2 KHRONIKL 18 - Khasi CL Bible (BSI)

U Mikaïah u maham ïa u Ahab

¹ Haba u Jehoshaphat u syiem ka Judah u la riewspah bad pawnam, u la pynbeit ïa ka jingshongkurim hapdeng u dkhot ka longïing jong u bad ka longïing u Ahab u syiem ka Israel.

² Bun snem hadien, u Jehoshaphat u leit sha ka nongbah Samaria ban leit khmih ïa u Ahab. Ban lehburom ïa u Jehoshaphat bad kito kiba bad u, u Ahab u phah pynïap shibun ki langbrot bad ki masi ban pynlong ka jingkhawai. U pyrshang ban pynkohnguh ïa u Jehoshaphat ban ïasnohkti lang bad u ha kaba tur ïaleh ïa ka nongbah Ramoth ha Gilead.

³ U ong, “Phin leit bad nga ban tur ïaleh ïa ka Ramoth?” U Jehoshaphat u jubab, “Nga long uba la kloi haba phi la kloi, bad kumjuh ruh ka kynhun shipai jong nga. Ngin ïasnohkti lang bad phi.”

⁴ Nangta u ong shuh, “Hynrei nyngkong, to ngin ïakylli ïa U Trai.”

⁵ Kumta u Ahab u khot shapoh ïa ki nongïathuhlypa, kumba sawspah na ki, bad u kylli ïa ki, “Hato ngan leit bad tur ïaleh ïa ka Ramoth, ne em?” “Tur ïaleh ïa ka,” ki jubab. “U Blei un ai jingjop ïa phi.”

⁶ Hynrei u Jehoshaphat u kylli, “Hato ym don sa uwei pat u nongïathuhlypa ïa uba ngin kylli ïa U Trai?”

⁷ U Ahab u jubab, “Don sa uwei, u Mikaïah u khun jong u Imlah. Hynrei nga isih ïa u namar um ju ïathuhlypa kaba bha ïa nga; ka ju long borabor kaei kaei kaba sniew.” “Phim dei ban ong kumta!” u Jehoshaphat u jubab.

⁸ Kumta u syiem Ahab u khot shapoh ïa u rangbah ka ïingsyiem bad ong ïa u ban leit bad wallam shisyndon ïa u Mikaïah.

⁹ Baroh ar ngut ki syiem, ba la riam ha ki jingphong syiem, ki shong halor ki khet jong ki ha ka jaka shoh kew kaba don shabar ka khyrdop jong ka Samaria, bad baroh ki nongïathuhlypa ki ïathuhlypa ha khmat jong ki.

¹⁰ Uwei na ki, u Sedekaïah, u khun jong u Khenaanah, u thaw ki reng nar bad u ong ha u Ahab, “Kane ka dei kaba U Trai u ong, ‘Da kine phin ïaleh ïa ki Syria bad jop thiaw ïa ki.’”

¹¹ Baroh kiwei pat ki nongïathuhlypa ki ong ïa kajuh. “Tur pyrshah ïa ka Ramoth bad phin sa jop,” ki ong, “U Trai un ai ïa phi ka jingjop.”

¹² Ha kata ka por, u rangbah synshar uba la leit ban wallam ïa u Mikaïah u ong ha u, “Baroh kiwei pat ki nongïathuhlypa ki la ïathuhlypa ïa ka jingjop na ka bynta u syiem, ka bha ba phi ruh phin leh kumjuh.”

¹³ Hynrei u Mikaïah u jubab, “Da U Trai uba im, ngan ong ïa kaei kaba U Blei u ong ïa nga ban ong!”

¹⁴ Haba u ïeng ha khmat u syiem Ahab, u syiem u kylli ïa u, “Ko Mikaïah, hato u syiem Jehoshaphat bad nga ngin leit bad tur ïaleh ïa ka Ramoth, ne em?” “Tur!” u Mikaïah u ong. “Da shisha phin jop. U Trai un ai ïa phi ka jingjop.”

¹⁵ Hynrei u Ahab u jubab, “Haba phi ong ïa nga ha ka kyrteng U Trai, ong ïa ka jingshisha! Katno sien ba nga hap ban ong ha phi ïa kata?”

¹⁶ U Mikaïah u jubab, “Nga ïohi ïa ka kynhun shipai Israel ba la pynsakma halor ki lum kum ïa ki langbrot bym don nongsharai. Bad U Trai u ong, ‘Kine ki rangbah kim don nongïalam; ai ba kin leit phai noh sha la ïing ha ka jingsuk.’”

¹⁷ U Ahab u ong ïa u Jehoshaphat, “Nga la ong ïa phi ba um juh ïathuhlypa ïa kano kano kaba bha ïa nga; ka long borabor kaei kaei kaba sniew!”

¹⁸ U Mikaïah u ong shuh: “Mynta sngap ïa kaei kaba U Trai u ong! Nga ïohi ïa U Trai ba u shong halor ka khet jong u ha bneng, ryngkat bad baroh ki angel jong u kiba ïeng harud jong u.

¹⁹ U Trai u kylli, ‘Mano ban shukor ïa u Ahab khnang ba un leit bad shah pynïap ha Ramoth?’ Katto katne ki angel ki ong ïa kawei, bad kiwei pat ki ong ïa kawei pat,

²⁰ haduh ba u mynsiem u wan sha khmat, u wan ha U Trai, bad ong, ‘Ngan shukor ma nga ïa u.’ ‘Kumno?’ U Trai u kylli.

²¹ U mynsiem u jubab, ‘Ngan leit bad ngan pynlong ïa baroh ki nongïathuhlypa u Ahab ban kren lamler.’ U Trai u ong, ‘Khie leit bad shukor ïa u. Phin jop.’ ”

²² Bad u Mikaïah u pynkut: “Kane ka dei kaei kaba la jia. U Trai u pynlong ïa kine ki nongïathuhlypa jong phi ban lamler ïa phi. Hynrei u hi da lade u la dep rai ba phin ïakynduh ïa ka jingshyrkhei!”

²³ Nangta u Sedekaïah nongïathuhlypa u leit sha u Mikaïah, u thab ïa u bad kylli, “Naduh mynno u mynsiem U Trai u la mih na nga bad kren ha phi?”

²⁴ “Phin shem ïa kata ynda phin leit sha ka kamra ba shadien ban rieh,” u Mikaïah u jubab.

²⁵ Nangta u syiem Ahab u hukum ïa uwei na ki rangbah nongpynïaidkam, “Kem ïa u Mikaïah bad leit lam ïa u sha u Amon, u lat ka nongbah, bad sha u khun syiem Joash.

²⁶ Ong ha ki ban thep ïa u ha ka byndi bad ban ai ha u ïa u kpu bad ka um haduh ba ngan da wan phai khlem shah pynïap.”

²⁷ “Lada phi wan phai khlem shah pynïap,” u Mikaïah u pyrta, “te U Trai um shym la kren lyngba jong nga!” Bad u ong shuh, “Sngap ïa nga phi baroh, ïa kaei kaba nga la ong!”

Ka jingïap jong u Ahab

²⁸ Hadien kata, u Ahab u syiem Israel bad u Jehoshaphat u syiem Judah ki leit tur ïaleh ïa ka nongbah Ramoth ha Gilead.

²⁹ U Ahab u ong ïa u Jehoshaphat, “Haba ngi leit sha ka thma, ngan riam pher ïa lade, hynrei ma phi, phong ïa ki jaiñ syiem jong phi.” Kumta u syiem Israel u leit sha thma ha ka jingriam pher.

³⁰ U syiem ka Syria u la hukum ïa ki nongïalam ki kali ïapom ban ym tur ïaleh ïano ïano ruh hynrei tang ïa u syiem Israel.

³¹ Kumta haba ki ïohi ïa u syiem Jehoshaphat, baroh ki tharai ba u dei u syiem Israel, bad ki phai ban tur ïaleh ïa u. Hynrei u Jehoshaphat u la pyrta, bad U Trai U Blei u la pyllait im ïa u bad pynphai noh ïa ka jingtur ïaleh na u.

³² Ki nongïalam jong ki kali ïapom ki ïohi ba um dei u syiem Israel, kumta ki sangeh noh na kaba thwet ïa u.

³³ Kumno re kumno pat, u shipai Syria u siat ïa u khnam uba dei ïa u syiem Ahab hapdeng ka jaka bapyndait ïa ka jingkieng atiar jong u. “Nga la mynsaw!” u pyrta sha u nongñiah ka kali ïapom jong u. “Phai noh bad phet noh na ka thma!”

³⁴ Katba ka thma ka dang jur, u syiem Ahab u kyrshan tyngeh ïa lade ha ka kali ïapom jong u pyrshah ïa ki Syria. Ha ka por sep sngi u ïap noh.