2 KHRONIKL 10 - Khasi CL Bible (BSI)

Ki jait na shaphang shatei ki ïaleh pyrshah

¹ U Rehoboam u leit sha Shekhem, ha kaba baroh ki briew na shaphang shatei ka Israel ki la ïalumlang ban thung syiem ïa u.

² Haba u Jeroboam u khun jong u Nebat, uba la leit sha Ijipt ban lait im na u syiem Solomon, u la ïohsngew ïa kane ka khubor, u wan phai noh sha ïing.

³ Ki briew kiba na ka jait bashaphang shatei ki phah khot ïa u; bad baroh ki ïaleit lang sha u Rehoboam, bad ki ong ha u,

⁴ “U kpa jong phi u la buh ki jingkit kiba khia ïa ngi. Lada phi pynsting ïa kine ki jingkit bad pynlong ïa ka jingim jong ngi kaba kham suk te ngin long ki khun ki raïot kiba shakri hok ïa phi.”

⁵ U Rehoboam u jubab, “Ai ïa nga lai sngi ba ngan pyrkhat ïa kane ka kam. Nangta sa wan pat.” Kumta kita ki briew ki leit noh.

⁶ U syiem Rehoboam u ïasyllok bad ki riewrangbah kiba la shakri ïa u Solomon u kpa jong u kum ki nongaibuit. “Kaei ka jubab ba phin ai jingmut ïa nga ba ngan ai ha kine ki briew?” u kylli.

⁷ Ki jubab, “Lada phi lehsbun ïa kine ki briew bad phi pyrshang ban pynsngewbha ïa ki, da kaba ai ka jubab kaba jem kin shakri hok ïa phi borabor.”

⁸ Hynrei um kheiñ kor ïa ka jingai jingmut jong kita ki riewrangbah, bad u leit pynban sha ki samla kiba ïaheh ïasan ryngkat bad u bad kiba long mynta ki nongaibuit jong u.

⁹ “Kaei phi ai jingmut ïa nga ban leh?” u kylli. “Kaei ba ngan ong ha ki briew kiba ong ïa nga ba ngan pynsting ïa ki jingkit jong ki?”

¹⁰ Ki jubab, “Kane ka dei kaei ba phin ong ha ki: ‘Ka 'tiduh jong nga ka kham rben ban ïa ka syngkai i pa jong nga.’

¹¹ Ïathuh ïa ki, ‘I pa i la buh ha phi ïa ki jingkit kiba khia; nga ngan nang pynkhia shuh shuh. I la sympat ïa phi da u shabuk, hynrei nga ngan sympat ïa phi da u shabuk kulai!’ ”

¹² Hadien lai sngi u Jeroboam bad ki briew baroh ki leit pat sha u syiem Rehoboam, kumba u la bthah ïa ki.

¹³ U syiem um ñiewkor ïa ki jingai jingmut ki riewrangbah bad u kren tohmet ïa kita ki briew,

¹⁴ kumba ki samla ki la ai jingmut. U ong, “I pa jong nga i la buh ki jingkit kiba khia, nga ngan pynlong ïa ki, kiba kham khia shuh shuh. I la sympat ïa phi da u shabuk, nga ngan sympat ïa phi ïa u shabuk kulai!”

¹⁵ Ka long ka mon jong U Trai U Blei ban pynjia ïa kaei ba u la kren ha u Jeroboam u khun jong u Nebat lyngba u Ahijah u nongïathuhlypa na Shiloh. Kane ka long balei ba u syiem um shym la shahshkor ïa ki briew.

¹⁶ Haba kita ki briew ki ïohi ba u syiem um shahshkor ïa ki, ki pyrta jam, “Keiñ noh ïa u Dabid bad ka longïing jong u! Ki la leh aïu na ka bynta jong ngi? Ko ki rangbah Israel, ïa ngin ïaleit noh sha la ïing! Ai ba u Rehoboam un khmih hi na ka bynta ïa lade.” Kumta ki paid Israel ki ïaleh pyrshah,

¹⁷ da kaba iehnoh ïa u Rehoboam kum u syiem tang ïa ki briew kiba shong ha ka ri Judah.

¹⁸ Nangta u syiem Rehoboam u phah ïa u Adoniram, uba khmih ïa ki nongtrei ba la shu pynbor, ban leit sha ki Israel, hynrei ki la lynthem maw ïa u haduh ba un da ïap. Ha kane u Rehoboam u kiew pynstet ha la ka kali ïapom bad u phet sha Jerusalem.

¹⁹ Naduh kata ka por, ki briew jong ka hima bashatei ka Israel ki ïai ïaleh pyrshah ïa ka longïing syiem jong u Dabid.