllait ïa ki.

¹⁰ “Mynta ki briew jong ka Ammon, ka Moab bad ka Edom ki la tur ïaleh ïa ngi. Mynba ki kpa tymmen ki mihnoh na Ijipt, mem shym la shah ïa ki ban rung ha kito ki ri, kumta ba ki kpa tymmen jong ngi ki la hap ban ïaid sawdong jong ki bad mem shym la pynjot ïa ki.

¹¹ Kane ka long kumno ba ki siew kylliang ïa ngi — ki wan ban beh krad ïa ngi shabar na ka ri kaba me la ai ha ngi.

¹² Me long U Blei jong ngi! Pynshitom ïa ki, naba ngim lah leh ei ei ruh em ha khmat jong kane ka kynhun shipai babun paid kaba tur ïaleh ïa ngi. Ngim tip kumno ngin leh, hynrei ngi phai sha me na ka bynta ka jingïarap.”

¹³ Baroh ki rangbah ka Judah, ryngkat bad ki tnga bad ki khun jong ki, ki ïeng hangta ha ka Templ.

¹⁴ U Mynsiem jong U Trai u wan ha u Lebi uba don hapdeng u paidbah. Ka kyrteng jong u ka long u Jahasiel, u khun jong u Sekharaïah; u long u dkhot jong ka kur u Asaph bad u hiarpateng na u Asaph lyngba u Mattanaïah, u Jeiel bad u Benaïah.

¹⁵ U Jahasiel u ong, “Ko syiem bad baroh ma phi u paid Judah bad Jerusalem, U Trai u ong ba phim dei ban rit mynsiem ne sheptieng ban ïeng pyrshah ïa kane ka kynhun shipai ba bun paid. Ka thma ka shong ha U Blei, ym ha phi.

¹⁶ Tur pyrshah ïa ki la shai ka sngi haba kin wan kiew na ka them ha Sis. Phin ïakynduh ïa ki ha kaba kut jong ka them kaba poi sha ka ri khlaw hajan Jeruel.

¹⁷ Phin ym hap ban ïaleh ïa kane ka thma. Shu don ha la ki jaka bad ap; phin ïohi U Trai u ai jingjop ïa phi. Ko ki briew jong ka Judah bad Jerusalem, wat sangeh ne sheptieng. Leit sha ka thma, bad U Trai un long ryngkat bad phi!”

¹⁸ Nangta u syiem Jehoshaphat u dem ngon, ka khmat jong u kaba dei ha ka khyndew, bad baroh u paidbah u dem ryngkat bad u bad mane ïa U Trai.

¹⁹ Ki Lebi kiba dei na ka kur u Kohath bad u Korah ki ïeng bad da ka sur kaba jam ki ïaroh ïa U Trai, U Blei ki Israel.

²⁰ Dang step eh, ha ka sngi kaba bud, u paidbah u mih ban leit sha ka ri khlaw hajan Tekoa. Katba ki dang sdang leit, u Jehoshaphat u kren ïa ki da kine ki ktien: “Ko ki briew ka Judah bad Jerusalem! Buh ïa ka jingngeit jong phi ha U Trai U Blei jong phi, bad phin long skhem. Ngeit ïa kaei kaba ki nongïathuhlypa ki ong ïa phi bad phin jop.”

²¹ Hadien ba u la ïakren bad u paidbah, u syiem u hukum ïa katto katne ki nongtem nongput ban phong ïa ki jingriam kiba ki ju phong ha ki por bakyntang bad ban ïaid na khmat ka kynhun shipai, da kaba rwai: “Ïaroh ïa U Trai! Ka jingieit jong u ka long bymjukut!”

²² Haba ki la sdang ban rwai, U Trai u pynlong ïa ki kynhun shipai ba wan tur ïaleh, ban ngat hapdeng ka jingsheptieng.

²³ Ki Amon bad ki Moab ki tur ïaleh ïa ka kynhun shipai ki Edom bad pynjot thiaw ïa ka, bad hadien kata, ki ïaphai pyrshah para ma ki ha ka jingïaleh bashyrkhei.

²⁴ Haba ka kynhun shipai Judah ka la poi ha ka jaka ba don u mot ha ka ri shyiap, ki peit sha ki nongshun bad ïohi ba ki la thiah ïap ha madan. Ym don uwei uba lait phet.

²⁵ U Jehoshaphat bad ki shipai jong u ki leit bad lute, bad ki shem bun ki jingri, ki mar ki mata, ki jaiñ ki nep bad kiwei ki mar baremdor. Ki pynlut lai sngi ban lum ïa ka jinglute, hynrei la don bun palat haduh ba kim lah shuh ban rah lut.

²⁶ Ha ka sngi kaba saw, ki ïalumlang ha ka Them Berakah bad ïaroh ïa U Trai na ka bynta baroh kaba u la leh. Dei na kata ka daw ba la khot ïa ka them, “Ka Berakah.”

²⁷ U Jehoshaphat u ïalam pat ïa ki shipai sha Jerusalem ha ka jingjop, namar U Trai u la jop ïa ki nongshun jong ki.

²⁸ Haba ki la poi ha ka nongbah, ki ïaid sha ka Templ, ryngkat bad ki jingtem jingput ki duitara bad ki turoi.

²⁹ Kawei pa kawei ka hima kaba la ïohsngew kumno U Trai u la jop ïa ki nongshun jong ki Israel, ka la sheptieng haduh katta katta.

³⁰ Kumta u Jehoshaphat u synshar ha ka jingsuk, bad U Blei u ai ha u ka jingshongshngain ha ki liang baroh.

Ka jingkut ka jingsynshar u Jehoshaphat

³¹ U Jehoshaphat u la long syiem ka Judah mynba u dap laiphew san snem ka rta bad u synshar ha Jerusalem arphew san snem. Ka kmie jong u ka dei ka Asubah, ka khun jong u Shilhi.

³² Kum u kpa jong u, u Asa, ha shuwa jong u, u la leh ïa kaei kaba dei ha khmat U Trai;

³³ hynrei ïa ki jaka mane ba-thala ym shym la pynjot. Ki briew kim pat shym la phai da ka dohnud baroh ban shakri ïa U Blei jong ki kpa tymmen jong ki.

³⁴ Baroh kiei kiei kiba u Jehoshaphat u la leh, naduh kaba sdang jong ka jingsynshar jong u haduh kaba kut, la buh jingthoh ha Ka Histori u Jehu u khun jong u Hanani, kaba long shi bynta jong Ka Histori Jong Ki Syiem Ka Israel.

³⁵ Ha kawei ka por, u Jehoshaphat u syiem Judah u la pynlong ka jingïateh lok bad u Ahasaïah u syiem ka Israel, uba la leh bun kiei kiei kiba sniew.

³⁶ Ha ka kadlieng Esiongeber ki thaw ïa ki liengbah ïaid duriaw.

³⁷ Hynrei u Elieser u khun jong u Dodabahu, na ka shnong Mareshah, u la maham ïa u Jehoshaphat bad ong, “Namar ba phi la ïateh lok bad u Ahasaïah, U Trai un sa pynjot ïa kaei kaba phi la tei.” Bad ki liengbah ki la shah pynjot bad kim shym la lah ban ïaid duriaw.