2 KHRONIKL 17 - Khasi CL Bible (BSI)

U Jehoshaphat u long syiem

¹ U Jehoshaphat u long syiem hadien u Asa u kpa jong u, bad u la pynkhlaiñ ïa lade pyrshah ïa ka Israel.

² U pynap shipai ha ki nongbah ba la tei kut ka Judah, ha ki rudnong Judah, bad ha ki nongbah kiba u Asa u la jop ha ka ri ki Ephraim.

³ U Trai u la kyrkhu ïa u Jehoshaphat namar u la bud ïa ka nuksa ba-mynshuwa jong ka jingim u kpa jong u bad um shym mane ïa u Baal.

⁴ U shakri ïa U Blei jong u kpa jong u, u kohnguh ïa ki hukum U Blei, bad um shym leh ha ka rukom ba ki syiem Israel ki la leh.

⁵ U Trai u la ai ïa u Jehoshaphat ka jingsynshar baskhem halor ka hima Judah, bad baroh ki briew ki wallam ki jingai sngewbha, ba kumta u long uba riewspah bad ïoh ïa ka burom bakhraw.

⁶ U sngewsarong ha ka jingshakri ïa U Trai bad pynjot ïa baroh ki jaka mane blei thala bad ïa ki dur jong ka blei Asherah ha Judah.

⁷ Ha ka snem kaba lai jong ka jingsynshar jong u, u phah ïa kine ki rangbah synshar ban hikai ha ki nongbah ka Judah: u Benhail, u Obadaïah, u Sekharaïah, u Nethanel bad u Mikaïah.

⁸ La synran ïa ki da khyndai ngut ki Lebi bad ar ngut ki lyngdoh. Ki Lebi ki long u Shemaïah, u Nethanaïah, u Sebadaïah, u Asahel, u Shemiramoth, u Jehonathan, u Adonijah, u Tobijah bad u Tobadonijah; bad ki lyngdoh ki long u Elishama bad u Jehoram.

⁹ Ki shim ïa ka kitab jong ka Hukum U Trai bad ki leit lyngba ïa baroh ki shnong ka Judah, da kaba hikai ïa ka ha ki briew.

Ka jingkhraw jong u Jehoshaphat

¹⁰ U Trai u pynlong ïa ki hima kiba don sawdong ban sheptieng ban leit ïaleh thma pyrshah ïa u syiem Jehoshaphat.

¹¹ Katto katne ki Philistia ki wallam sha u Jehoshaphat shibun bah ka rupa bad kiwei ki jingai sngewbha, bad katto katne ki Arab ki wallam hynñiew hajar hynñiewspah tylli ki langbrot bad hynñiew hajar hynñiewspah tylli ki blang.

¹² Kumta u Jehoshaphat u nang roi bad nang khrawbor.

¹³ Ha kylleng ka Judah u tei ki kut bad ki nongbah, ha kiba la buh bun bah ki mar ki mata. Ha Jerusalem, u buh ki rangbah synshar kiba tbit bha, kat kum ki kur jong ki.

¹⁴ U Adnah u long u nongïalam shipai na ki kur ka Judah, bad u don lai lakh ngut ki shipai hapoh jong u.

¹⁵ Uba ar ha ka kyrdan u dei u Jehohanan uba don ar lakh phraphew hajar ngut ki shipai,

¹⁶ bad uba lai u dei u Amasaïah u khun jong u Sikhri uba don ar lakh ngut ki shipai. (U Amasaïah u trei mon sngewbha ban shakri ïa U Trai.)

¹⁷ U nongïalam jong ki shipai na ka kur Benjamin u dei u Eliada, u shipai batbit, uba long halor ki ar lakh ngut ki rangbah ba la kieng atiar da ki stieh bad ki ryntieh.

¹⁸ Uba hapoh jong u ha ka jingïalam ïa ki shipai u dei u Jehosabad uba long halor ki shi lakh phraphew hajar ngut ki rangbah, kiba la kieng atiar bha na ka bynta ka thma.

¹⁹ Kine ki rangbah ki shakri ïa u syiem ha Jerusalem, bad nalor kata, u buh ruh kiwei pat ki shipai ha kiwei ki nongbah ba la tei kut jong ka Judah.