2 KHRONIKL 1 - Khasi CL Bible (BSI)

U syiem Solomon u duwai ban ïoh ka jingstad

¹ U Solomon u khun jong u syiem Dabid u la pynskhem ïa ka jingsynshar ïa ka hima Israel, bad U Trai U Blei jong u, u la kyrkhu ïa u bad pynlong ïa u uba khlaiñbor shikatdei eh.

² U syiem Solomon u la ai hukum ïa baroh ki rangbah pynïaidkam kiba khmih ïa ki kynhun ba shihajar ngut ki rangbah bad ïa ki kynhun kiba shispah ngut ki rangbah, ïa baroh ki rangbah synshar ka sorkar, ïa baroh ki khlieh jong ki longïing longsem, bad ki briew basah baroh, da kaba hukum ïa ki ban leit bad u sha ka jaka mane ha Gibeon.

³ Ki la leit shata namar dei hangta ba ka Ïingjaiñ Ka Jingdon Ryngkat U Trai ka don, ha kaba u Moses, u shakri jong U Trai, u la pynïeng ha ka ri khlaw.

⁴ (Pynban, Ka Synduk ka Jutang ka don ha Jerusalem, la buh ïa ka ha ka ïingjaiñ kaba u Syiem Dabid u la pynïeng mynba u wanrah ïa Ka Synduk na Kiriath Jearim.)

⁵ Ka duwan rnong kaba la thaw da u Besalel, u khun jong u Uri bad u ksiew jong u Hur, ka don ruh ha Gibeon ha khmat jong ka Ïingjaiñ Ka Jingdon Ryngkat U Trai. U syiem Solomon bad ki briew baroh ki la mane ïa U Trai hangta.

⁶ Ha khmat jong ka Ïingjaiñ, u syiem u la mane ïa U Trai da kaba ai ki jingkñia ha ka duwan rnong; u la phah pynïap shihajar tylli ki jingri bad thang tylli halor jong ka.

⁷ Ha kata ka miet U Blei u la mihpaw ha u Solomon bad u kylli, “Kaei me kwah ba ngan ai ïa me?”

⁸ U Solomon u jubab, “Me ju ïai pynpaw ka jingieit bakhraw ïa u Dabid u kpa jong nga, bad mynta ba me la shah ïa nga ban long syiem hadien jong u.

⁹ A Trai U Blei, to pyndep ïa ka kular kaba me la ong ha u kpa jong nga. Me la pynlong syiem ïa nga halor u paidlang uba bun katta katta kat haduh ba ym lah ban ñiew, kumta to ai ha nga ïa ka jingstad bad ka jingtip kaba nga donkam ban synshar ïa ki.

¹⁰ Lym kumta, kumno ngan lah ban synshar ïa une u paidlang uba khraw jong me?”

¹¹ U Blei u jubab ïa u Solomon, “Me la jied ïa kaba dei. Ha ka jaka ka jingpan ïa ka spah lane ka jingkynshew lane ka nam lane ka jingïap jong ki nongshun jong me lane wat ka jingjlan jong ka jingim jong me, me la pan ïa ka jingstad bad ka jingtip khnang ba me lah ban synshar ïa ki briew jong nga, kiba halor jong ki nga la thung syiem ïa me.

¹² Ngan ai ha me ïa kata ka jingstad bad ka jingtip. Nalor kata, ngan ai ruh ha me bun ka spah, ka jingkynshew, bad ka nam ban ïa uno uno u syiem uba la ju ïoh mynshuwa lane un ïoh biang pat.”

Ka bor bad ka spah jong u syiem Solomon

¹³ Kumta u Solomon u mihnoh na ka jaka mane ha Gibeon, ha kaba don ka Ïingjaiñ Ka Jingdon Ryngkat U Trai, bad u leit phai pat sha Jerusalem. Hangta u synshar ïa ki Israel.

¹⁴ U la thaw ka kynhun ïaleh kaba don shihajar sawspah tylli ki kali ïapom bad khat-ar hajar tylli ki kulai na ka bynta ki shipai shnong kulai. Katto katne na ki u la buh ha Jerusalem, bad ïa kiba sah u la buh ha kiwei pat ki nongbah.

¹⁵ Ha ka por ka jingsynshar jong u, ka rupa bad ka ksiar ki kynrei ha Jerusalem kum ki maw, bad u dieng Kedar u jyllei kum u dieng Sykomore.

¹⁶ Ki nongpyntrei kam jong u syiem ki pynïaid ïa ka jingshalan kulai na Musri bad Kilikia bad ïa ka jingshalan kali ïapom na Ijipt.

¹⁷ Ki pynbiang ïa ki syiem jong ka Hit bad ka Syria da ki kulai bad ki kali ïapom, da kaba die ïa ki kali ïapom ha ka dor hynriewspah ki sbai rupa kawei bad ïa ki kulai ha ka dor shispah sanphew ki sbai rupa uwei.