2 KHRONIKL 13 - Khasi CL Bible (BSI)

Ka thma hapdeng u Abijah bad u Jeroboam

¹ Ha ka snem kaba khatphra jong ka jingsynshar u Jeroboam u syiem ka Israel, u Abijah u long u syiem ka Judah, bad u synshar lai snem ha Jerusalem.

² Ka kmie jong u ka dei ka Mikaïah ka khun u Uriel, na ka nongbah Gibeah. Ka thma ka la khie hapdeng u Abijah bad u Jeroboam.

³ U Abijah u pynkhreh ka kynhun shipai kaba don saw lakh ngut, bad u Jeroboam u ïaleh pyrshah ïa u da ka kynhun shipai kaba don phra lakh ngut.

⁴ Ki kynhun shipai ki ïakynduh ha ri lum Ephraim. U syiem Abijah u kiew sha u lum Semaraim bad u pyrta sha u Jeroboam bad ki Israel: “Shahshkor ïa nga!” u ong.

⁵ “Hato phim tip ba U Trai, U Blei ki Israel, u la pynlong ka jutang bad u Dabid ka bym lah ban pynkheiñ, da kaba ai ha u bad ha ki khun ki ksiew jong u ïa ka jinglong syiem junom halor ki Israel?

⁶ U Jeroboam u khun jong u Nebat u ïeng ïaleh pyrshah ïa u Solomon, u syiem jong u.

⁷ Hadien u lumlang ïa ka kynhun ki riewmadan, bad ki pynbor ïa ka mon jong ki ha u Rehoboam u khun jong u Solomon, uba dang khynnah eh bad ba dang lung ka jingtbit ban ïeng pyrshah ïa ki.

⁸ Mynta phi thmu ban ïaleh pyrshah ïa ka iktiar syiem kaba U Blei u la ai ha ki khun ki ksiew u Dabid. Phi don ka kynhun shipai kaba khraw bad phi don ki khun masi ksiar kiba u Jeroboam u la shna ba kin long ki blei jong phi.

⁹ Phi beh noh shabar ïa ki lyngdoh ki jong U Trai, ki khun ki ksiew jong u Aaron, bad phi beh noh ïa ki Lebi. Ha ka jaka jong ki phi la thung ïa ki lyngdoh ha kajuh ka rukom ba kiwei ki jaitbynriew ki leh. Uno uno uba wanrah lang bad u masi ne hynñiew tylli ki langbrot u lah ban ïoh pynkyntang kum u lyngdoh jong kito kiba shu khot ki blei jong phi.

¹⁰ “Hynrei ngi pat ngi dang ïai shakri ïa U Trai U Blei jong ngi bad ngim shym pat iehnoh ïa u. Ki lyngdoh kiba hiarpateng na u Aaron ki pyndep ïa ki kamram jong ki, bad ki Lebi ki ïarap lem ïa ki.

¹¹ Man ka step bad man ka janmiet ki ai ha u ïa ki jingiwbih bad ki mrad jingkñia ba la thang tylli. Ki ai ïa ki jingainguh kpu ha ka miej kaba la pynkyntang khuid, bad man ka janmiet ki thang ïa ki sharak ha ki diengpynïeng sharak ksiar. Ngi leh ïa kaei kaba U Trai u la hukum, hynrei phi, phi la iehnoh ïa u.

¹² U Blei hi da lade u long u nongïalam jong ngi bad ki lyngdoh jong u ki don hangne lem bad ki turoi, ba la khreh ban put ïa ki bad ban khot ïa ngi bad ïaleh thma pyrshah ïa phi. Ko paid Israel, wat ïaleh pyrshah ïa U Trai, U Blei jong ki kpa tymmen jong phi! Phin ym jop!”

¹³ Ha kata ka por u Jeroboam u la dep phah katto katne na ki kynhun jong u ban apthap ïa ka kynhun shipai ki Judia na shadien, katba kiba sah ki tur ïa ki na sha khmat.

¹⁴ Ki Judia ki peit sawdong bad ki ïohi ba la ker sawdong ïa ki. Ki kyang ha U Trai ban ïoh jingïarap, bad ki lyngdoh ki put ïa ki turoi.

¹⁵ Ki Judia ki pyrta jam, bad hapoh ka jingïalam u Abijah, ki tur ïaleh; U Blei u pynliem ïa u Jeroboam bad ïa ka kynhun shipai Israel.

¹⁶ Ki Israel ki phet ïap na ki Judia, bad U Blei u shah ïa ki Judia ban thombor ïa ki.

¹⁷ U Abijah bad ka kynhun shipai jong u ki thom ïa ki Israel da ka jingjop kaba khraw — shiteng na ki shipai bakynsai ka Israel ki la shah pynïap.

¹⁸ Bad kumta ki paid Judah ki la long nongjop halor ki Israel, namar ki la shaniah ha U Trai, U Blei jong ki kpa tymmen jong ki.

¹⁹ U Abijah u beh kthong ïa ka kynhun shipai u Jeroboam bad u ïohknieh katto katne na ki nongbah jong u: ka Bethel, ka Jeshanah, bad ka Ephron, bad ki nongrit kiba hajan jong kine ki nongbah.

²⁰ U Jeroboam um shym lah khie khlieh shuh ha ka bor jong u ha ka por ka jingsynshar jong u Abijah. Ha kaba khatduh U Trai u shoh ïap ïa u.

²¹ U Abijah, pynban, u la nang kham khlaiñbor. U la don khatsaw ngut ki tnga bad u long u kpa ïa ki arphew ar ngut ki khun shynrang bad khathynriew ngut ki khun kynthei.

²² Kaba sah jong ka histori u Abijah, kaei kaba u ong bad kaei kaba u leh, la thoh ha Ka Histori jong u Iddo u Nongïathuhlypa.