2 KHRONIKL 14 - Khasi CL Bible (BSI)

U syiem Asa u jop ïa ki nong Sudan

¹ U syiem Abijah u la ïap bad la tep ïa u ha ka jingtep ki syiem ha ka nongbah u Dabid. U Asa u khun jong u, u long syiem ha ka jaka jong u, bad hapoh ka jingsynshar u Asa ka ri ka mad ïa ka jingsuk haduh shiphew snem.

² U Asa u pynsngewbha ïa U Trai, U Blei jong u, da kaba leh ïa kaei kaba dei bad kaba bha.

³ U weng noh ïa ki duwan nongwei bad ïa ki jaka mane blei thala, u pynpra ïa ki rishot maw bakyntang, bad u ot noh ïa ki dur jong ka blei Asherah.

⁴ U hukum ïa ki paid ka Judah ban leh ïa ka mon jong U Trai, U Blei jong ki kpa tymmen jong ki, bad ban kohnguh ïa ki jinghikai bad hukum jong u.

⁵ Namar ba u pynduh noh ïa ki jaka mane blei thala bad ki duwan jingiwbih na baroh ki nongbah jong ka Judah, ka hima ka don ha ka jingsuk hapoh ka jingsynshar jong u.

⁶ U tei ïa ki kynroh na ka bynta ki nongbah ka Judah ha ka por jong u, bad ym shym don thma bun bun snem, namar ba U Trai u ai ha u ïa ka jingsuk.

⁷ U ong ïa ki paid Judah, “To ngin pynskhem ïa ki nongbah da kaba tei ïa ki kynroh bad ki kut, bad ki khyrdop kiba lah ban khang khyrdep. Ngi long trai ïa ka ri namar ba ngi la leh ïa ka mon U Trai U Blei jong ngi. U la ïada ïa ngi bad u la ai jingshngain na ki liang baroh.” Bad kumta ki tei bad ki manbha.

⁸ U syiem Asa u don ka kynhun shipai kaba lai lakh ngut ki rangbah na Judah, kiba kieng atiar da ki stieh bad ki sum, bad ar lakh phraphew ngut ki rangbah na Benjamin, kiba kieng atiar da ki stieh bad ki ryntieh. Baroh na ki, ki long kiba shlur, ki rangbah ba la pyntbit bha.

⁹ U nong Sudan uba kyrteng u Serah u tur ïaleh ïa ka Judah ryngkat bad ka kynhun shipai kaba don shi million ki rangbah bad laispah tylli ki kali ïapom bad ki tur shaphrang haduh Mareshah.

¹⁰ U Asa u leit ban ïaleh ïa u, bad baroh arliang ki ïeng ha la ki jaka ha ka Them Sephathah hajan Mareshah.

¹¹ U Asa u duwai ha U Trai U Blei jong u, “A Trai, me lah ban ïarap ïa ka kynhun shipai kaba tlot da kaba suk kum kaba khlaiñ. Ïarap ïa ngi mynta, Ko Trai U Blei jong ngi, namar ba ngi shaniah ha me, bad ha ka kyrteng jong me ngi la mih ban ïaleh pyrshah ïa kane ka kynhun shipai kaba bun. A Trai, me long U Blei jong ngi; ym don u ban kyrmen ban jop ïa me.”

¹² U Trai u jop ïa ka kynhun shipai Sudan mynba u Asa bad ki kynhun shipai jong ka Judia ki tur ïaleh ïa ki.

¹³ Ki phet ïap, bad u Asa lem bad ki kynhun jong u ki beh kthong ïa ki haduh Gerar. Te bun na ki nong Sudan ki la ïap haduh ba ka kynhun shipai kam shym lah shuh ban lum pat bad ïaleh. Ki la shah pyndem lin ha U Trai bad ka kynhun shipai jong u, bad ka kynhun shipai ka la ïoh rah bun ka jinglute.

¹⁴ Nangta ki la lah ban pynjot ïa ki nongbah ha ki phang ka Gerar, namar ba ki briew hangta ki la khynñiuh ïa U Trai. Ka kynhun shipai ka la lute ïa baroh kito ki nongbah bad ki kurup shibun ka jinglute.

¹⁵ Ki tur ïaleh ruh ïa ki jaka sher dara jong ki katto katne ki nongaplangbrot, ki kurup ïa shibun ki langbrot bad ki ut. Nangta ki leit phai sha Jerusalem.