2 KHRONIKL 19 - Khasi CL Bible (BSI)

U nongïathuhlypa u sneng ïa u Jehoshaphat

¹ U Jehoshaphat u syiem Judah u wan phai khlem shah pynïap sha ka ïingsyiem ha Jerusalem.

² U nongïathuhlypa, u Jehu u khun jong u Hanani, u leit ban ïakynduh ïa u syiem bad ong ha u, “Hato ka long kaba dei ban ïarap ïa kito ki briew kiba sniew bad ban ïashah bad kito kiba isih ïa U Trai? Kaei kaba phi la leh ka la wallam ïa ka jingbitar U Trai halor jong phi.

³ Hynrei la katta ruh, ka dang don katto katne ka jingbha ha phi. Phi la weng baroh ki dur jong ka blei Asherah kaba ki briew ki mane, bad phi la pyrshang ban bud ïa ka mon U Blei.”

Ki jingpynthymmai u Jehoshaphat

⁴ Wat la u syiem Jehoshaphat u shong u sah ha Jerusalem, u leit borabor sha ki briew, na Beersheba shaphang shathie shaduh kaba kut jong ka ri lum Ephraim shaphang shatei, khnang ban khot pat ïa ki briew sha U Trai, U Blei jong ki kpa tymmen jong ki.

⁵ U thung ki nongbishar ha kawei pa kawei ka nongbah ba la tei kut jong ka Judah bad u bthah ïa ki:

⁶ “Da pyrkhat bha haba phi ai jingrai; phim pyndep ïa ka kam ha ka bor briew, hynrei ha ka bor U Trai, bad u long bad phi haba phi ai ïa ka jingrai.

⁷ Burom ïa U Trai bad trei bha, namar U Trai U Blei jong ngi um lah shah ïa ka jingleh bymdei lane ka jingleh shiliang khmat lane ka jingshim pisa thok.”

⁸ Ha Jerusalem, u Jehoshaphat u thung ïa ki Lebi, ki lyngdoh bad katto katne ki riewkhmat ka shnong kum ki nongbishar ha ki kam ba ïadei bad ka jingpynkheiñ ïa ka Hukum U Trai lane ki jingïakajia ba dei ïa ka aiñ hapdeng ki nongshong shnong jong ka nongbah.

⁹ U ai ha ki ïa kine ki jingbthah: “Phi dei ban pyndep ïa ki kamram jong phi ha ka jingsheptieng burom ïa U Trai, da kaba kohnguh hok ïa u ha kiei kiei ba phi leh.

¹⁰ Haba ki para nongshong shnong na kino kino ki nongbah ki wallam ha khmat jong phi ïa ka kam pynïap briew ne kano kano ka jingpynkheiñ ïa ka aiñ ne ka hukum, phi dei ban bthah bha ïa ki kumno ba ki dei ban leh donakor ïa lade ha ka por jong ka jingbishar, khnang ba kin ym leh pop pyrshah ïa U Trai. Lada phim leh kumta, ma phi bad ki para nongshong shnong jong phi, kin sngew ïa ka bor jong ka jingbitar U Trai. Hynrei lada phi leh ïa la ka kamram, phin long kiba la ksan.

¹¹ U Amaraïah u Rangbah Lyngdoh, un don ïa ka bor kaba hakhlieh tam ha baroh ki kam niam, bad u Sebadaïah u khun jong u Ishmael, u lat ka Judah, un don ïa ka bor bahakhlieh duh ha baroh ki kam hima sima. Ki Lebi kin kitkhlieh ban peit halor ki jingpyntreikam ïa ki jingrai jong ki ïingbishar. Long shlur bad pyndep ïa kine ki jingbthah, bad to U Trai un long ha ka liang jong kiba leh ïa kaba dei!”