2 KHRONIKL 15 - Khasi CL Bible (BSI)

Ki jingpynthymmai kam u Asa

¹ U Mynsiem jong U Blei u la wan ha u Asaraïah u khun jong u Oded, bad u la leit ban ïakynduh ïa u syiem Asa.

² U la ong, “Shahshkor ïa nga, ko syiem Asa, bad phi u paidbah baroh jong ka Judah bad Benjamin! U Trai u long lem bad phi katba phi dang ïailong bad u. Lada phi ap khmih ïa u, un shah ba phin shem ïa u, hynrei lada phi phai na u, un iehnoh noh ïa phi.

³ Slem bah ki Israel ki la im khlem U Blei uba shisha, khlem ki lyngdoh ban hikai ïa ki, bad khlem ka hukum.

⁴ Hynrei haba ka jingjynjar ka wan, ki phai sha U Trai, U Blei ki Israel. Ki la wad ïa u bad shem ïa u.

⁵ Ha kito ki sngi ym don mano mano ba lah ban wan bad leit ha ka jingshngain, namar ba ka la don ka jingjynjar bad jingkhihwin ha ka ri baroh.

⁶ Kawei ka jaitbynriew ka banbeiñ ïa kawei pat ka jaitbynriew, bad kawei ka nongbah ka banbeiñ ïa kawei pat ka nongbah, namar U Blei u wanrah ka jingjynjar bad jingshitom ha ki.

⁷ Hynrei phi dei ban long kiba khlaiñ bad phim dei ban noh mynsiem. Ka kam kaba phi leh yn sa ai bainong.”

⁸ Haba u Asa u la ïohsngew ïa ka jingïathuhlypa ba u Asaraïah u khun jong u Oded u la kren, u la ïoh mynsiem. U la pynkynriah noh ïa ki bleithaw baroh ha ka ri Judah bad Benjamin bad baroh ki bleithaw ha ki nongbah kiba u la kurup ha ka ri lum Ephraim. U tei pynbha ruh ïa ka duwan U Trai kaba ïeng ha phyllaw jong ka templ.

⁹ Bun ki briew ki wan sha ka liang u Asa na Ephraim, Manasseh, bad Simeon, bad ki shong ki sah ha ka hima jong u, namar ki la ïohi ba U Trai u long lem bad u. U Asa u phah khot ïa ki baroh bad ïa ki paid Judah bad Benjamin.

¹⁰ Ki ïalumlang ha Jerusalem ha u bnai uba lai jong ka snem kaba khatsan ba u Asa u long syiem.

¹¹ Ha kata ka sngi ki ai jingkñia ha U Trai na ka jinglute kaba ki la wanrah biang: hynñiewspah tylli ki khlieh jong ki masi bad hynñiew hajar tylli ki langbrot.

¹² Ki pynlong ka jutang ha kaba ki mynjur ban mane ïa U Trai, U Blei jong ki kpa tymmen jong ki, da ka dohnud bad ka mynsiem jong ki baroh.

¹³ Mano mano, samla ne tymmen, shynrang ne kynthei, ki bym mane ïa U, la pynïap.

¹⁴ Ha ka sur kaba jam ki shim ïa ka jingsmai ha ka kyrteng U Trai ba kin bat ïa ka jutang, bad nangta ki pyrta bad ki put ïa ki turoi.

¹⁵ Baroh ki paid ka Judah ki la kmen namar ki la pynlong ïa kane ka jutang da ka dohnud baroh. Ki shem sngewbha ha ka jingmane ïa U Trai, bad u pdiang ïa ki bad u ai ha ki ka jingsuk na ki liang baroh.

¹⁶ U Syiem Asa u pynkynriah ïa ka Maakah ka kmierad jong u na ka kyrdan kum ka syiemsad, namar ka la thaw ka bleithaw kynsha jong ka Asherah ka blei jingseisoh. U Asa u pynpra ïa ka bleithaw, u pyndkut ïa ka, bad u thang ïa ki lyngkhot ha ka them Kidron.

¹⁷ Wat la u Asa um shym pynjot ïa baroh ki jaka mane blei thala ha ka ri, u ïailong uba ïaineh ha U Trai shi lynter ka jingim jong u.

¹⁸ U buh ha ka Templ ïa baroh ki tiar kiba u Abijah u kpa jong u, u la pynkyntang sha U Blei, kumjuh ruh ïa ki tiar ba la shna da ka ksiar bad ka rupa kaba u hi u la pynkyntang.

¹⁹ Ym shym don thma shuh haduh ka snem kaba laiphew san jong ka jingsynshar jong u.