2 KHRONIKL 12 - Khasi CL Bible (BSI)

Ka jingwan hiarthma ki Ijipt ïa ka Judah

¹ Mar ïadep pynskhem ïa la ka bor kum u syiem, u Rehoboam bad ki briew jong u baroh ki iehnoh ïa ka Hukum jong U Trai.

² Ha ka snem kaba san jong ka jingsynshar jong u ïa ka jingbymïaineh jong ki ha U Trai la pynshitom.

³ U Shishak u syiem ka Ijipt u tur ïaleh ïa ka Jerusalem bad ka kynhun shipai kaba shihajar arspah tylli ki kali ïapom, hynriewphew hajar ngut ki shipai shong kulai, bad shibun ki shipai ban ïa kaba lah ban ïa kaba lah ban ñiew, kaba kynthup ïa ki nong Libya, ki Sukki, bad ki kynhun Sudan.

⁴ U knieh ïa ki nongbah ba la kerkut jong ka Judah bad u tur shaphrang shaduh Jerusalem.

⁵ U Shemaïah u nongïathuhlypa u leit sha u syiem Rehoboam bad ki nongïalam jong ka Judia kiba la ïalumlang ha Jerusalem ban lait im na u Shishak. U ong ïa ki, “Kane ka dei ka khubor na U Trai ïa phi: ‘Phi la iehnoh ïa nga, te mynta nga la iehnoh ïa phi sha u Shishak.’”

⁶ U syiem bad ki nongïalam ki phla ba ki la leh pop, bad ki ong, “Kaei kaba U Trai u leh ka long kaba shongnia.”

⁷ Haba U Trai u la ïohi ïa kane, u kren sa shisien ha u Shemaïah bad u ong ha u, “Namar ba ki phla ïa la ki pop, ngan ym pynjot ïa ki. Hynrei haba u Shishak u tur ïaleh, kin ym lait im.

⁸ Ka Jerusalem kan ym mad ïa ka jingbitar lep jong nga, hynrei u Shishak un jop ïa ki, bad kin ïoh jinghikai ïa ka jingïapher hapdeng ka jingshakri ïa nga bad ka jingshakri ïa ki nongsynshar pyrthei.”

⁹ U syiem Shishak u wan sha Jerusalem bad u shim ïa ki jingkynshew na ka Templ bad na ka ïingsyiem. U shim lut ïa kiei kiei, kaba kynthup ïa ki stieh ksiar kaba u syiem Solomon u la thaw.

¹⁰ Ban bujli ïa ki, u Rehoboam u thaw ïa ki stieh da ka rnong bad aiti ïa ki ha ki rangbah pynïaidkam kiba kitkhlieh ban ïada ïa ki khyrdop ka ïingsyiem.

¹¹ Man ka por ba u syiem u leit sha ka Templ, ki nongap ki rah ïa ki stieh bad nangta ki pynphai ïa ki sha ki kamra ba buh ïa ki.

¹² Namar ba u pyndem ha U Trai, ka jingbitar U Trai kam shym pynjot thiaw ïa u, bad kiei kiei ki long kiba bha ïa ka Judah.

Ka jingïathuh lyngkot ïa ka jingsynshar u Rehoboam

¹³ U Rehoboam u synshar ha Jerusalem bad u nang khraw ha ka bor kum u syiem. U don sawphew wei snem mynba u long syiem, bad u synshar khathynñiew snem ha Jerusalem, ka nongbah kaba U Trai u la jied na ki jaka baroh jong ka Israel kum ka jaka hangno ba yn mane ïa u. Ka kmie jong u Rehoboam ka dei ka Naamah, na ka ri ki Ammon.

¹⁴ U leh ïa kaei kaba sniew, namar ba um shym pyrshang ban wad ïa ka mon U Trai.

¹⁵ Ïa ki kam jong u Rehoboam naduh kaba sdang haduh kaba kut bad ki jinglum jingthoh ïa ka longïing jong u la buh jingthoh ha Ka Histori jong u Shemaïah u Nongïathuhlypa bad ha Ka Histori jong u Iddo u Nongïathuhlypa. U Rehoboam bad u Jeroboam ki ïai ïaleh thma uwei ïa uwei pat.

¹⁶ U Rehoboam u la ïap bad la tep ïa u ha ka jingtep ki syiem ha ka Nongbah jong u Dabid bad u khun jong u, u Abijah u long syiem ha ka jaka jong u.