2 KHRONIKL 11 - Khasi CL Bible (BSI)

Ka jingïathuhlypa jong u Shemaïah

¹ Haba u syiem Rehoboam u poi ha Jerusalem, u khot lang ïa ki shi lakh phraphew hajar ngut ki shipai bakynsai tam na ki jait Benjamin bad Judah. U thmu ban ïaleh da ka thma ban pynïoh pat hapoh ka jingsynshar jong u ïa ki jait bashatei jong ka Israel.

² Hynrei U Trai u ong ïa Shemaïah u nongïathuhlypa

³ ban ai ïa kane ka khubor ha u syiem Rehoboam bad sha baroh ki paidbah jong ki jait Judah bad Benjamin:

⁴ “Wat tur ïaleh ïa ki para Israel. Khie leit noh sha ïing, phi baroh. Kaei kaba la jia ka dei ka mon jong nga.” Ki kohnguh ïa ka hukum U Trai bad kim shym la leit ban ïaleh ïa u Jeroboam.

U Rehoboam u kerkut ïa ki nongbah

⁵ U Rehoboam u shongsah ha Jerusalem bad u don ki kynroh ba la tei na ka bynta kine ki nongbah harum jong ka Judah bad Benjamin:

^6-10 ka Bethlehem, ka Etam, ka Tekoa, ka Bethsur, ka Soko, ka Adullam, ka Gath, ka Mareshah, ka Siph, ka Adoraim, ka Lakhish, ka Asekah, ka Sorah, ka Aijalon bad ka Hebron.

¹¹ U ker ïa ki da ki kut baskhem bad u thung u rangbah ai hukum ïa kawei pa kawei na ki, bad ha uwei pa uwei u pynbiang ïa ka jingbam, ka umphniang Olib, bad ka waiñ,

¹² bad ruh ïa ki stieh bad ki sum. Da kumta u ïohbat ïa ki Judah bad ki Benjamin hapoh ka jingkdup jong u.

Ki lyngdoh bad ki Lebi ki wan sha Judah

¹³ Na baroh ki jaka ha Israel, ki lyngdoh bad ki Lebi ki wan shaphang shathie sha Judah.

¹⁴ Ki Lebi ki iehnoh ïa ki jaka pynbam phlang bad kiwei ki jaka bad ki kynriah sha Judah bad Jerusalem, namar u Jeroboam u syiem ka Israel bad kiba hiarpateng na u kim shah ïa ki ban shakri kum ki lyngdoh jong U Trai.

¹⁵ U Jeroboam u thung la ki jong ki lyngdoh ban shakri ha ki jaka mane blei thala bad ban mane ïa ki ksuid bad u thaw ïa ki bleithaw ha ki dur jong ki khun masi.

¹⁶ Na ki jait Israel baroh, ki briew kiba kwah da shisha ban mane ïa U Trai, U Blei ki Israel, ki bud ïa ki Lebi sha Jerusalem, khnang ba kin ïoh ai ïa ki jingkñia sha U Trai, U Blei jong ki kpa tymmen jong ki.

¹⁷ Kane ka pynkhlaiñ ïa ka hima Judah, bad na ka bynta lai snem ki kyrshan ïa u Rehoboam u khun jong u Solomon bad ki im kum kita kiba hapoh ka jingsynshar u syiem Dabid bad u syiem Solomon.

Ka longïing u Rehoboam

¹⁸ U Rehoboam u shongkurim ïa ka Mahalath, uba u kpa u dei u Jerimoth u khun jong u Dabid, bad ka kmie ka dei ka Abihail, ka khun jong u Eliab bad ka ksiew u Jesse.

¹⁹ Ki don lai ngut ki khun shynrang, u Jeush, u Shemaraïah, bad u Saham.

²⁰ Hadien u shongkurim ïa ka Maakah, ka khun jong u Absalom, bad ki don saw ngut ki khun shynrang: u Abijah, u Attai, u Sisa, bad u Shelomith.

²¹ Baroh, u Rehoboam u don khatphra ngut ki tnga bad hynriewphew ngut ki tnga kliar, bad u long u kpa ïa ki arphew phra ngut ki khun shynrang bad hynriewphew ngut ki khun kynthei.

²² Na ki tnga bad ki tnga kliar jong u baroh u ieit tam ïa ka Maakah, bad u kham sngewbha ïa u khun jong ka u Abijah ban ïa baroh kiwei ki khun jong u, da kaba jied ïa u kum uta u ban long syiem ha ka jaka jong u.

²³ U Rehoboam ha ka jingstad u pynkhamti ïa ki jingkitkhlieh ha ki khun jong u, bad u pynshong ïa ki ha ki bynta baroh jong ki nongbah ba la kerkut jong ka Judah bad Benjamin. U pynbiang kyrhai na ka bynta jong ki bad u pynïoh bun ki tnga na ka bynta jong ki.