2 KHRONIKL 16 - Khasi CL Bible (BSI)

¹ Ha ka snem kaba laiphew hynriew jong ka jingsynshar u Asa u syiem ka Judah, u Baasha u syiem ka Israel u hiarthma ïa ka Judah bad sdang ban tei kut ïa ka Ramah khnang ban khang noh ïa ka jingïaid lynti shapoh bad shabar ka Judah.

² Kumta u Asa u shim rupa bad ksiar na ka jingkynshew jong ka Templ bad ka ïingsyiem bad phah sha Damaskos, sha u Benhadad u syiem Syria, ryngkat bad kane ka khubor:

³ “To ngin ïalong paralok, kumba ki kpa jong ngi ki la ïalong. Kane ka rupa bad ka ksiar ki long ka jingai sngewbha ïa phi. Mynta pynkheiñ noh ïa ka jingïateh lok bad u Baasha u syiem Israel khnang ba un weng noh ïa ki shipai jong u na ka ri jong nga.”

⁴ U Benhadad u la mynjur ïa ka jingtyrwa u Asa bad u phah ïa ki nongïalam shipai bad ki kynhun shipai jong ki ban tur ïaleh ïa ki nongbah ka Israel. Ki jop ïa ka Ijon, Dan, Abel Beth Maakah, bad baroh ki nongbah ka Naphtali ha kiba la buh ïa ki mar ki mata.

⁵ Haba u syiem Baasha u la ïohsngew ïa kaei kaba jia, u sangeh na kaba tei kut ïa ka Ramah bad iehnoh ïa ka kam.

⁶ Nangta u syiem Asa u lum ïa ki rangbah na baroh sawdong ka Judah bad hukum ïa ki ban rah noh ïa ki maw bad ki dieng sawdong kiba u Baasha u pyndonkam ha Ramah, bad ki pyndonkam ïa ki ban tei kut ïa ki nongbah ka Geba bad Mispah.

U Hanani u lyngdoh

⁷ Ha kata ka por u Hanani lyngdoh u leit sha u syiem Asa bad ong, “Namar ba me la shaniah ha u syiem Syria ban ïa kaba shaniah ha U Trai U Blei jong me, ka kynhun shipai u syiem Israel ka la lait phet na me.

⁸ Hato ki Sudan bad ki Libya kim don ki kynhun shipai baheh paid ryngkat bad ki kali ïapom bad ki nongshong kulai? Hynrei namar ba me la shaniah ha U Trai, u la ai ka jingjop ïa me halor jong ki.

⁹ U Trai u khmih bha ïa ka pyrthei baroh kawei, ban ai ka jingkhlaiñ ïa kito kiba ki dohnud jong ki, ki ïaineh ha u. Me la leh bieit, bad kumta naduh mynta men don borabor ha ka jingïaleh thma.”

¹⁰ Kane ka la pynlong ïa u Asa ban bitar haduh katta katta ïa u nongïathuhlypa bad phah teh kynjri ïa u. Ka la long ha kane kajuh ka por ba u Asa u sdang ban lehbeiñ tyngeh ïa katto katne ngut ki briew.

Ka jingkut jong ka jingsynshar u Asa

¹¹ Baroh ki jingjia ha ka jingsynshar u Asa naduh kaba nyngkong haduh kaba kut la buh jingthoh ha Ka Histori Jong Ki Syiem Ka Judah Bad Ka Israel.

¹² Ha ka snem kaba laiphew khyndai ba u Asa u long syiem, u la dkoh na ka jingpang kjat kaba jur; wat la katta ruh um shym la phai sha U Trai na ka bynta ka jingïarap, hynrei sha ki nongpynkhiah.

¹³ Hadien ar snem u ïap noh

¹⁴ bad la tep ha ka jingtep mawsiang ïa kaba u la shna na ka bynta ïa lade ha ka nongbah u Dabid. Ki la pyndonkam ki musla bad ki umphniang iwbih ban pynkhreh ïa ka met jong u na ka bynta ka jingontep, bad ki la tei ïa ka ding kaba khraw ban leh sngewsih ïa ka jingïap jong u.