2 KHRONIKL 2 - Khasi CL Bible (BSI)

Ki jingpynkhreh ban tei ïa ka Templ

¹ U syiem Solomon u la rai ban tei ïa ka Templ ha kaba yn mane ïa U Trai, bad ruh ban tei ka ïingsyiem na ka bynta ïa lade.

² U buh hynñiewphew hajar ngut ki rangbah ban trei ha kaba pynbiang ïa ki tiar ki tar, bad phraphew hajar ngut ban trei ha kaba tih maw. La don lai hajar hynriewspah ngut kiwei pat kiba kitkhlieh na ka bynta ban pynïaid ïa ka kam.

³ U Solomon u phah khubor sha u Hiram u syiem ka Tyros: “To ïakhaïi bad nga kumba phi la leh bad u syiem Dabid, u kpa jong nga, mynba phi la die ïa u ki dieng Kedar tylli na ka bynta ban tei ïa ka ïingsyiem jong u.

⁴ Nga tei ka Templ ban ai burom ïa U Trai U Blei jong nga. Kan long ka jaka bakhuid ha kaba ki briew jong nga bad ma nga ngin mane ïa u da kaba thang ki jingiwbih da ki musla iwbih, bad ha kaba ngin ïai ai ki jingainguh ha u da u kpu kyntang, bad ha kaba ngin ai ki jingainguh thang man ka step bad janmiet, kumjuh ruh ha ki sngi Sabbaton, ki Jingrakhe Bnai Thymmai, bad kiwei pat ki sngi khuid ban ai burom ïa U Trai U Blei jong ngi. U la hukum ïa ki Israel ban leh ïa kane junom la junom.

⁵ Nga thmu ban tei ka Templ kaba khraw, namar U Blei jong ngi u kham khraw ban ïa uno uno uwei pat u blei.

⁶ Pynban ym don uno uno uba lah shisha ban tei ka Templ na ka bynta U Blei, namar wat ka jingïar jong ka bneng kam lah ban ngiam ïa u. Kumno te nga lah ban tei ka Templ ka ban long kaba kumno kumno kaba kham heh ban ïa ka jaka ban thang jingiwbih ïa U Blei?

⁷ Mynta to phah sha nga u briew uba tbit ban ohdur, ban trei ha ka ksiar, ka rupa, ka rnong, bad ka nar, bad ha kaba thain ïa ka jaiñ kaba jngum, kaba sawbthuh, bad kaba rong saw. Un trei bad ki nongshna jingshna jong ka Judah bad Jerusalem kiba u Dabid u kpa jong nga u la jied.

⁸ Nga tip haduh katno ka jingtbit jong ki nongot dieng jong phi, kumta to phah ïa nga ki dieng Kedar, ki dieng Kseh-Sypress, bad ki dieng Kseh-Juniper tylli na Lebanon.

⁹ Nga kloi ban phah ïa ki rangbah jong nga bad ïarap lem ïa ki jong phi ha kaba pynkhreh shibun ki dieng, namar kane ka Templ kaba nga mut ban tei kan long kaba khraw bad kaba ishongkun.

¹⁰ Kum ka jingpynbiang ïa ki nongtrei jong phi, ngan phah sha phi ar hajar ton u kew, ar hajar ton u barli, saw lakh litar ka waiñ bad saw lakh litar ka umphniang Olib.”

¹¹ U syiem Hiram ha kaba jubab u phah da ka shithi sha u Solomon. U thoh, “Namar U Trai u ieit ïa la ki briew, u la pynlong ïa phi u syiem jong ki.

¹² Ïaroh ïa U Trai U Blei ki Israel, u Nongthaw ïa ka bneng bad ka khyndew! U la ai ha u syiem Dabid, ïa u khun uba stad, uba dap da ka jingshemphang bad ka jingtbit, uba mynta u thmu ban tei ka Templ na ka bynta U Trai bad ka ïingsyiem na ka bynta ïa lade.

¹³ Nga phah sha phi u nongshna jingshna uba stad bad uba tbit bha, uba kyrteng u Huram.

¹⁴ Ka kmie jong u ka dei ka dkhot na ka jait Dan, bad u kpa jong u, u dei u traishnong jong ka Tyros. U tip kumno ban thaw ïa kiei kiei na ka ksiar, ka rupa, ka rnong, ka nar, u maw bad ka dieng. U lah ruh ban trei bad ki jaiñ kiba jngum, sawbthuh, bad kiba rong saw, bad ka linen. U lah ban trei ïa bun jait ki jingohdur bad u lah ban bud ïa kano kano ka jingsaiñ dur kumba la ai jingmut ïa u. Shah ïa u ban trei bad ki nongtrei jong phi kiba tbit bad kito kiba la trei na ka bynta u syiem Dabid, u kpa jong phi.

¹⁵ Kumta mynta to phah sha ngi ïa u kew, u barli, ka waiñ, bad ka umphniang Olib ba phi la kular.

¹⁶ Ha ki lum Lebanon ngin khet ïa ki dieng Kedar baroh katba phi donkam, ngin teh ïa ki ha ki bur, bad pynkie ïa ki ha ka duriaw shaduh Joppa. Na kata ka jaka phi lah ban kit ïa ki sha Jerusalem.”

Ka jingsdang ka jingtei ïa ka Templ

¹⁷ U syiem Solomon u shim jingkheiñ ïa ki nongwei baroh kiba shong ha ka ri Israel, syriem kum ka jingkheiñbriew kaba la shim da u Dabid u kpa jong u. La don shi lakh sanphew lai hajar hynriewspah ngut ki nongwei kiba shong basah.

¹⁸ U la pynbeit hynñiewphew hajar ngut na ki ban kit ïa ki tiar ki tar bad phraphew hajar ngut ban shtah maw ha ki jaka lum, bad u la thung lai hajar hynriewspah ngut ki nongpynïaidkam ki ban pynthikna ba yn pyndep ïa ka kam.